4
1 Mewali poka, ane ria sadua anakoi anu kokoi mani anu ina motumpui sosora nu tuamana, agaiana nakeningkakokoina mani, baria mani ia pensani motumpui sosora etu. Ia rapandiri ewa sadua batua anu baria ria kuasana motumpui sosora nu tuana, 2 lawi tau ntanina manida anu mokadipuraka ia ai anu mokadipuraka sosora anu ina natumpui etu, duduuna dongka tempona anu napakanotomo nu tuamana. 3 Ewa etu mbui kita poka: lako baria mani kita manginsani peundea ni Pue Ala, kita ewa anakoi etu, lawi nakuasai mani kita sinangka kuasa nu dunia ei. 4 Agaiana i tempo anu Napakanotomo, i Pue Ala motudumo AnaNa mai i dunia. AnaNa etu napoanaka sadua anantowawine, ai tuwu Ia ewa toYahudi anu mengkoru i Atura ni Musa. 5 I Pue Ala motudu AnaNa etu, mai i dunia bona mopawia kita lako i Atura ni Musa, bona pensani kita mewali anaNa.6 Mewali, nakeningka napoanamo kita ni Pue Ala, Natudumo Inosa nu AnaNa meari i rarata. Etumo mpane pensani kita moronde i Pue Ala, “Uma!” 7 Mewali ei-ei, bariamo komi batua, agaiana Napoanamo komi ni Pue Ala, ai ane Napoanamo komi ni Pue Ala, batena mansumba komi pewati anu Napatimamakamo komi.
I Paulu mampondanga rara toGalatia
8 Ni banimpia lako baria mani komi manginsani i Pue Ala, komi batua nu anitu mani anu niimba puemi, molentano baria ia Pue. 9 Agaiana ei-ei, manginsanimo komi i Pue Ala, agaiana kamonsona i Pue Alada anu ilodo manginsani komi! Mewali, mangkiada mpane nisusu mpesola wotomi nakuasai sinangka kuasa nu dunia ei, anu malede ai anu baria ria bunduna etu? 10 Mampomabose komi eo, wula ai pae anu tepakanotomo i rara ada nu toYahudi. 11 Anu kupondanga rara, baria ria bunduna kawoweku mopadongka Bambari Malompe si komi.
I Paulu merade bona toGalatia mampeulai babeiana
12 Pokaku toGalatia! Aku toYahudi, kupawiamo pangulaku ada nu toYahudi bona mewali aku ewa komi anu baria toYahudi. Mewali kuperade mpii si komi, bona nipeulai babeiaku etu. Ni banimpia, malompe mpii komi si aku. 13 Manoto nikaendo mani, mpolinguruna popadongkaku Bambari Malompe si komi, iamo ni tempoku sangangaa meari i kotami nakeningkamaduaku. 14 Nauda maruminsi kamaduaku anu pensani mopakapari komi, agaiana baria komi mopakoi aku ba mampokarika aku. Agaiana nidoko lompeda aku, ewa podokomi sadua malaeka ni Pue Ala ba ewa podokomi i Yesu Kerisitu. 15 I tempo etu, matono mpuu rarami. Agaiana ei-ei, mangkiada mpane tebalikimo rarami? Ni banimpia, mogaloda matami saduduami, ane kepensani nidungkiki mpane nikiraka aku, baria ina nipokabosi. 16 Ei-ei, ba niimbada aku iwalimi lawi kupadongkaka komi apa anu mamonso?
17 Ria sira tau anu mampenoka mpuu mangala rarami. Agaiana tunggaiara baria malompe, lawi rapenokara mogaaki komi lako si aku bona meula komi si sira lako i rarami mpii. 18 Baria komi kusalai ane nipari-pari liliu mobabei apa anu malompe, asala babeiami etu baria wule i tempoku ria i olomi. 19 Poka-poka, kuimba mpuu komi anaku! Ei-ei mandanga raraku mampepekiri komi. Kandanga nu raraku ei, ewa kaduana naepe nu sadua towawine anu ina moanamo. Ai ina mandanga liliu raraku, ane baria mani tongawa pangkeniaka ni Kerisitu i babeiami. 20 Ei-ei kupenoka mpuu simbela-mbela ai komi bona pensani aku mololita ai kamaalusu. Lawi bariamo kuinsani apa anu ina kubabeika komi.
I Paulu mampopewali pandiri tunturaka ni Hagar ai i Sara
21 Pokaku, komi anu mampenoka mani mangula Atura ni Musa, baria manipae nibasami apa anu teuki i rara Sura Atura ni Musa? 22 I se etu teuki, i Burahima rodua anana. Anana anu sadua napoanaka nu sadua batua katuwuna. Ai anana anu sadua napoanaka nu sadua anu baria batua. 23 Anakoi anu napoanaka nu towawine anu batua katuwuna, rapoanaka mangula peundea nu manusia. Agaiana anakoi anu napoanaka nu towawine anu baria batua, rapoanaka mopabukei dandi ni Pue Ala si Burahima. 24 Tunturakana etu, mewali ngkora pandiri si kita. Towawine anu rodua aretu lempona rompangka dandi anu nakira ni Pue Ala i manusia: dandi anu sampangka tepalau i atura-atura anu nadoko ni Musa i bulu Sinai. Ope-ope tau anu mampeulai Atura ni Musa, katuwura ewa katuwu nu batua lawi mengkoru sira i Atura ni Musa. Tau aretu simbela ewa i Hagar anu pemuleana rapopewali batua. 25 Mewali i Hagar, pensani rapasimbela ai Bulu Sinai anu i tana Arab, ai rapasimbela mbui ewa kota Yerusale anu ria i dunia ei, anu tumpu nu kotana napobatua sira nu Atura ni Musa. 26 Agaiana i Sara iamo towawine ni Burahima anu baria batua, ewa kota Yerusale anu i suruga. I Sara etumo anu tapotina, nakeningkabariatamo matundu i Atura ni Musa. 27 Etu mewali mangula apa anu teuki i rara nu Sura Ngkora Magali anu manguli:
“Matono iko towawine anu malalo,
anu baria sambela moana!
Matono ai mantawa iko,
anu baria sambela mantodisa adiwa kaduana moana!
Lawi anu napalengi nu tomoanena,
ina melumbu kaworina pemuleana
mpane lako i towawine anu ria mani tomoanena.” (Yesaya 54:1)
28 Poka-poka! Napoanamo komi ni Pue Ala, lawi rapoanaka komi sintoto ai dandi ni Pue Ala; komi simbelamo ewa i Isaki. 29 I tempo etu, ana ni Burahima anu rapoanaka mangula peundea nu manusia, mampopesiasi ana ni Burahima anu rapoanaka mangula kuasa nu Inosa Magali. Ewa etu mbui anu mewali i tempo ei-ei. 30 Agaiana ria anu teuki i rara Sura Ngkora Magali, ewa ei, “Liwu towawine anu batua katuwuna simbela-mbela ai anana! Lawi anakoi anu batua etu, baria pensani modoko sosora nu tuamana.”* 31 Mewali, kita ei poka, baria kita ewa ana nu towawine anu batua katuwuna. Kita ei ewa ana nu towawine anu baria batua.