Epesu i

Sura ni Suro Paulu anu napakatuka jumaa i kota

Epesu

Pepuua lolita

I Paulu mouki sura ei, tongona ratarunggu nakenimpobagona mobambari Bambari Malompe, mpane napakatuka sira topepotuu si Pue Ala i kota Epesu (3:1, 13; 4:1). Tau anu meari i Epesu etu, kaworina baria sira toYahudi (2:11-12).

I rara nu sura ei, i Paulu mampololita kaisina pewati anu tasumba “nakenimposintuwuta ai i Kerisitu” (1:3). I Paulu mampololita mbui kono i tunggaia ni Pue Ala “bona sinangkana, malompe anu i suruga ba anu i dunia, Napasintuwu nakenimposintuwura ai i Kerisitu, anu moparentai sinangkana” (1:9-10). I Paulu mopaguru mbui sira kono i babeia anu sintoto i topepotuu si Pue Ala (4:1–6:20).

I rara nu sura ei, i Paulu mopake basangkia mpangkana ngkora pandiri. I Yesu rapandiri ewa Woo, mpane topeulaNa rapandiri ewa sumambaa wotoNa (1:10, 22-23; 4:4, 15-16; 5:23-32). I Yesu rapandiri ewa watu pomesoa nu tombi. TopeulaNa rapandiri ewa parewa nu tombi anu teparampi i wongkona (2:20-21). Inosa Magali rapandiri ewa pampekatandai ni Pue Ala i rarata (1:13; 4:30). Ane ria pampekatandai nu tau i sambua sura, tongawamo kaimana tumpu nu sura etu. Ewa etu mbui, Inosa Magali i rarata mopatongawa ka kitana tau ni Pue Ala. Jumaa rapandiri ewa surudado anu moewa kuasa anu madaa ai parewa pombeala anu lako si Pue Ala (6:10-18).

Isi nu Sura

1. Pepuua lolita (1:1-2)

2. Tunggaia ni Pue Ala i topepotuu si Ia (1:3–3:21)

a. I Pue Ala mokiraka sira maisi pewati nakenimposintuwura ai i Kerisitu (1:3-23)

b. I Pue Ala mopasintuwu toYahudi ai tau anu baria sira toYahudi (2:1–3:13)

c. I Paulu mekakae bona rainsanira adiwa kabosena asi ni Kerisitu si sira (3:14-21)

3. Babeia anu sintoto i topepotuu si Pue Ala (4:1–6:20)

a. Jumaa sangangaa mosintuwu ai mombepakaroso mporara (4:1-16)

b. Jumaa sangangaa motende babeia anu madaa ai mobabei apa anu malompe (4:17–5:21)

c. Basangkia mpangkana pepatudu (5:22–6:9)

d. Jumaa rapandiri ewa surudado anu mangkeni parewa pombeala (6:10-20)

4. Tabea kasopoana (6:21-24)