Mansumbamo kita Inosa Magali lako i pepotuuta si Pue Yesu
3
1 Poka-poka toGalatia, madoio mpuu komi! Imada anu mopakanawu komi duduuna bariamo nipeulai patudu anu mamonso? Molentano manoto mpuu patuduku ni banimpia si komi, anu mopakanotoka komi tunggaia ni Yesu Kerisitu mamate i kau anu rapopombesape. 2 Nikaendomode apa anu mewali si komi ni banimpia! Modoko Inosa Magalipae komi nakenimpangulami Atura ni Musa? Baria! Agaiana modoko komi Inosa Magali nakeningka niepena Bambari Malompe mpane nipotuumo i Pue Yesu. 3 Mewali, adiwada mpane madoio gaga komi? Mpolinguruna i ka nipotuuna i Pue Yesu, nisumbamo katuwu anu mabou lako i kuasa nu Inosa Magali. Agaiana ei-ei, mangkiada pampekirimi pensani komi mampopewali katuwimi baria ria kamakurana duduuna i kasopoana, ai rosomi saduduami. 4 Mewali nikaendo, i pantodisami nakenimpepotuumi si Kerisitu inee nipopewali baria mobundu, ai popalengimi pepotuumi. 5 Nakirakamo komi ni Pue Ala Inosa Magali ai Nababeimo tanda kuasa i olomi. Ba Nababei etu nakenimpangulami Atura ni Musa? Baria. Nababei ewa etu, lawi mangepemo komi Bambari Malompe ai mepotuumo komi si Pue Yesu.6 Ewa anu teuki i rara Sura Ngkora Magali kono si Burahima, ewa ei:
“I Burahima mepotuu si Pue Ala,
etumo mpane naimba ni Pue Ala manoto i petotokiNa.” (Pewalina 15:6)
7 Mewali, tainsanimo poka: ima ngkida anu mepotuu si Pue Ala, teimba sira pemulea ni Burahima. 8 Mepuu ni banimpia, teukimo i rara Ngkora Magali tunggaia ni Pue Ala mopakanoto tau anu baria sira toYahudi nakenimpepotuura. Etumo mpane, bambari anu malompe etu, napadongka ni Pue Ala si Burahima, ewa anu teuki i rara Sura Ngkora Magali, anu manguli, “Mampoliungi iko ina Kuwati ope-ope tau i dunia.”* 9 Mewali, i Burahima nawati ni Pue Ala nakenimpepotuuna, ewa etu mbui ope-ope tau anu mepotuu si Pue Ala batena Nawati simbela-mbela ai i Burahima.
10 Tainsanimo: Ane ria tau anu napenoka mopakanoto wotona i petotoki ni Pue Ala nakenimpangulana Atura ni Musa, tuwu ia i rara pesuku ni Pue Ala. Lawi i rara Sura Ngkora Magali, teuki ewa ei, “Ima-ima anu baria tetida mampeulai sinangka parenta anu teuki i rara Atura ni Musa, batena nagane ni Pue Ala.”* 11 Mewali, manotomo si kita kabariana ria sadua anu mewali manoto i petotoki ni Pue Ala nakenimpeulana i Atura ni Musa. Lawi manoto i rara Sura Ngkora Magali anu manguli ewa ei, “Tau anu manoto i petotoki ni Pue Ala ina mansumba katuwu nakenimpepotuura.”* 12 Agaiana Atura ni Musa baria mepuu lako i pepotuu. Lawi ria teuki i rara Sura Ngkora Magali, ewa ei, “Ima anu mampeulai Atura ni Musa, ina tuwu sira lako i Atura etu.”* 13 Agaiana, i Kerisitu mopawiamo kita lako i pesuku nakeningkabariana tabuku mampeulai sinangka Atura ni Musa. Etu Nababei ai mopatumbeika wotoNa rasuku nakeningkamadosata. Lawi teuki i rara Sura Ngkora Magali, ewa ei, “Ane ria tau anu ratoe i kau anu rapopombesape bona rapopate, manoto tau etu nagane ni Pue Ala.” 14 Tunggaia ni Yesu mobabei ewa etu, bona tau anu baria sira toYahudi pensani mbui sira mansumba pewati anu nadandi ni Pue Ala si Burahima. Etumo mpane, nakenimpepotuuta si Yesu Kerisitu, pensani kita mansumba Inosa Magali anu nadandimo ni Pue Ala,
Dandi ni Pue Ala si Burahima ai i pemuleana baria tebaliki
