Sangangaa mombetulungi komi sadua ai sadua
6
1 Poka-poka, komi anu mampeulai peundea nu Inosa Magali, ane mangita komi rangami sampepepotuumi mobabei sala, sangangaa ninini kowo sira mesola i dala anu manoto. Ninini sira i rara nu kamaalusumi, agaiana mainga-inga komi bona ntena ante komi mbui mobabei dosa. 2 Sangangaa mombetulungi komi sadua ai sadua, ai ane nibabei etu, lempona mampeulaimo komi parenta ni Kerisitu. 3 Ane ria tau anu moimba katuwuna melumbu lako i singka manusiana, molentano baria, simbela ngkida mampodongkoka ia wotona saduduana. 4 Aginamo ope-ope tau moparesa babeiana saduduana, ba malompe ba baria. Ane malompe, pensani napokatono, ai ineemo napopombetimba ai babeia nu tau ntanina. 5 Lawi ope-ope tau sangangaa mosuru babeiana saduduana.6 Tau anu modoko patudu ni Kerisitu, sangangaa mampokiraka mbui ia ba apa anu malompe i guruna etu.
7 Mainga-inga komi! I Pue Ala baria pensani rapodongkoka! Apa anu tatuda, etu mbui anu tapupu wuana. 8 Lawi ima-ima ngkida anu mobabei liliu peundeana saduduana, ina mansumba ia pesurungi lako si Pue Ala. Ai ima-ima ngkida anu mampeulai liliu peundea nu Inosa Magali, ina mansumba katuwu malompe anu baria mokasopoa, lako i Inosa Magali. 9 Etumo mpane, inee kita mengkangkaroo mobabei apa anu malompe, lawi ane mobabei liliu kita apa anu malompe, batena ina tapupu wuana i tempo anu tepakanotomo. 10 Mewali, lako ria mani tempo anu rakiraka kita, sangangaa mobabei kita apa anu malompe i ope-ope tau, pelumbunamo i pokata sampepepotuuta.
Patudu anu kasopoana
11 Bona niinsani, kasopoa nu sura ei, akumo anu mouki, kupakabengga hurupuna. 12 Mainga-inga komi i tau anu mepakanawu, lawi tau aretu raundera bona melumbu karatoiara lako i tau ntanina. Rapari-parira komi ratindi mangula Atura ni Musa. Agaiana etu rababeira lawi maeka sira napopesiasi nu singka toYahudira, nakenimpepotuuramo si Kerisitu anu rapaku i kau anu rapopombesape. 13 Kamonsona tau anu mampeulai ada petindi etu, baria mbui sira mampeulai Atura ni Musa. Kamonsona tunggaiara mopari-pari komi ratindi, bona rapomabose sira nakenimpangulami atura aretu. 14 Agaiana aku, baria ria anu kupomabose i rara nu katuwuku i dunia ei, ngkalinada mampomabose aku i Pue Yesu Kerisitu anu mamatemo i kau anu rapopombesape. Lawi nakeningkamateNa, sinangka anu rapomabose nu tau i dunia ei, baria ria bunduna si aku. Awetu mbui apa anu kupomabose, baria ria bunduna i tau anu mampeulai peundea nu dunia ei. 15 Ratindi ba baria, baria ria posisalana. Anu mobundu iamo katuwu anu mabou lako si Pue Ala. 16 Tau anu tuwu mangula patudu etu, kupekakaeka sira bona i Pue Ala mokiraka sira kalompe nu katuwu ai pepokaasi ni Pue Ala.
17 Kasopoana, kuperade bona bariamo ria anu mopakasusa aku, lawi lari nu bela i wotoku eia mopatongawa ka akuna suro ni Pue Yesu.
18 Poka-pokaku! Kuperade bona Pueta i Yesu Kerisitu, mowati komi ope-ope. Amin.