Epesu 1

Sura ni Suro Paulu anu napakatuka jumaa i kota

Epesu

1 Sura ei lako si aku, i Paulu, anu napopewali ni Pue Ala mewali suro ni Yesu Kerisitu. Sura ei kupakatuka komi tau ni Pue Ala i Epesu, anu tetida pepotuumi si Yesu Kerisitu. 2 Mekakae aku si Pue Ala Tuamata ai si Pue Yesu Kerisitu bona mokiraka komi pewati ai kalompe nu katuwu.

I Pue Ala mowati kita nakenimposintuwuta ai i Yesu Kerisitu

3 Tetoiamo i Pue Ala, Tuama nu Pueta i Yesu Kerisitu! Lawi Nawati kita ai sinangka pewati anu malompe i rara nu suruga, nakenimposintuwuta ai Kerisitu. 4 Lako baria mani dunia ei rateru, Napelisimo kita mosintuwu ai i Kerisitu, bona mewali kita tauNa anu magali anu baria ria kamasalata i petotokiNa. 5 Mpolinguruna Napakanotomo ka Naongkota mewali anaNa, lawi maasi raraNa si kita. Naongkomo kita mewali anaNa nakeningka nasoremata ni Yesu Kerisitu, lawi etumo anu Napakanotomo. 6 Etumo mpane tatoia i Pue Ala, lawi lako i kabula nu raraNa, Nakira mbero asiNa si kita nakenimposintuwuta ai i Yesu, AnaNa anu Napokaasi.

7 Nakeningkamate ni Yesu ai nakenimposintuwuta ai Ia, i Pue Ala mopawia kita lako i suku dosata lempona Naampuni dosata lako i kabula nu raraNa. 8 AsiNa anu baria ria sokana etu, Natudoka kita mangula katopaNa anu baria pensani nasoka nu manusia. 9-10 Mangula peundeaNa, Napopainsanikamo kita tunggaiaNa anu masaemo tewunikai, iamo sinangkana anu Napopewalimo, malompe anu i suruga ba anu i dunia, Napasintuwu nakenimposintuwura ai i Kerisitu, anu mewali Woo nu sinangkana anu Napopewali. Ni banimpia i Pue Ala mopakanoto tunggaiaNa anu ina Napabukei mampoliungi i Kerisitu, ai batena Napopewali ane dongka tempona.

11 I Pue Ala mobabei sinangkana mangula peundeaNa ai pobotusiNa saduduaNa. Lako i mpolinguruna Napelisimo kita ai Napakanoto mpuu ka kitana anu mewali tauNa nakenimposintuwuta ai i Kerisitu, 12 bona kita anu mpolinguruna mesarumaka si Kerisitu, pensani mampopewali tau ntanina motoia i Pue Ala nakenimpeawaNa. 13 Komi mbui mewalimo tau ni Pue Ala i pangepemi Bambari Malompe, iamo bambari anu mosorema komi lako i suku dosami. Mepotuu komi si Yesu Kerisitu, etumo mpane i Pue Ala mokiraka komi Inosa Magali mewali tanda ka Natumpuimi. Inosa Magali etumo anu Nadandi ni banimpia. 14 Inosa Magali etumo anu mewali pempatoroata kainata modoko apa anu Nadandikamo ni Pue Ala i tauNa. Eimo anu mopakaroso rarata kaina napawiata ni Pue Ala lako i suku dosata. Etumo mpane sintoto mpuu i Pue Ala tatoia ai tapomabose.

Pekakae ni Paulu

15 Mewali, nakeningka kuepena bambari kono i pepotuumi si Pue Yesu ai kamaasimi i ope-ope tau ni Pue Ala, 16 etumo mpane kuuli liliu maisi kalompena si Pue Ala nakeningka komina, ai kupekakaeka liliu komi. 17 Mekakae aku si Pue Ala, Pueta Yesu Kerisitu, Tuamata anu meawa bona mokiraka komi InosaNa. InosaNa etu mampopewali komi matopa, bona manginsani komi i Pue Ala i kamonso-monsona. 18 Kuperade bona i Pue Ala mopakanoto rarami, bona niinsani apa anu nisarumaka lako si Pue Ala anu moronde komi. Ai bona niinsani mpuu kabosena pewati anu Napatimamaka ni Pue Ala i ope-ope tauNa, 19 ai bona niinsani mbui kabosena kuasa ni Pue Ala anu mobago i rarata anu mepotuu si Ia, sintoto ai kabose nu kuasaNa, 20 anu Napake mampopengkawangu i Kerisitu lako i kamate bona Napopomeso mbai i kuanaNa i rara nu suruga.

21 Kuasa anu nakira ni Pue Ala si Kerisitu etu, melumbu kabosena lako i kuasa nu ope-ope topoparenta, ope-ope tadulako, ope-ope anu makuasa, ai ope-ope anu rapenombai, malompe anu tuwu ei-ei, malompe anu tuwu i eo anu ina mai. 22 I Pue Ala mampopengkoru sinangka-nangkana si Kerisitu, mpane mokira i Kerisitu i jumaa mewali ewa Woo anu moparentai sinangka anu ria. 23 Jumaa etu rapandiri ewa wotoNa, anu mopatongawa kabukena kuasaNa ai Ia saduduaNa anu mopabukei sinangka-nangkana.