Ngûgî i

NGÛGÎ CIA ATÛMWA

Mantû ma îbuku rîrî

Îbuku rîrî rîtwîraga mantû mara Kîrundu Ûmûtheru aarûthire gûkûrûkîîra kîrî atûmwa ba Mwathani wetû Yiesû Kîrîstû. Maarî mantû maanene ma kûrigaria. Gîtûmi gîa gwîta îbuku rîrî Ngûgî cia Atûmwa i kwîgua mûno mûno, rîgweteete mantû mara Petûrû na Paûrû baarûthire kwa inya ya Ngai, nyuma ya Yiesû agwîtia îgûrû kwa Îthe. Petûrû na Paûrû baarî atûmwa baanene ba Yiesû.

Mwandîki wa îbuku rîrî i Ruka. Rîrî i rîo îbuku rîake rîa maîrî kwandîka. Rîa mbere rîîtagwa Ntheto Îmbega îra yaandîkirwe i Ruka. Ûkathooma îbuku rîru rîake rîa mbere, Ruka aandîkîîte mantû mara monthe Yiesû aarûthire na mara aarutanire kuuma akwanjîîria ntûmîîri yake, mwanka rîra eetiirie îgûrû (thooma Ngûgî 1:1-2).

Îbukuuni rîrî Ruka aandîkîîte mathîîna mara atûmwa ba Yiesû boonire n'ûntû bwa gûtambia ûkûûyî bwao îgûrû rîa Mwathani, Njerusaremu, Njundea yonthe, Samaria, na nteere cionthe cia nthîgûrû (thooma 1:8). Yiesû akûriûka, thîîna îmwe înene mûno îra yarî oogo, i kwîgua gûtaamenyekaga ntûmwa yarî kîrî ba ûû. N'ûntû Yiesû na atûmwa baake baarî Ayaundi, antû beeciiragia ntûmîîri yarî ya Ayaundi, îtaarî ya antû bonthe. Îndî îbukuuni rîrî twîrîîtwe Yiesû aayire kwonokia antû bonthe; Ayaundi na bara batarî Ayaundi. Nkarari cianjîîrie atongoria ba Ayaundi bakûrega Akîrîstû batûmîîria mantû ma Yiesû (thooma 4:1-31, 7:1-59). Na thîîna îra nene Akîrîstû ba mbere baarî n'yo i kûrigwa kûmenya muntû nwa atuîke mûthingati wa Yiesû atarî Mûyaundi.

Îndî thîîna înu nîacookire yanyianga n'ûntû wathooma îbuku rîrî ûkoona Firibû naatûmîîrie Asamaria (thooma 8:7-25). Wathooma ûkoona Petûrû naatûmîîrie antû ba mûciî wa mûtongoria ûmwe wa acikaarî ba Arooma eetagwa Koronerias (thooma 10:1-48). Na aacooka aagwetera kanica ya Njerusaremu mantû mamu (thooma 11:1-18). Nyumaani i kwarî na mûceemanio wa kwarîîria ûntû bûbu Njerusaremu kaîrî (thooma 15:3-35). Ûra wonthe aarî mûceemanioni ûyu noonire ntheto îmbega nîabatîîrue îtûmîîrua kîrî antû bonthe, Ayaundi na bara bataarî Ayaundi.

Wathooma îbuku rîrî ûkoona Paûrû n'we aatûmîîrie mûno bara bataarî Ayaundi. Îbukuuni rîrî Ruka aandîkîîte auga gûtirî kîo kîrigîîria ntûmwa îno ya wonokio îkinyithua gûntû kunthe. Na itûkwona Paûrû naamîtûmîîrie taûni îmwe ya ira ciarî îgweta mûno, îra yeetagwa Rooma (thooma 28:16-31). Paûrû agûkinya Rooma aakomborire nyomba aathi na mbere gûtûmîîria mantû ma ûnene bwa Ngai, aarutana antû mantû ma Yiesû arî na ûcamba mûno.

Gwookubî îbuku rîrî rîkari ûûgû:

Atûmwa beeteereete Kîrundu Ûmûtheru (1:1-26)

Kîrundu Ûmûtheru eendamîîra eetîgîri (2:1-13)

Kanica yanjîîrua Njerusaremu i Petûrû (2:14-7:60)

Ntûmîîri Njundea na Samaria (8:1-12:25)

Rûgendo rwa mbere rwa Paûrû kûthi gûtûmîîria (13:1-14:28)

Mûceemanio Njerusaremu wa kwarîîria watho (15:1-35)

Rûgendo rwa maîrî rwa Paûrû kûthi gûtûmîîria (15:36-18:22)

Rûgendo rwa mathatû rwa Paûrû kûthi gûtûmîîria (18:23-21:16)

Paûrû aagwatîrwa Njerusaremu airwa Kaisaria (21:17-26:32)

Paûrû aatûmîîria akwirwa Rooma kûgiitîrwa îgamba (27:1-28:31)