Pepatudu i anakoi ai i tomana
6
1 Komi anakoi anu meula si Kerisitu, nipeulaimode parenta nu tomanami, lawi etu anu sintoto nibabei. 2 I rara Ngkora Magali ria parenta anu teuki ewa ei, “Bila tinamu ai tuamamu.” Lako i parenta sampulu, etumo parenta anu mpolinguruna anu raula ai dandi 3 iamo, “bona malompe katuwumu ai mandoe tinuwumu i rara dunia ei.”4 Mpane komi anu tuama, inee nipakadaa rara nu anami. Nikadipuraka sira, nipatuduka sira pepatudu anu lako si Pue.
Pepatudu i batua ai i tua
5 Komi anu rapobatua, nipeulai parenta nu tuami i rara dunia ei. Nibila ai matundu komi si sira lako i kabula nu rarami. Nibabei etu ewa kamatundumi si Kerisitu. 6 Babeiami etu, inee nibabei wule i tempomi naita nu tuami ngkida bona ratoia komi nu singka manusiami. Mobago komi ewa tudua ni Kerisitu anu mangula peundea ni Pue Ala lako i kabuke-buke nu rarami. 7 Inee komi mobago nakeningka rapasomi ngkida, agaiana mobago komi i rara katono nu rarami. Nipobago bagomi ewa pampobagomi bago ni Pue, baria wule i manusia. 8 Niinsani mpuu: ope-ope tau anu mobabei anu malompe batena mansumba sarora lako si Pue, malompe batua awetu mbui anu baria batua katuwura.
9 Mpane komi tua, sangangaa nibabei mbui ewa etu i batuami. Inee sira nipakaeka. Agaiana inee malipa rarami: komi ai batuami sadua ngkida Puemi, iamo i Pue anu i suruga, anu baria mampopontani tau.
Jumaa rapandiri ewa surudado anu raparewai ai parewa pombeala
10 Kasopoana poka-poka, sangangaa maroso komi i karoso anu nisumba lako i kuasa ni Pue, lawi mosintuwu komi ai Ia. 11 Sangangaa nipake sinangka parewa pombeala anu napatimamaka komi ni Pue Ala, bona maroso peongkomi moewa pekikirai Datu nu Seta. 12 Lawi i pombealata ei, baria kita moewa manusia agaiana moewada kita sinangka kamakuasa nu seta anu mokuasai kamadedi i dunia ei. Moewa kita sinangka seta ai kuasa anu madaa anu mokuasai laerawa. 13 Etumo mpane, sangangaa nipake sinangka parewa pombeala anu lako si Pue Ala, bona ane dongka eo pombeala, ina nibuku moewa perumpa nu iwalimi duduuna i kasopoana, ai batena maroso liliu peongkomi. 14 Mewali nipakaroso liliumode peongkomi, nipopobundu katetidami si Pue Ala ewa pampou i pekomi, ai kabula nu rarami mewali ewa badu besi i wotomi. 15 Sangangaa matimama komi mopadongka Bambari Malompe anu mopasintuwu tau ai i Pue Ala, lawi etu anu mewali ewa kandupami. 16 Mpane i sinangka-nangkana, sangangaa maroso pepotuumi si Pue Ala. Pepotuumi etu nipolaba liliu. Nakenimpepotuumi, pensani komi mampopate sinangka mata pana anu moapu lako i Datu nu Seta, 17 mpane nidokomode pesorema lako si Pue Ala. Ka Nasoremata etu, ewa songko besi anu mopakaroso komi bona tetida komi. Mpane nidokomode Ngkora ni Pue Ala anu ewa guma anu nakiraka kita nu Inosa Magali.
18 Ai i rara pombealami etu, mekakae komi merade tulungi si Pue Ala. I sinangka-nangkana, mekakae komi mangula penini nu Inosa Magali. I rara nu pekakaemi etu, sangangaa mainga-inga komi ai sangangaa nipekakaeka liliu sira ope-ope tau ni Pue Ala. 19 Mpane nipekakaeka mbui aku, bona i tempoku mololita, i Pue Ala mokiraka aku lolita anu manoto, bona baria aku maeka mopadongka Bambari Malompe anu ni banimpia baria mani rainsani nu tau sira. 20 Nakeningka Bambari Malompe etumo, i Pue Yesu moongko aku mewali suroNa, bona mobambari aku Bambari Malompe, ai ei-ei tongoku ratarunggu. Mewali nipekakaeka kowo aku bona pebai aku mopadongka Bambari Malompe mangula kasintotoana.
Tabea kasopoana
21 Mewali, bona niinsani adiwa katuwuku ai pobagoku, kutudu pokata i Tikikus lau mosondaki komi mpane mangulika komi sinangka apa anu mewali i se ei. I Tikikus etu iamo pokata anu tapokaasi, ai anu mampopolumako liliu bago ni Pue Ala. 22 Etumo mpane kutudu lau si komi mangulika komi kaadiwaki i se ei, bona mopakalene rarami.