I Kerisitu mopawia kita lako i Atura ni Musa
5
1 I Kerisitu mopawiamo kita lako i Atura ni Musa, mewali monso-monso tepawia mpuumo kita. Etumo mpane sangangaa tapakatetida rarata. Inee kita rapobatua mpesola.2 Aku i Paulu, nipairara anu kuulika komi ei: ane mampopetindi komi bona mewali manoto i petotoki ni Pue Ala, i Kerisitu bariamo mobundu si komi. 3 Ai kuulika mbui komi: ima ngkida anu mampopetindi, sangangaa mampeulai mbui sira ope-ope parenta i rara Atura ni Musa. 4 Mewali, ane mampeulai komi Atura ni Musa bona raimba manoto komi i petotoki ni Pue Ala, nibotuki posintuwumi ai Kerisitu. Ane ewa etu ka nibabeina, bariamo komi tuwu i rara kabula rara ni Pue Ala. 5 Agaiana kami poka, nakenimpenini nu Inosa Magali mesarumaka kami si Pue Ala, anu mopakanoto kami i petotokiNa nakenimpepotuuki si Yesu Kerisitu. Ai batena etu ngkida anu kisarumaka. 6 Lawi ane mosintuwumo kita ai i Yesu Kerisitu, baria ria posisalana tau anu ratindi ba baria ratindi; agaiana anu melumbu lako i se etu, iamo mepotuu kita si Yesu Kerisitu, ai pepotuuta etu tongawa i kamaasita i singka manusiata.
7 Ni banimpia, nipeulai lompemo Bambari Malompe. Agaiana ei-ei, imada anu mosomboki komi mpane bariamo nipeulai patudu anu mamonso? 8 Manotomo poka, patudura etu baria lako si Pue Ala anu morondemo kita mewali tauNa. 9 Patudura anu mepakaguneo etu ewa ragi,a anu saudi mampopembongke tampu mewali maisi. 10 Nauda ewa etu, nakenimposintuwumimo ai i Pue Yesu Kerisitu, batena ngkida kupotuu komi kabariami mampeulai patudu anu mepakaguneo etu. Ai manoto mbui si aku, ima ngkida anu mopakaguneo komi ai patudura, batena nasuku sira ni Pue Ala.
11 Poka-poka, ria tau anu manguli, mepatudu aku bona mangula kita ada petindi. Lolita etu baria mamonso! Ane awetu anu kupatuduka i tau, kebariamo aku rapopesiasi nu toYahudi. Agaiana anu kupatuduka ope-ope tau iamo, kamate ni Kerisitu i kau anu rapopombesape. Etumo anu moparia posisala i toYahudi. 12 Aginamo tau anu mopakaguneo pepotuumi aretu, inee wule ratindi, agaiana tompoki asa katuwuara!*
Sangangaa mampeulai kita penini nu Inosa Magali
13 Poka-poka, i Pue Ala morondemo komi bona tepawia komi lako i Atura ni Musa. Agaiana inee nipekiri katepawiami lako i Atura ni Musa etu, pensani komi mobabei apa ngkida peundea nu rarami. Aginada mombepokaasi ai mombetulungi komi sadua ai sadua. 14 Lawi ope-ope isi nu Sura Atura ni Musa, tepasambua asamo i rara Ngkora ni Pue Ala anu manguli, “Nipokaasi singka manusiami ewa pampokaasimi wotomi saduduami.”* 15 Agaiana mainga-inga komi, inee komi mobungka-bungka ai mombepakoi mporara, mombesingkalompe komi bona ntena komi mombepakasurewu.
16 Tunggaiaku ewa ei: sangangaa nanini kita nu Inosa Magali, bona ntena kita mampeulai peundea nu rarata anu madaa. 17 Lawi peundea nu rarata anu madaa, moewa peundea nu Inosa Magali. Ane tapeulai peundea nu rarata anu madaa, baria tababei apa anu malompe mangula peundea nu Inosa Magali; ai ane tapeulai peundea nu Inosa Magali, baria tababei apa anu madaa. 18 Mewali, ane naninimo kita nu Inosa Magali, bariamo kita nakuasai nu Atura ni Musa.
19 Peundea rara nu tau anu madaa tongawa i babeiara: mobabei sira babeia anu merikati, babeia anu keraki, babeia anu baria sintoto, 20 menomba sira i anitu ai mopake sira kuasa lako i seta, mokasisi sira rangara, mobungka-bungka sira, mosiri sira, maliga sira marumpu ai mampekiri ngkida sira wotora saduduara, mosisisala sira ai mogaa-gaa sira, 21 masina sira, malangu-langu sira, mosusa-susa sira, ai mampopengaa mani kadaa anu ntanina. Mewali, ope-ope aretu, kupopaingaaka komi ewa anu kuulikamo komi ni banimpia: ima ngkida anu ewa etu babeiara, baria sira tepesua tau ni Pue Ala i peparentaaNa.
22 Agaiana ane tau anu nanini nu Inosa Magali, ina tongawa wuana i rara pangkeniakara: ina mombepokaasi sira, matono-tono sira, malene rarara, sabara sira, raundera mombetulungi, malompe babeiara; pensani rapotuu i sinangka-nangkana, 23 mengkaiwoi sira, ai morempeki sira peundea nu rarara anu madaa. Baria mpuu ria atura agama anu mosomboki babeia anu ewa aretu. 24 Tau anu mewalimo tau ni Yesu Kerisitu, bariamo sira nakuasai peundea nu rarara anu madaa, lawi peundea nu rarara anu madaa etu, rapopateramo i kau anu rapopombesape simbela-mbela ai i Kerisitu. 25 Lawi nakirakamo kita nu Inosa Magali katuwu anu mabou, mewali katuwuta sangangaa nakuasai nu Inosa Magali. 26 Inee kita mampemabose, inee kita mombepakadua mporara ba mombekasinai.