AROOMA
Mantû ma baarûa îno
Îno n'yo baarûa ya Paûrû îra ndaaya kîrî baarûa ciake cionthe ira aandîkîîte *Kîrîîkanîroni Kîîyerû. Paûrû aandîkire baarûa îno kwîra eetîgîri ba Rooma naarî na mûbango wa kûbariûngîra. Rooma yarî taûni înene mûno. N'yo yarî taûni îra nene gûntû kûra mûnene wa Arooma aathanaga. Gûtiiyîkeene bwega bûra kanica yambangîîrie Rooma. Athoomi bathûgaanagia bakauga kwaûmbîka ûkeegua ntheto îmbega yareetirwe Rooma i bara baatuîkire eetîgîri ntugû ya *Pentekosti (thooma Ngûgî cia Atûmwa 2:10). Ntugû înu ya Pentekosti n'yo ntugû Ngai aatûmire Kîrundu Ûmûtheru, eendamîîra eetîgîri.
Paûrû aandîkire baarûa îno arî nthîgûrû ya Angiriki. Na aabangîîte acookeere Njerusaremu akiirîra eetîgîri ba noogo bara baarî nkîa kîewa kuuma kîrî eetîgîri bara bataarî Ayaundi. Kîewa gîku kîarî mwothi (thooma 15:26). Paûrû aabangîîte auma agu agendeere Rooma akarakarange na bara baarî eetîgîri ba noogo akîîya kûthi bwa nthîgûrû yîtagwa Spania (thooma 15:24). Mwanjîîrioni wa baarûa îno, Paûrû eerîîte eetîgîri ba Rooma atî eendaga kûbeekîra wîru nabo bakîmwîkîra bu (thooma 1:11-12).
Paûrû ataariûngîrîte kanica înu yarî Rooma kaîrî. Baarûani yake Paûrû atiugîîte wegua kanica înu nîarî na mathîîna kana îtaarî namo. Aarîîrîîtie gîtûmi kîa ntheto îmbega auga ntheto îmbega n'yo Ngai atûmagîra gûtuîkithia bara beegagua barî na wîtîgio antû baagîru, “Ngai aagîrithagia antû n'ûntû bwa wîtîgio bwao t'ûntû na kîngî” (1:17). Na kaîrî Paûrû naandîkîîte moorutani mwanya mwanya, îgûrû rîa ntheto îmbega ya Yiesû Kîrîstû.
Paûrû aanjîîrîîtie na kwonania bûra antû bonthe baathagwa i wîyia n'ûntû wîyia bûrî inya, nwîgue muntû i Mûyaundi kana ti Mûyaundi. Na gûtirî bu antû barûtha babukîria inya. Ayaundi bakûgeria kûthingata *watho bwa Musa, bataûmba kûbuathîkîra kûrû. Mûno mûno, watho i bwatûmire Ayaundi boona bûra beeyagia bûgana. Na kaîrî Paûrû augîîte i Ngai wenka aûmba kwagîrithia muntû ûmwagîru. Gûtirî bu muntû arûtha arî we bûûmba gûtûma Ngai amwona arî ûmwagîru. Paûrû oonanîîtie atî, ûra eetîgagia Yiesû Kîrîstû ûyu n'we Ngai aagîrithagia. Kîrîstû n'we Ngai aathuurire atuîka Mwonokia wa antû. Kaîrî Paûrû naarîîtie îgûrû rîa baita ya muntû kwîgua arî na ngwatanîro na Kîrîstû, na bûra mwîtîgîri abatîîrue atûûra atongoreetue n'inya ya Kîrundu.
Na kaîrî Paûrû naarîîrîîtie îgûrû rîa mûbango wa Ngai gûkû nthîgûrû kîrî Ayaundi na bara batarî Ayaundi. Paûrû augîîte wana wegua Ayaundi i baregeete gwîtîgia Kîrîstû, îgiita rîgaakinya bamwîtîgie boonokue.
Na Paûrû akîthiria aandîkîîte auga bûra Akîrîstû babatîîrue beegua barî ba mîkarîre îkari, na mûno mûno, kwonanagia wendo kîrî bonthe. Aarîîrîîtie mûkarîre wa Mûkîrîstû mantûûni ma gûtûmîkîra Ngai, aathani, na antû bara bangî. Paûrû athirîîtie baarûa îno na nkeethi inyingî kuuma kîrî antû mwanya mwanya, na mîgambo ya gûkumia Ngai.
Gwookubî baarûa îno îkari ûûgû:
Nkeethi, gûcookeria Ngai nkaatho na gîtûmi gîa kwandîka (1:1-17)
Wîyia bwa antû bara bataarî Ayaundi (1:18-32)
Wîyia bwa Ayaundi (2:1-3:8)
Wîyia bwa antû bonthe (3:9-20)
Muntû ûra eetîgagia Kîrîstû n'we Ngai aagîrithagia (3:21-31)
Îburaîmu noonaniirie ngerekano îmbega ya wîtîgio (4:1-25)
Ithaarimo bira bara baagîru bathaarimagwa na bio n'ûntû bwa wîtîgio bwao (5:1-11)
Kîrîstû i ngerekano îkari ta Andamu (5:12-21)
Inya ya gîkuû nîathiriirue (6:1-23)
Mûtugo wa kwathîkîra watho (7:1-25)
Mûtugo wa kwathîkîra Kîrundu (8:1-39)
Mûbango wa Ngai kîrî Aisiraeri (9:1-11:36)
Mûkarîre wa Mûkîrîstû ûbatîîrue wîgua ûrî ûmûtheru (12:1-21)
Kwathîkîra aathani na bûra Mûkîrîstû abatîîrue akaranagia na bara bangî (13:1-14)
Ngwatanîro na gûkarania na bara batarî na wîtîgio bûûganu (14:1-15:13)
Ndiûnga ya Paûrû na mîbango îra aabangîîte (15:14-33)
Nkeethi kuuma kîrî antû mwanya mwanya kîrî eetîgîri ba Rooma (16:1-16)
Mantû ma mûthia na mîgambo ya gûkumia Ngai (16:17-27)