Tuwu i rara nu kamabaa
5
1 Mewali, lawi napoanamo komi ni Pue Ala ai Napokaasi komi, etumo mpane sangangaa nipeulai pangkeniaka ni Pue Ala. 2 I babeiata eo-eona, sangangaa maasi kita i rangata, ewa ka Napokaasita ni Kerisitu. NakeningkamaasiNa si kita, Nasusu wotoNa rapopate mopasuru kita. Babeia etu mopakatono rara ni Pue Ala, ewa popenomba anu mawongi anu rasusu si Ia.3 Komi tau ni Pue Alamo. Etumo mpane babeiami anu merikati ba baria sintoto, ai kamasirokoa baria sintoto ria i olomi, bona ntena tau ntanina mosalai komi anu manguli sinangkana babeia anu ewa etu, ria si komi. 4 Inee mbui komi metatarasu ba mampololita lolita anu baria mobundu ba anu baria sintoto raepe nu tau. Aginamo tauli maisi kalompena si Pue Ala. 5 Nipekiri lompe-lompe, tau anu mobabei anu madaa ba anu baria sintoto ba masirokoa, tau ewa etu baria pensani mewali tau ni Kerisitu ai i Pue Ala. Babeia anu ewa etu, simbela ngkida menomba i anitu. 6 Mewali, inee komi rapakanawu nu tau ai lolita anu baria mobundu. Lawi, ope-ope aretu moparia karumpu ni Pue Ala i tau anu baria matundu si Ia. 7 Mewali, inee komi mamposintuwuka tau anu ewa etu babeiara.
8 Lawi ni banimpia, tuwu mani komi i rara nu kamadedi, agaiana ei-ei tuwumo komi i rara nu kamabaa, nakenimposintuwumi ai i Pue. Etumo mpane sangangaa tuwu komi i rara nu kamabaa. 9 Lawi lako i kamabaa nu rarami, mensuwu ope-ope babeia anu malompe, anu mamonso ai anu manoto i petotoki ni Pue Ala. 10 Nipari-pari manginsani apa anu mopakatono rara ni Pue. 11 Mewali, inee komi mobabei babeia anu baria mobundu anu rababei nu tau sira anu tuwu i rara nu kamadedi. Aginamo nipakanoto ngkimo kadaana babeia anu ewa etu. 12 Lawi babeia nu tau anu tewunikai, nauda tapololita ngkida, mepakaea. 13 Agaiana sinangka-nangkana anu nawangkasi nu kamabaa, ina tongawa naita nu tau. Mewali ope-ope anu nawangkasi nu kamabaa etu, mewali tongawa. 14 Etumo mpane ria lolita anu manguli:
“Pematamode komi anu leta.
Pengkawangumode komi lako i kamate,
ai i Kerisitu ina mowangkasi komi.”
15 Etumo mpane sangangaa nipakalompe-lompe babeiami: Inee komi ewa tau anu madoio. Babeiami sangangaa ewa babeia nu tau anu matopa. 16 Sangangaa nipopobundu lompe tempo anu ria si komi, lawi i tempo ei madaa mpuu babeia nu manusia. 17 Mewali, inee komi madoio, nipekiri lompe babeia apa anu naunde ni Pue.
18 Inee komi malangu, lawi etu anu ina mopakarugi komi. Agaiana sangangaa nakuasai komi nu Inosa Magali. 19 Poduluamode komi mampodulua dulua petoia ai dulua petoia ntanina, anu nakiraka komi nu Inosa Magali bona motoia i Pue Ala. Modulua komi matono-tono motoia i Pue lako i rarami, 20 mpane niuli liliu maisi kalompena si Pue Ala Tuamata, i rara sanga ni Yesu Kerisitu Pueta, lawi Nakiraka kita sinangkana.
Pepatudu i toposamboko
21 Mpane sangangaa mengkaiwoi komi sadua ai sadua nakenimpebilami si Kerisitu. 22 Komi towawine anu mosambokomo, sangangaa mengkoru komi i tomoanemi, ewa pengkorumi si Pue. 23 Lawi tomoanemi iamo woo nu towawinena, simbela ewa i Kerisitu mbui iamo woo nu jumaa, ai Ia saduduaNa mbui Datu Topesorema nu jumaa. Jumaa iamo kira lako i wotoNa. 24 Mewali, ewa kita ope-ope anu mengkoru si Kerisitu, ewa etu mbui towawine sangangaa mengkoru i tomoanena i pangka-pangkana.
25 Mpane komi tomoane, sangangaa nipokaasi towawinemi mangula pandiri ni Kerisitu anu mampokaasi jumaa, ai mosusu wotoNa mosuru dosa nu jumaa. 26 NakeningkamateNa mosuru dosata napelisi kita mewali tauNa saduduaNa, mpane Nabakosi kita lako i dosata ai ue periu ai NgkoraNa, 27 bona i Kerisitu mampopewali jumaaNa etu meongko ai peawa ai kamagali i lioNa, mpane kamasala baria ria mogalo saudi. 28 Mewali, simbela ewa i Kerisitu mampokaasi jumaaNa, ewa etu mbui tomoane sangangaa mampokaasi towawinena ewa pampokaasina wotona saduduana. Ima anu mampokaasi towawinena, simbela ngkida ia mampokaasi wotona saduduana. 29 Baria ria tau anu mokasisi wotona saduduana, batena nakampai ai nakadipuraka. Ewa etu mbui i Kerisitu mokadipuraka jumaa. 30 Etu tainsani, lawi kita iamo kira nu woto ni Kerisitu.
31 I rara Sura Ngkora Magali, teuki ewa ei:
“Etumo mpane sadua tomoane sangangaa mopalengi tuamana ai tinana,
ai tuwu simbela-mbela ai towawinena,
bona anu rodua aretu mewali sira sadua.” (Pewalina 2:24)
32 Lolita ei iamo lolita anu mandala lempona. Agaiana tunggaiaku ei, kupololita posintuwu ni Kerisitu ai jumaa. 33 Agaiana nauda ewa etu, batena ria mbui lempona si komi: Ope-ope tomoane sangangaa mampokaasi towawinena ewa pampokaasina wotona saduduana, mpane towawine mbui sangangaa mobila tomoanena.