Mûtûûrîre wa bara barî na Kîrundu
8
1 Ûra arî ndeeni ya Kîrîstû Yiesû atiigiitîrwa îgamba bûûthûûku. 2 Watho bwa Kîrundu bûra bûtûmaga twîgua tûrî mwoyo n'ûntû tûrî ndeeni ya Kîrîstû Yiesû ibûnthaûrîîte ndauma wathooni bûra bûreetaga wîyia na gîkuû. 3 Watho i bwaremirwe gûtwonokia n'ûntû bwa mûtugo wetû wa wîyia. Îndî Ngai aatûmire Mwana wake eegua arî muntû ta tiû, antû barî na meeyia, kaingo amûruta arî kîgongwana n'ûntû bwa meeyia meetû na kaingo athiria inya îra maarî kîrî tiû. 4 Ngai aarûthire ûgu kaingo tiû tûtûûraga tûrî na inya ya gîîkîrundu twathîkîra bûra watho bûtwîrîîte, tiû bara tûtaathagwa n'inya ya mûtugo wa kîîmuntû, ta uu wa wîyia.5 Bara baathagwa n'inya ya mûtugo wa kîîmuntû bathûgaanagîria meeyia. Îndî bara baathagwa i Kîrundu bathûgaanagîria mantû ma gîîkîrundu. 6 Mathûgaania mara maathagwa n'inya ya mûtugo wa kîîmuntû imatûmaga muntû akua. Îndî mathûgaania mara maathagwa i Kîrundu matûmaga muntû eegua arî mwoyo na arî na ûkiri. 7 Mathûgaania mara maathagwa n'inya ya mûtugo wa kîîmuntû matigwatanagîra na Ngai. Bara barî mathûgaania ta mamu batiendaga kwathîkîra watho bwa Ngai. Na kwaria mma, ibaremagwa ikûbuathîkîra. 8 Bara baathagwa n'inya ya mûtugo wa kîîmuntû batiûmba gûkenia Ngai.
9 Îndî biû bûtiathagwa n'inya ya mûtugo wa kîîmuntû. Woona Kîrundu wa Ngai atûûraga kîrî biû, biû bwathagwa i Kîrundu. Ûra atarî na Kîrundu wa Kîrîstû, ûyu t'wake. 10 Wana wegua mîîrî yenu îgaakua n'ûntû bwa wîyia, woona Kîrîstû arî kîrî biû, Kîrundu akabwaa mwoyo n'ûntû ibwagîrithîîtue i Ngai. 11 Na woona Kîrundu woora aariûkiirie Yiesû atûûraga kîrî biû, ûyu aariûkiirie Kîrîstû Yiesû agaatûma wana mîîrî yenu îra îkuuyaga îtûûra mwoyo tene na tene na njîra ya Kîrundu ûra atûûraga kîrî biû.
12 Kwoogu aruayia na aarayia, tûbatîîrue twathagwa i Kîrundu mîtûûrîreeni yetû, ti twathagwa n'inya ya mûtugo wa kîîmuntû. 13 Bûgatûûra bwathagwa n'inya ya mûtugo wa kîîmuntû i bûgaakua. Îndî bûgacinda mantû maathûûku ma kîîmwîrî kwa inya ya Kîrundu bûgaatûûra. 14 Bara bonthe batongoragîîrua i Kîrundu wa Ngai n'aana baake. 15 Kîrundu ûra twetwe atitûtuîkithîîtie nkombo cia ûguaya kaîrî. Kîrundu ûra twetwe atûtuîkithîîtie aana ba Ngai ûra twîtaga “Aba,” (nabu i ta kuuga “Baaba.”) 16 Na i Kîrundu wooyu aaragia na irundu bietû agatwîra wabu tûrî aana ba Ngai. 17 Na woona tûrî aana baake agatwa rûgai rwa ithaarimo bira atwaigîrîte. Bionthe bira Ngai eete Kîrîstû bigaatuîka bietû na tiû. Îndî wegua wana tiû tûkaagîa mwago ta wake, nwa mwanka tûnyamaarue ta bûra Kîrîstû aanyamaariirue.
Bûra ûkeegua tûrî na mwago ûkari
18 Ndî na mma t'ûntû wana wegua itûkûnyamaara îîndî. N'ûntû kûnyamaara gûkû gûtiganaanîka na mwago ûra tûkaagwûrîrwa. 19 Bionthe bira Ngai aûmbire ibieteereete bikîendaga kwona mûno rîra Ngai akoonania bara barî aana baake. 20 Bionthe bira biûmbe biagarûrirwe biatuîka bia ûtheri. Na ti na wendi bwa bio. I kûringana na wendi bwa Ngai. Îndî ingî i kwarî na wîrîgîîro 21 atî, bira biûmbe bigaakûûrwa ûkombooni bûra bûûmba gûtûma bikua, i kaingo biîgua birî na kûthaûrwa kûra kûrî mwago, kûra bara barî aana ba Ngai ûkeegua barî na ku.