15 Poka-poka, kuala pandiri lako i katuwuta i eo-eona: Ane ria tau anu mobabei sura podandi, mpane ratekeiramo. Podandira etu bariamo pensani rabalikira. 16 Ewa etu mbui ai podandi ni Pue Ala. I Pue Ala moparia dandiNa si Burahima ai i pemuleana. (Baria Napololita “i pemulea ni Burahima anu mawori”. Agaiana anu Napololita “i pemuleamu”, lawi anu natunggai pololita ni Pue Ala si Burahima iamo pemuleana anu sadua ngkida iamo i Kerisitu.) 17 Mewali, eimo lempona ngkora pandiriku ni mpongone: mpolinguruna i Pue Ala modandimo si Burahima. Iba atu tolu mpulu mpae lako ni se etu, mokiraka mbui Ia aturaNa si Musa. Agaiana atura etu baria mpuu mobaliki dandi ni Pue Ala anu Napariamo ni banimpia si Burahima. DandiNa etu batena mewali. 18 Ane rapana pemulea ni Burahima sangangaa mampeulai Atura ni Musa bona mansumba apa anu nadandi ni Pue Ala, etu baria rasumbara lako i dandi ni Pue Ala. Agaiana i Burahima mansumba pewati etu batena lako i dandi ni Pue Ala nakeningkabula nu raraNa.
19 Ane ewa etuda, apa tunggaiana Atura ni Musa nakira ni Pue Ala? Tunggaiana, bona mopakanoto kamadosa nu manusia, nakeningkabariana tetida manusia i peundea ni Pue Ala. Atura ni Musa etu, wule rapopolumako dongka i karapoanakana pemulea ni Burahima, anu Natunggai i rara dandi ni Pue Ala ni banimpia, iamo i Kerisitu. I Pue Ala mamposawaaka malaekaNa mopadongka aturaNa si Musa, ai mampoliungi i Musa tepadongka aturaNa etu i manusia. 20 Mewali, kadongkana atura ni Pue Ala i manusia, mampoliungi i Musa. Agaiana dandi ni Pue Ala si Burahima, baria mampoliungi ba ima. I Pue Ala saduduaNa anu mopadongka dandiNa etu.
Atura ni Musa monini kita duduuta mepotuu si Kerisitu
21 Kaliliuana poka, Atura ni Musa baria moewa tunggaia nu dandi ni Pue Ala. Ane rapana, pensani tapeulai atura etu bona mansumba kita katuwu malompe, atura etumo anu mewali dalata mopakanoto wotota i petotoki ni Pue Ala. 22 Agaiana i rara Sura Ngkora Magali, ope-ope tau manoto tetaka ai kuasa dosa. Mewali, baria ria dala ntanina anu mopakanoto kita i petotokiNa, batena ngkida pepotuuta si Yesu Kerisitu. Katuwu malompe anu nadandi ni Pue Ala, batena Nakiraka si ima ngkida anu mepotuu si Yesu Kerisitu.
23 Lako baria mani tainsani dala mepotuu si Yesu, mengkoru kita i Atura ni Musa. I tempo etu, kita ewa tau anu ratarunggu ai nakampai nu atura etu, duduuna i Pue Ala mopakanoto adiwa dalata mepotuu si Pue Yesu. 24 Atura ni Musa etu, ewa topokampai kita duduuna i Kerisitu mai i dunia, ai nakenimpepotuuta si Kerisitu, mampopewali kita manoto i petotoki ni Pue Ala. 25 Ei-ei mepotuumo kita si Kerisitu, etumo mpane bariamo kita nakampai nu Atura ni Musa etu.
26 Mewali ei-ei, nakenimpepotuumi si Yesu Kerisitu, etumo mpane napoanamo komi ni Pue Ala. 27 Lawi ope-ope komi nakeningka rariumimo, mosintuwumo komi ai i Kerisitu. Etumo mpane pangkeniakami ewa pangkeniakaNa. 28 I Pue Ala baria mampopontani tau. Mewali bariamo rapopontani ba toYahudi ba baria toYahudi, malompe batua ba anu baria batua, malompe tomoane ba towawine, lawi mosintuwumo komi ai i Yesu Kerisitu. 29 Nakeningka tau ni Kerisitumo komi, Naimbamo komi pemulea ni Burahima, mewali batena mansumba mbui komi apa anu nadandi ni Pue Ala si Burahima.