Sura ni Suro Paulu anu napakatuka jumaa i tana
Galatia
1
1-3 Pokaku i ope-ope jumaa anu ria i Galatia, aku i Paulu, suro ni Pue Yesu Kerisitu ai ope-ope poka sampepepotuu anu simbela-mbela ai aku, mopadongka kami tabeaki! Kisarumaka i Pue Ala Tuamata ai i Pue Yesu Kerisitu ina mowati komi, ai mokiraka komi kalompe nu katuwu. Mewali aku suro ni Pue Yesu Kerisitu, baria nakeningka naongkona aku nu manusia ba natudu nu manusia, agaiana naongko aku ai natudu ni Yesu Kerisitu ai i Pue Ala Tuamata anu mopatuwu mpesola i Yesu Kerisitu lako i kamate. 4 I Yesu Kerisitu mampeulaimo peundea ni Pue Ala Tuamata, mewali mosusumo Ia wotoNa rapopate mosuru dosata, bona tepawia kita lako i kuasa dunia anu madaa ei. 5 Tetoiamo i Pue Ala duduuna i kasae-saeana. Amin.I Paulu mokambaroka toGalatia lawi bariamo sira mangula Bambari Malompe
6 Kupotingkara mpuu poka! Baria mani komi masae naronde ni Pue Ala nakeningkabula rara ni Kerisitu, bona mepotuu komi i Bambari Malompe. Agaiana ei-ei, bariamo komi mengkoru si Pue Ala, mangulada komi patudu ntanina anu nauli nu tau “bambari malompe”, 7 molentano baria mamonso. Wule nakeningkariana sira tau anu dongka i olomi bona mopakawuli komi ai “bambari malompe” anu baria mamonso, lawi Bambari Malompe kono si Kerisitu rabalikiramo. 8 Bona niinsani, mogaloda kami ba malaeka lako i suruga, ane mangkeni kami “bambari malompe” anu baria simbela ai Bambari Malompe kono si Kerisitu anu kipadongkakamo komi, batena nasuku kami ni Pue Ala. 9 Kuulikamo komi ni banimpia, i tempoki mani simbela-mbela ai komi i se etu, ai ei-ei kuulika mpesola mbui komi: ane ria tau anu mangkeni “bambari malompe” anu baria simbela ai Bambari Malompe anu nidokomo lako si kami, batena nasuku ia ni Pue Ala!
10 Mewali, nipenokamipae, mampopetoia aku i manusia nakenimpololitaku ni mpongone? Baria! Wule mampenoka ngkida aku mopakatono rara ni Pue Ala. Ba kupari-pari bona mopakatono aku rara nu manusia? Baria! Lawi ane ewa etu anu kubabei, baria aku batua ni Kerisitu.
Bambari Malompe anu nakeni ni Paulu iamo anu nadoko lako si Pue Yesu
11 Bona niinsani poka, Bambari Malompe anu kubambarika komi, baria lako i pekiri nu manusia. 12 Lawi Bambari Malompe etu, baria kudoko lako i manusia, baria mbui ria tau anu mopaguru aku. Agaiana i Yesu Kerisitumo, anu mopadongka Bambari Malompe etu si aku.
13-14 Niinsani poka, lolitaka nu katuwuku ni banimpia i pangulaku agama Yahudi. Mawori mpuu sira rangaku anu mampeulai atura agama Yahudi, agaiana akumo anu melumbu pangulaku lako i ope-ope rangaku aretu, lawi lako i raraku mpii mampeulai ada nu ulububuki. Ai i tempo etu, kupari-pari mampopesiasi sira ope-ope tau anu mepotuu si Kerisitu, lawi kupenoka mopakatuna sira.
15 Agaiana nakeningkabula rara ni Pue Ala, lako baria mani aku rapoanaka, Napelisimo aku bona mewali suroNa. 16 Napopeitakamo aku AnaNa, bona kubambari kono si Ia i ope-ope tau anu baria sira toYahudi, ai i tempo etu baria aku lau merade patudu si ima ngkida. 17 Baria mbui aku lau i kota Yerusale bona meguru si sira, anu ilodomo mewali suro ni Pue Yesu. Agaiana lau nsalaa aku i tana Arab, lako mesola mbuida aku i kota Damsik.
18 Tolu mpae roo ni se etu, lako lauda aku i Yerusale mampomberumpaka i Peturu. Meari aku simbela-mbela ai ia sampulu lima eo kasaena. 19 Tempo etu, kupomberumpaka mbui i Yakobu poka ni Pue Yesu, agaiana suro ni Pue Yesu anu ntanina, baria sira kuita. 20 Nainsani ni Pue Ala apa anu kuuki ei mamonso. Baria dongkoku! 21 Roo awetu, laumo aku i tana Siria ai Kilikia. 22 Sungkaiku i se etu, baria aku sambela lau i tana Yudea; etumo mpane jumaa-jumaa i se etu, baria mani sira sambela mangita lenseku. 23 Mangepe ngkida sira lolita anu manguli, “Ni banimpia, ria sadua tau anu mampopesiasi kami nakenimpepotuuki si Yesu Kerisitu, anu ni banimpia ina napakatuna. Agaiana ei-ei, mobambarimo ia Bambari Malompe kono si Yesu Kerisitu, bona tau mepotuu sira si Yesu Kerisitu.” 24 Etumo mpane, motoiamo sira i Pue Ala, lawi mangepemo sira apa anu mewali si aku.