Pobago ni Paulu mobambari Bambari Malompe
3
1 Etumo mpane, aku i Paulu tongoku ratarunggu nakenimpobambariku kono i Yesu Kerisituna, si komi anu baria toYahudi. 2 Manoto ka niepenamo adiwa i Pue Ala mokiraka aku bago ei, bona mobambari aku Bambari Malompe anu mopadongka pepokaasi ni Pue Ala si komi, anu baria komi toYahudi. 3 Ni banimpia, tunggaia ni Pue Ala etu tewunikai mani. Agaiana ei-ei Napatongawamo si aku, ai etu anu kuuki i rara nu suraku ni mpongone nauda marede ngkida. 4 Mewali ane nibasa suraku, ina niinsani tunggaia ni Pue Ala anu tewunikai kono si Kerisitu, ewa ka kuinsanina. 5 Ni banimpia, tunggaiaNa etu baria Napatongawa i manusia. Agaiana ei-ei rapatongawamo i suroNa ai i nabi-nabiNa mampoliungi Inosa Magali. 6 Eimo tunggaiaNa anu tewunikai etu: tau anu baria sira toYahudi mansumba mbui sira pewati ni Pue Ala simbela-mbela ai toYahudi. I Pue Ala mampopewalimo sira samporangaa ai toYahudi, ai mansumba mbui sira apa anu Nadandi i ope-ope anaNa. Etu rasumbara nakenimposintuwura ai i Yesu Kerisitu lawi mepotuu sira i Bambari Malompe.7 Mewali, mobambari aku Bambari Malompe lawi naongko aku ni Pue Ala mewali topobagoNa nakeningkabula nu raraNa. Napakaroso aku ai kuasaNa bona kubuku mampopolumako bago etu. 8 Lako i ope-ope tau ni Pue Ala, akumo anu tepakoi mpii katuwuku. Agaiana nauda ewa etu, nakeningkabula rara ni Pue Ala, Napelisi aku mopadongka Bambari Malompe i tau anu baria sira toYahudi, bona kuulika sira kapebuku ni Kerisitu anu baria ria kaopeana. 9 Ai bona mampoliungi bago anu rakiraka aku, ope-ope tau manginsani adiwa i Pue Ala, Topoteru dunia ei, mampopewali tunggaiaNa anu ni banimpia tewunikai i tau sira i dunia. 10 Tunggaia ni Pue Ala, bona ei-ei mampoliungi topepotuu si Kerisitu, ope-ope anu mopatoro kamakuasa i suruga manginsani kamatopa ni Pue Ala anu baria pensani nasoka nu manusia i sinangka-nangkana. 11 Mampoliungi i Yesu Kerisitu Pueta, i Pue Ala mobabei ope-ope etu, mangula tunggaiaNa anu baria mokasopoa, anu ria amimo lako baria mani dunia ei rateru. 12 Nakenimpepotuuta si Yesu Kerisitu ai posintuwuta ai Ia, pebaimo kita mogompilisi i Pue Ala ai kabuke-bukena pepotuuta. 13 Etumo mpane kuperade bona inee mapari rarami mangepe karapopesiasiku, lawi apa anu kutodisa ei mangkeni pewati si komi.
Kabose nu asi ni Yesu Kerisitu si kita
14 Etumo mpane molingkudu aku i lio ni Pue Ala Tuamata. 15 Lawi Iamo anu mokira katuwu i santina-santina anu ria i suruga, awetu mbui santina-santina anu ria i dunia. 16 Mekakae aku si Pue Ala anu mabose mpii kuasaNa, kuperade bona lako i kuasaNa anu mabose etu, ina Napakaroso rarami ai InosaNa, 17 duduuna i Kerisitu meari liliu i rarami nakenimpepotuumi, katuwumi morari mepuu lako i pepokaasi. 18-19 Mekakae aku bona komi simbela-mbela ai ope-ope tau ni Pue Ala, manginsani kabose nu asi ni Kerisitu si kita. AsiNa etu melumbu lako i apa anu tabuku, tapololita, anu baria tesoka kandalana, ai baria tabuku mosoka kabosena. Mekakae aku bona niinsani asiNa etu i rara nu katuwumi, ai bona modoko komi ope-ope pangkeniaka ni Pue Ala.
20 Mabose mpuu kuasa ni Pue Ala, anu mobago i rara nu katuwuta. Mpane lako i kuasa ni Pue Ala etu, pensani moparia anu melumbu mpii lako i ope-ope anu taperade, ba anu tapekiri. 21 Etumo mpane sintoto mpuu tatoia i Pue Ala, duduuna i pemule-muleata anu mampotuu i Yesu Kerisitu. Tetoiamo i Pue Ala duduuna kasae-saeana. Amin.