22 Itwiyî wana îmunthî biûmbe bionthe bitwîre bikayaga n'ûrûrû ta mwekûrû akîgîa na mwana. 23 Îndî ti bio bionka. Wana tiû eetîgîri na i tiû tûrî na Kîrundu, ta we arî kîonanîîria kîa mbere kîa Ngai kwingia wîrane bwake, itûkayagîra ndeeni watweteereete mûthia. Mûthiani Ngai agaatûthûkia tûrî aana baake, rîra agaatûtuîkithia ba mîîrî îngî. 24 Itwonokiirue, na n'ûntû tûrî boonokie, tûrî na mma wîrîgîîrooni bûbû bwetû. Tûkoona gîntû kîra twîrîgîîrîîte, wîrîgîîro ûtiîgua bûrî na gîtûmi. Ga kûrî muntû eerîgagîîra gîntû arî nakîo? 25 Woona tûrî na wîrîgîîro bwa kîra tûtakûrî tûgûkîona, tûgîeteereete tûûmîîrîîtie.
26 Na i Kîrundu atûteethagia n'ûntû tûtirî inya na bwetû. Tûtiiyî kûromba bûra kûbatîîrue. I Kîrundu atwerekanagîra kîrî Ngai agîkayaga mûkayîre ûtaûmbîka kuugîka na mîgambo. 27 Ngai ûra oonaga bûra bûrî nkorooni cietû naiyî bûra Kîrundu augaga, n'ûntû Kîrundu atûrombagîra kîrî Ngai kûringana na wendi bwa Ngai.
28 Itwiyî atî Ngai atûmaga mantû monthe makarîka,a kaingo bara bamwendeete na eetîîte kûringana na mûbango wake bateetheka. 29 Ngai aathuurireb bara bagaatuîka antû baake kinya mbere ya nthîgûrû yûmbwa, ababaangîra bagaakara ta Mwana wake, kaingo Mwana wake atuîka kîîmbere kîa aruagina na aaragina baingî. 30 Wa babu kaîrî i bo beetîîtwe i Ngai. Na babu beete nwabo baagîrithîîtue i Ngai. Na wa babu baagîrithîîtue i bo beetwe mwago i Ngai.
Gûtirî kîo kîathûrana Mûkîrîstû na wendo bwa Ngai
31 N'ata tûûmba kuuga îgûrû rîa mantû mama? N'ûû aûmba gûtûmakia Ngai arî amwe naati? 32 Ûkoona Ngai ataarega na Mwana wake aamûrutire arî kîgongwana gîetû twinthe, twa bira bingî bionthe atagîtwa ûtheri amwe na Kîrîstû. 33 N'ûû akaathitanga antû bara Ngai athuurîîte na i Ngai atwagîrithîîtie? 34 Kwoogu n'ûû îîndî aûmba gûtûgiitîra îgamba bûûthûûku? Gûtirî we, n'ûntû Kîrîstû Yiesû naakuire na aariûka na îîndî akari nthî rûteere rwa ûrîo rwa Ngai agîtwerekanagîra. 35 I mbi yûmba gûtwathûrana na wendo bwa Kîrîstû? I thîîna? I kînyamaara? I kûnyamaarua? I yûûra? I kwaga nguo? N'ûgwati? Kana i gîkuû? Gûtirî kîo! 36 wa ta bûra kwandîkîîtwe *Maandîkooni Maatheru,
“Gûtirî ntugû tûtaûragagwa n'ûntû bwaku.
Antû batwonaga ta ng'ondu cia kûthînja.”
37 Îndî mantûûni mamu monthe i tiû acindi na kûraaya gûkûrûkîîra kîrî Kîrîstû ûra aatwendire. 38-39 Ndî na mma gûtirî kîo kîûmba gûtwathûrana na wendo bwa Ngai bûra aatwoniirie ndeeni ya Kîrîstû Yiesû Mwathani wetû. Ti gîkuû, ti mwoyo, t'araîka, na ti mainya ma irundu. Ti mantû mara marî ku îîndî kana ma îgiita rîra rîkaaya, ti kîûmbe nwa kîrîkû kîa nthîgûrû ya îgûrû kana kîa nthîgûrû îno, na ti gîntû nwa kîrîkû kîngî kîrî bionthe bira biûmbe.