Suro ni Pue Yesu i Yerusale mopangaku kamonsona Bambari Malompe
2
1 Sampulu iba mpae roo ni se etu, laumo aku i Yerusale simbela-mbela ai i Baranaba, ai i Titu kukeni mbui. 2 Nakenimpampatongawa ni Pue Ala si aku, lau aku i Yerusale. Kadongkaku i Yerusale, kupomberumpakamo sira tadulako nu tau anu mepotuu si Kerisitu i se etu, mogombo kami ai sira. Kupadongkakamo sira, kono i pobambariku Bambari Malompe i tau anu baria sira toYahudi. Lawi kupokaeka, bago anu roomo kupobago ai anu tongona mani kupobago baria ria bunduna. 3 Kabotua nu pogomboki patuduku etu radokora. Ai baria wule etu, i Titu anu kuporanga, ia sadua toYunani, baria ia rapari-parira bona ratindi mangula Atura ni Musa, 4 nauda ria tau ntanina anu mopari-pari ia bona ratindi. Sira aretu iamo tau anu wule i ngudura ngkida manguli topepotuu si Pue Yesu. Mesua ngkandii-ndii sira i olota, lawi tunggaiara bona ope-ope topepotuu si Pue Yesu sangangaa mampeulai sira Atura ni Musa. Agaiana kita, bariamo kita paraluu mampeulai Atura etu, bona manoto kita i petotoki ni Pue Ala. Tepawiamo kita lako i Atura ni Musa nakenimposintuwuta ai i Yesu Kerisitu. 5 Etumo mpane, mogalo saudi bariamo kipeulai patudura anu masala etu, bona Bambari Malompe anu mamonso batena ria si komi.6 Mewali, tadulako nu topepotuu si Kerisitu i Yerusale anu mawane lantira, baria sira motambai ba apa ngkida i patuduku. (Mawane lantira ba baria, simbela ngkida kita ope-ope, lawi i Pue Ala baria mampopontani tau.) 7 Agaiana rapangakurada ka akuna anu napotuu ni Pue Ala mobambari Bambari Malompe, i tau anu baria sira toYahudi, ewa i Peturu napotuu ni Pue Ala mangkeni Bambari Malompe i toYahudi. 8 Lawi i Pue Ala mokiraka karoso si Peturu bona mewali suro ni Pue Yesu i toYahudi. Ewa etu mbui aku, i Pue Ala mokiraka aku karoso bona mewali suroNa i tau anu baria sira toYahudi. 9 Mewali, i Yakobu, i Peturu ai i Yohane, anu rauli tadulako nu ope-ope jumaa i Yerusale, manguli sira, “Mamonso mpuu, i Paulu naronde ni Pue Yesu mewali suroNa.” Mewali aku ai i Baranaba radoko lompe kami. Mombetabemo kami mewali tanda kasintuwuki. Ni tempo etu, sampepekirimo kami bona sira anu mobambari Bambari Malompe i toYahudi, ai kami anu mobambari Bambari Malompe i tau anu baria toYahudi. 10 Sampangka ngkida pamperadera si kami bona ntena malipa raraki motulungi tau anu mesiasi katuwura, ai kamonsona etumo anu kuunde mpii kubabei.
I Paulu mampololita pokambarokana i Peturu
11 Sambela tempo, kadongka ni Peturu i kota Antiokia, kukambaroka ia, lawi masala mpuu babeiana ni tempo etu. 12 Mpolinguruna baria ia mampopontani toYahudi ai tau anu baria sira toYahudi, lawi paka mangkoni ia simbela-mbela ai pokana sampepepotuu anu baria sira toYahudi. Agaiana i kadongkara basangkia toYahudi anu natudu ni Yakobu lako i Yerusale, i Peturu mokaraosi sira pokana sampepepotuu anu baria toYahudi. Kasopoana, bariamo ia madota mangkoni simbela-mbela ai sira, lawi maeka ia rasalai nu toYahudi anu lako i Yerusale mai, anu mampenoka bona ope-ope tau ratindi. 13 Ai ria mbui sira toYahudi pokana sampepepotuu anu mangula sira babeia ni Peturu anu mengkalompe etu, duduuna i Baranaba meula mbui si sira. 14 Awetu kuita kabariana sintoto babeiara ai patudu Bambari Malompe, etumo mpane kukambarokamo i Peturu i lio nu tau wori anu terusu sira i se etu, kuulika, “Iko, toYahudi, tuwumo iko ewa tau anu baria toYahudi. Ei-ei bariamo paraluu nupeulai ada nu toYahudi. Mewali, mangkiada mpane nupenoka mopari-pari tau anu mepotuu si Pue Yesu anu baria sira toYahudi bona mampeulai sira ada nu toYahudi?”
Kita mewali manoto i petotoki ni Pue Ala nakenimpepotuuta si Yesu
15 Lako i karapoanakaakimo, toYahudimo kami. Paka kipololitamo i tau anu baria toYahudi “tau anu madosa sira” lawi baria sira mampeulai Atura ni Musa. 16 Nauda ewa etu, kiinsani tau mewali manoto i petotoki ni i Pue Ala, wule nakenimpepotuuna si Yesu Kerisitu ngkida, baria nakenimpangulana Atura ni Musa. Kami saduduaki mepotuu si Yesu Kerisitu, bona manoto kami i petotoki ni i Pue Ala, baria nakenimpangulaki Atura ni Musa. Lawi baria ria sadua tau anu mewali manoto i petotoki ni Pue Ala, nakenimpangulana Atura ni Musa.
17 Mewali, kipari-pari bona manoto i petotoki ni Pue Ala mampoliungi posintuwuki ai i Kerisitu. Agaiana, ria sira toYahudi anu mosalai patuduki, raulira, “Ane mepotuu komi si Kerisitu agaiana baria komi mampeulai Atura ni Musa, madosa komi.” Baria mamonso lolita etu! 18 Agaiana ane rapana, kupawiamo peulaku i Atura ni Musa ai roo awetu kuula mpesola Atura etu, lawi kupenoka mewali manoto i petotoki ni Pue Ala, madosa mpuu aku. 19 Lawi lako i pangulaku Atura ni Musa, kuinsani kamasalaku ai sintoto mpuu aku rasuku mamate. Etumo mpane kupawiamo peulaku i Atura ni Musa, bona mampeulai aku peundea ni Pue Ala. Babeiaku etu, simbelamo ewa mamatemo aku simbela-mbela ai i Kerisitu, lawi mamatemo Ia mopasuru aku. 20 Mewali ei-ei, katuwuku bariamo aku saduduaku anu mopatuwu, agaiana i Kerisitumo anu tuwu i raraku anu mopatuwu katuwuku. Etumo mpane, tongoku mani tuwu i dunia ei, batena mepotuu aku i Ana ni Pue Ala anu mampokakaia aku, ai anu mosusu wotoNa rapopate, bona mewali aku manoto i petotoki ni Pue Ala. 21 Etumo mpane, baria kuunde mosapuaka kabula nu raraNa etu. Lawi, ane pensani kita mewali manoto i petotokiNa nakenimpeulata i Atura ni Musa, kamate ni Kerisitu baria ria bunduna.