Mosintuwu kita ai pokata sampepepotuuta
4
1 Etumo mpane kuulika komi poka, aku ei ratarunggu nakenimpobagoku si Pue. Kuperade mpii si komi bona nibabei apa anu sintoto, ai katuwumode komi i rara mperonde ni Pue Ala. 2 Sangangaa mengkaiwoi komi, ai sangangaa maalusu pangkeniakami i pangka-pangkana, ai sangangaa masabara komi. Nipatongawamode kamaasimi i rara nu pombedokomi sadua ai sadua. 3 Sangangaa nipari-pari i kamonso-monsona, bona tuwu komi i kalompe-lompena, ai i kalene rara bona kasambua pekiri anu naparia nu Inosa ni Pue Ala, batena tekadipuraka. 4 Lawi sawoto ngkida kita, ai sambua Inosa ngkida kita, ewa etu mbui komi raronde bona sambua ngkida pesarumakaata. 5 Sadua ngkida i Pue, sambua ngkida pepotuuta, ai sambua ngkida periu. 6 Sadua ngkida i Pue Ala, anu mewali Tuama nu ope-ope tau. Ia anu moparenta ope-opena, anu mampobago ope-opena, ai meari i rara nu ope-ope tau.7 Agaiana kita sadua ai sadua nakirakamo ni Kerisitu kapande anu montani-ntani sintoto ai peundeaNa. 8 Etumo mpane ria teuki i rara nu Sura Ngkora Magali kono si Kerisitu anu manguli ewa ei:
“I tempoNa mengkaore i kawaneana,a
Nakeni sira tau anu ratawani,
mpane Nakira-kira pewati i tauNa.” (Dulua Petoia 68:19)
9 Apa lempona lolita etu anu rauli, “Mengkaoremo Ia?” Etu mopakanoto, pendoluNamo mbai i karembeana mpii i dunia ei. 10 I Kerisitu anu mendolu etu, Ia mbui anu mengkaore duduuna mansumba pomesoa anu melumbu kawanena lako i ope-ope anu i langi, bona mopabukei sinangka-nangkana. 11 I Kerisitu etu anu mokira-kira pewati i ope-ope tau, anu mepotuu si Ia: Ria sira anu Napopewali suroNa, ria sira anu Napopewali nabi, ai ria mbui sira anu Napopewali topangkeni Bambari Malompe, ai guru-guru topokadipuraka jumaa. 12 Nababei ewa etu bona tau ni Pue Ala raparewai i kasondo-sondona bona pensani kita mampopolumako bago ni Pue, ai mowangu tau ni Yesu Kerisitu anu mewalimo wotoNa saduduaNa. 13 Duduuna sampepekiri kita i rara nu pepotuuta, ai ina tainsani mpuu Ana ni Pue Ala. Ina kalalaua manginao kita, duduuna bariamo ria kamakurata mpane mewali kita ewa i Kerisitu.
14 Mewali, ane ewa etu karoso nu pepotuuta, bariamo kita ina rapakanawu ewa anakoi, anu tepawilau wimai ai tekeni-keni wilau wimai ai pangka-pangkana pepatudu lako i tau sira anu meakalangi anu mepakanawu, ai akalara anu madaa. 15 Baria! Agaiana kita sangangaa mampololita apa anu mamonso i rarata anu buke kamaasi, bona i rara nu sinangka-nangkana, kasae-saea kalalaua mewali kita manoto ewa i Kerisitu, anu mewali woota. 16 Ai kita ope-ope rapandiri ewa sangkira lako i woto ni Kerisitu. Ane i woto manusia, ope-ope kirana mombeunsu lompe ai mombeumpu lompe bona mewali sambua woto. Awetu mbui kita anu mepotuu si Kerisitu, nakenimposintuwuta ai i Kerisitu, mosintuwu kita sadua ai sadua. Ai ane sadua-sadua kita mampopolumako bago anu natibo-tibokamo kita ni Pue nakenimpombepokaasita, ina kalalaua maroso peulata si Pue ai posintuwuta sadua ai sadua.
Katuwu anu mabou mampoliungi i Kerisitu
17 Etumo mpane, ai kuasa anu nakiraka aku ni Pue kuuli ai kupakanotoka komi: Inee komi tuwu ewa tau anu baria manginsani i Pue Ala, ai mampekiri anu baria mobundu. 18 Pekirira madedimo, ai baria sira mampolumakoi katuwu malompe anu nakira ni Pue Ala, lawi baria mpuu sira manginsani apa-apa kono si Pue Ala. Mpane sira ewa etu, lawi makoo rarara. 19 Bariamo rainsanira maea, duduuna mangula sira pekiri ai peundea nu rarara anu madaa, ai raundera mpii mobabei sinangka babeia anu merikati.
20 Ane komi, baria babeia etu anu rapatuduka komi kono si Kerisitu. 21 Niepe mpuumo kono si Ia. I posintuwumi ai i Yesu, rapatuduka komi pepatudu anu mamonso anu tasumba lako si Ia. 22 Etumo mpane, sangangaa nipawia babeiami anu baria malompe lako baria mani komi mepotuu si Pue, anu tongona napakarugi nu peundeami anu mepakanawu, 23 bona rapakabou rarami ai pekirimi. 24 Mpane lako i se etu, sangangaa niula babeia anu bou, lawi i Pue Ala mampopewali komi manusia anu bou, anu manoto ai anu magali mangula pangkeniakaNa saduduaNa.
25 Mewali poka-poka, ineemo modongko, sangangaa nipololita apa anu manoto i ope-ope rangami, lawi kita ope-ope iamo kirana lako i woto ni Kerisitu. 26 Ane marumpu komi, inee nipogeaka karumpumi etu mangkeni komi madosa. Inee komi marumpu duduuna limpa eo, 27 bona ntena ria tempo Datu nu Seta mokelo komi. 28 Tau anu manangka, ineemo sira manangka. Aginamo sira mobago, bona mansumba sira pangkonira i kanoto-notona ai bona pensani sira motulungi rangara anu baria nakariangi.
29 Inee ria pololitami anu madaa anu mensuwu lako i ngudumi. Aginamo mampololita komi lolita anu sintoto anu ina motulungi ai mopakaroso rara singka rangami. Lolita anu ewa etu ina mangkeni pewati i tau anu mangepe. 30 Inee komi mopakadaa rara nu Inosa Magali. Nikaendo, Inosa Magali iamo pampekatandai ni Pue Ala i rarami anu mopakanoto ka kitana tauNa. Nakeningkaria nu Inosa Magali i rarami, niinsani kaina dongkana i Pue Ala mosorema komi.
31 Mewali, nipawiamo ope-ope babeia, ewa ei: kadua rara, karumpu, pepairara, pobungka, ai pesasalai. Ewa etu mbui nipawiamo sinangka anu madaa. 32 Aginamo nipakalompe-lompe rarami, mombepokaasi komi sadua ai sadua, ai niampuni sala nu singka rangami, ewa i Pue Ala moampuni komi lawi mosintuwu komi ai i Kerisitu.