Múungu Kukola Endagano Na Núhu
9
1 Áaho Múungu yaámufuuha Núhu na abaanábe, óokwo naabagaambila aáti, “Muzaále muzaaliláne, mukánye, mwiizuze éensi. 2 Enyameéswa ne ebituungaánwa byóona bye éensi, enyonyi zóona, ebihaángwa byóona ebyaázula ahi itaka ne eénfwi zóona zo omunyaanza zibatíine no kubaniagula bwooli. Ebihaángwa éebyo byóona mubitégeke. 3 Éebi byóona nibiba ebyookulya byéenyu nkokwo naabahéele emimelo. Óobu, naabaha éebyo byóona.”Obulami Buli Omuunságama
4 (Múungu yaaguma kugaambila Núhu aáti), “Náho mutálilya enyama echiina enságama habwo kuba obulami buli omuunságama éezo. 5 Kaandi okwiita abaantu kwaangiílwe.a Ebihaángwa byóona ebiine obulami ebilaséesa enságama ya abaantu bikwiilwe kwiitwa. Obuchilo bwoóna bwóona omuuntu alaséesa enságama ya mzeenzíwe kuhicha lufu nniimuchwaaziikíla kufwa. 6 Omuuntu alaséesa enságama yo omuuntu oóndi kuhicha lufu, mazima weényini naachwaaziikílwa hakuséeswa ensagamáye na abaantu abáandi, habwo kuba nkahaanga abaantu omuunsuso yaanze.
7 “Náho íimwe, muzaále muzaaliláne. Mukánye bwooli omúunsi yóona.”
Omuhaangázimwa
8 Mála Múungu yaámugaambila Núhu na abaanábe, 9 “Leeba, iinye naakola endagano yaanze neemwe hamo no oluzáalo lwáanyu, 10 ne ebihaángwa byóona ebiina obulami nké enyonyi, ebituungaánwa ne enyameéswa zóona zo omúunsi, byóona ebyaásohweele neemwe kuluga omuli safína. 11 Niingumísa endagano yaanze hali íimwe nkokwo tiínchisubila kaandi kusiíndika enzula ne enzwéelo éezo zo kusiingaalicha ebihaángwa byóona ebilikwiicha ne éensi yóona.”
12 Múungu yaágaamba, “Óolu nílwo oluméenko lwe ndagano eyoondikukóla hali iinye neemwe hamo ne ebihaángwa byóona ne enzáala zóona ezileezáyo obucha no obuchiile. 13 Naatáho omuhaangázimwa gwaanze omubwíile nagwo niguba oluméenko lwe ndagano yaanze hali íimwe ne éensi yóona. 14 Neenye buli kusiíndika obwíile ahalugulu ye éensi no muhaángazimwa kuloleenkana omubwíile, 15 niinyizúka endagano yaanze éezo naalageene neemwe hamo ne buli lubala lwe ebihaángwa byóona ebilikwiicha. Tiíndísiindika kaandi enzula ne enzwéelo zo kusiingaalicha byóona ebiina obulami. 16 Habwéecho, obuchilo bwoóna bwóona omuhaangázimwa kaguliloleenkana omubwíile niinguléeba no kwiizuka endagano yaanze yo obucha no obuchiile hali iinye, Múungu, ne ebihaángwa byóona ebilikwiicha omúunsi.”
17 Níkwo Múungu kugaambila Núhu aáti, “Óolu nílwo oluméenko lwe ndagano yi naatáho hali iinye, Múungu, ne ebihaángwa byóona ebiina obulami omúunsi.”
Núhu Na Abatabaníbe
18 Abatábani ba Núhu abaalugile omuli safína bakaba bali Shéemu, Háamu na Yaáféeti. (Háamu óogu, níwe akaba ali iíse wa Kanáani.) 19 Áabo nibo abatábani básatu ba Núhu abaazéele abaantu bóona. Kulugiilila omuli áabo bakasaambaalila éensi yóona.
20 Enzula ne enzwéelo zo kwiikisa éensi kázaalekíile, Núhu ayaabele ali omulimi, yaabaanza kulima omusili gwe mizabibu. 21 Chilo chimo yaánywa amaálwa ge ezabibu,b yaátamiila, yaalyaama óomu kwiísuulula yeekala busa omwiiheemálye. 22 Háamu, ali iíse wa Kanáani, yaabona enzúula ya isébo, yaásohola, yaaza kubagaambila beene báabo bábili nkokwo isébo ali busa. 23 Náho Shéemu na Yaáféeti baákwaata echizwáalo beétaanda ahamabega gáabo. Mála baázeenda chigoongo nyúma, baásweeka enzúula ya isébo, kunu améeso gáabo galeebile halubazu bataákubona enzúula ya isébo. 24 Mbweenu Núhu káyaatamuúlukile no kumanya éebyo mutábani omuto, Háamu, yaamukólela, 25 yaácheena Kanáani ali omutábani wa Háamu ne enzaalwáye, naagaamba aáti, “Bachéenwe Abakanáani! Nabo nibaba abazáana ba ahaansi bwooli kuchila bóona be enzáalwa za Shéemu na Yaáféeti.c”
26 Kaandi yaágaamba, “Akuzíbwe Omukáma Múungu, Múungu wa Shéemu! Kanáani aábe omuzáana wa Shéemu. 27 Múungu amwoongéle Yaáféeti enzáalwa no obutúulo omúunsi, na beekale hamo ne enzáalwa za Shéemu. Kanáani aábe omuzáana wa Yaáféeti.”