NJOANA
Mantû ma îbuku rîrî
Îbuku rîrî rîandîkirwe n'ûmwe wa arutwa bara ba Yiesû îkûmi na baîrî, ûra eetagwa Njoana wa Sabendi. Îndî tika Njoana agweteete riîtwa rîake. Augîîte i “mûrutwa ûra Yiesû eendeete mûno” (thooma 13:23). Augîîte aroona na meetho ûra aarîîrîîtie îgûrû rîake. Na kwoogu nakûûyîrîîte ûmma bwa mantû mara aandîkîîte (thooma 21:24).
Îbuku rîrî rîrîtwonia Yiesû Kîrîstû n'we kiugo kîa Ngai gîa tene na tene, kîra gîatuîkire muntû gîatûûrania naati gûkû nthîgûrû. Yiesû aûmba gûtûgwûrîra tûkamenya bûra Baaba wetû akari n'ûntû bwa ûngai bwake. Îbukuuni rîrî Njoana naandîkîîte mantû maingî na maaraaya, mara Yiesû augire. Na naandîkîîte biama bira agwîta “magegania” bira Yiesû aaringire, bûrî ûkûûyî bwake gûtwonia i mma Yiesû aumire kîrî Ngai. Mantû mama marî îbukuuni rîrî maandîkirwe kaingo kwaûmbîka bara bakaamathooma beetîgia atî Yiesû n'we Mwonokia ûra eeranirwe, Mwana wa Ngai, na bara bakaamwîtîgia, wîtîgio bwao bûgaatûma boona mwoyo (thooma 20:31). Îndî amwe na ûkûûyî bûbû bûrî îbukuuni rîrî bûgana ûûgu, Ayaundi na i bo antû ba baYiesû, bataamûkeneera. Îndî twîrîîtwe gwakarîkire ûgu n'ûntû bwa wîyia bwa antû. Antû baaregaga Yiesû, t'ûntû na kuuga Yiesû naarî mûgeni kana naarutanaga ûrongo. Baamûregaga n'ûntû bwa kwîgua antû batiendeete mantû ma werû, beendeete mantû ma mwindu.
Njoana akinyîîrîîtie gûtwonia na njîra inyingî atî, wîyia bûrî inya. Na mûno mûno, atûkinyîîrîîtie kwîgua tûrî na wîrîgîîro kîrî Ngai kaingo atwonokia. Na wa ta bûra gûciarwa kûra twaciarirwe n'aciari beetû gûtaarî kwa wendi bwetû twingwa, nwa ta bu gûciarwa gîîkîrundu gûtarî kwa wendi bwetû twingwa. Gûciarwa wa gîîkîrundu kuumanagia na inya yake na ya Kîrundu wake (thooma 1:12-13; 3:5-8). N'ûntû antû bonthe n'eeyia batirî inya yao na bwao ya kûthengeera Yiesû aboonokia, tatiga Ngai Baaba abakuuyîîtie kîrî we (thooma 6:44). Muntû eetîgia Yiesû, Ngai amweyaga mwoyo wa tene na tene. Na bara Ngai eeyaga mwoyo, ntugû îra antû bakaagiitîrwa îgamba, bo batiigambithua (thooma 5:24). Bo n'antû ba Kîrîstû na gûtirî kîo kîbaruta kîrî we, bauma ûkariani bwake (thooma 10:28).
Îbukuuni rîrî kûrî na mantû Njoana aandîkîîte mara Yiesû aariirie akîringithanagia ûntû na kînyume kîa bu. Namo i werû na mwindu (thooma 1:4-9), îgûrû na nthîgûrû (thooma 8:23), mwoyo na gîkuû (thooma 6:57-58), ûmma na ûrongo (thooma 8:32-42), wendo na rûmena (thooma 15:17-18). Na kaîrî, kûrî mîgambo Yiesû aatûmagîra mûno kwonia antû aarî ûû, na kîra gîatûmire aaya. Aatûmagîra kuuga, “I niû.”
Gwookubî îbuku rîrî rîkari ûûgû:
Kiugo kîa Ngai gîatuîka muntû (1:1-18)
Njoana Mûbaatithania, arutwa ba Yiesû ba mbere rîra Yiesû aanjîîrie gûtambia rûtheto (1:19-2:25)
Rwaria rwa Yiesû na Nikondemu, ûkûûyî bwa Njoana Mûbaatithania (3:1-36)
Yiesû nthîgûrû ya Asamaria (4:1-42)
Yiesû ooria kaîyî nthîgûrû ya Gariiri (4:43-54)
Yiesû oorania na aatûmîîria Njerusaremu (5:1-47)
Yiesû, mûgaate wa mwoyo (6:1-71)
Nkarari cia Ayaundi (7:1-8:59)
Yiesû ooria muntû aacierwe arî ntûngi (9:1-41)
Yiesû, mûrîîthi ûmwega (10:1-42)
Yiesû aariûkia Rasaarû (11:1-54)
Yiesû aathi Njerusaremu (11:55-12:50)
Yiesû aarîyanîra na arutwa baake irio bia ûgoro rîa mûthia, na mantû mara aabeerire rîa mûthia (13:1-16:33)
Yiesû aarombera arutwa baake (17:1-26)
Yiesû aagwatwa, aagambithua, aambwa mûtharabaani (18:1-19:42)
Yiesû aariûka oonwa kaîrî (20:1-21:25)