Katuwu anu bou nakenimposintuwu ai i Kerisitu
2
1 Ni banimpia, mamate pepotuumi lawi madosa komi ai moliungi komi parenta ni Pue Ala. 2 Ni tempo etu, babeiami eo-eona ewa babeia nu tau anu madaa i dunia ei, lempona mampeulai komi peundea Datu nu Seta, tadulako nu kuasa anu madaa anu i laerawa, anu duduuna ei-ei, mobago liliu ia i rara nu tau anu baria mengkoru si Pue Ala. 3 Ni banimpia, ope-ope kita ewa etu mbui babeiata. Babeiata mangula peundea nu rarata ai pekirita anu madaa. Ni tempo etu sintoto mpuu kita nasuku ni Pue Ala nakeni nu babeiata anu madaa, ewa anu rababei nu tau ntanina.4 Agaiana malompe mpii rara ni Pue Ala ai mabose mpii kamaasiNa anu Nakiraka kita. 5 Naudapae ni banimpia mamate pepotuuta nakeningkamasalata, Napatuwu kita simbela-mbela ai i Kerisitu. Nikaendo, batena ngkida nakeningkabula rara ni Pue Ala, mpane tesorema kita lako i suku dosata! 6 Nakenimposintuwuta ai i Yesu Kerisitu, i Pue Ala mopatuwu mpesola kita, mpane mampopomeso kita i pomesoa anu meawa i rara nu suruga, bona meparenta simbela-mbela ai i Kerisitu. 7 Tunggaia ni Pue Ala bona i eo anu mai, ina Natudoka kita kabosena pepokaasiNa, ai pepokaasiNa etu tasumba lako i posintuwuta ai i Yesu Kerisitu. 8-9 I Pue Ala mosoremamo kita lako i suku dosata nakeningkabula nu raraNa ai nakenimpepotuuta si Yesu. Baria kita Nasorema nakeni nu babeiata anu malompe. Etumo mpane baria ria sadua tau anu pensani mampemabose ai apa anu nababei. 10 Napopewalimo kita ni Pue Ala manusia anu bou, nakenimposintuwuta ai i Yesu Kerisitu, bona mobabei kita apa anu malompe mangula tunggaiaNa si kita anu Napakanotomo ni banimpia.
Rapoposintuwu i rara sanga ni Kerisitu
11 Mewali poka-poka, anu baria komi toYahudi, nikaendo katuwumi anu ni banimpia: Rauli komi, “Tau anu baria ratindi,” mangula lolita nu toYahudi, anu manguli ka sirana tau anu ratindi; tunggaiana anu mansumbamo sira tanda anu rababei nu manusia i wotora. 12 Ni tempo etu, baria mani komi mosintuwu ai i Kerisitu. Komi ewa tau anu tepairaoa, baria komi samporangaa ai toYahudi anu napelisi ni Pue Ala mewali tauNa. Baria ria kirami i rara dandi ni Pue Ala i tauNa. I rara nu katuwumi i dunia ei, baria ria pesarumakami ai karao komi lako si Pue Ala.
13 Agaiana ei-ei, nakenimposintuwumi ai i Yesu Kerisitu, komi anu karao lako si Pue Ala ni banimpia, ei-ei gompimo komi lawi i Kerisitu mosusumo wotoNa rapopate mopasuru komi. 14-15 Lawi i Kerisitu anu mopasintuwu kita toYahudi ai tau anu baria sira toYahudi mewali santina. NakeningkamateNa, Napawiamo kita lako i ope-ope atura ai parenta agama Yahudi. Etu Nababei bona mampopengkaroo pobungka-bungka nu toYahudi ai tau anu baria sira toYahudi. Ni banimpia atura agama Yahudi etu mewali ewa rindi watu anu mampopogaa kita. Agaiana ei-ei, kami toYahudi ai komi anu baria toYahudi, napasintuwumo kita ni Kerisitu, bona Napopewali kita manusia anu bou anu mosintuwu ai Ia. Ewa etumo dalaNa moparia posintuwu nu toYahudi ai tau anu baria toYahudi. 16 NakeningkamateNa i kau anu rapopombesape, i Kerisitu mopasintuwu tau rontina aretu. Mpane lako ni se etu, Napasintuwumo kita ope-ope ai i Pue Ala. Kamate ni Kerisitu i kau anu rapopombesape mampopengkaroo sinangka pobungka-bungka. 17 Etumo mpane ni banimpia i Kerisitu, mai mopadongka bambari posintuwu si komi anu karao lako si Pue Ala, ai i toYahudi anu gompi si Pue Ala. 18 Mampoliungi apa anu nababei ni Kerisitu, ope-ope kita, malompe kami toYahudi malompe komi anu baria toYahudi, pensani mogompilisi i Pue Ala Tuamata, nakenimpenini nu Inosa Magali.
19 Etumo mpane, komi bariamo tepesua tosandarena ba topesua. Komi ei-ei iamo simbela-mbela tau ni Pue Ala. Komi iamo santombia ni Pue Ala. 20 Kita anu mepotuu si Yesu pensani kita rapandiri ewa tombi anu nawangu ni Pue Ala. Iamo rawangu i wongko patudu suro ni Pue Yesu ai nabi-nabi. Mpane i Yesu Kerisitu iamo watu pomesoa nu tombi. 21 Iamo anu moparampi ope-ope parewa nu tombi aretu, mewali Tombi ni Pue Ala anu tepakanotomo mewali tombi penombaa si Pue. 22 Ai komi mbui poka-poka, nakenimposintuwumi ai i Kerisitu, rawangu komi simbela-mbela ai ope-ope tau anu mepotuu si Kerisitu, mewali tombi anu napearii nu Inosa Magali.