<<    <     Ruka     24     >    >> 
Yiesû aariûka
24
1 Rûkîîrî mûno ntugû ya mbere ya kiumia, eekûrû babu baaraûka nthikooni bakamatîîte mîtaa îra baathuuranîrîîte. 2 Bagûkinya beethîra iiga irîraingiritiirue rîarutwa mûromooni wa nthiko. 3 Bakûthûngîra ndeeni batoona mwîrî wa Mwathani Yiesû. 4 Barûngi waagu barigarîîte i mantû mamu, nthûti îmwe antû arûme baîrî baarûngama akubî nabo beekîrîte nguo ciayicaga mûno. 5 Eekûrû babu baagwatwa n'ûguaya beenîka biongo biao. Antû babu babaûria, “I kî n'ûntû bûgûcûa muntû arî mwoyo antûûni baakuû. 6 Atirî gûkû nariûkire. Ririkanaani bûra aabwîrire arî Gariiri. 7 Aabwîrire, ‘Mwana wa Muntû nwa mwanka anenkanîrwe kîrî antû ba meeyia na aambwe mûtharabaani, îndî akaariûka ntugû ya ithatû.’ ” 8 Rîru i rîo eekûrû babu baaririkanire bûra Yiesû augîîte.
9 Bakuuma nthikooni baathi beera arutwa îkûmi na ûmwe ba Yiesû mantû mamu na bara bangî bonthe. 10 Eekûrû babu baarî Maria Mûmagindari, Njoanina, Maria gina wa Njakubu na bangî. I bo beerire arutwa ba Yiesû mantû mamu. 11 Îndî arutwa bakwîrwa ntheto inu n'eekûrû babu boona i cia ûtheri, bataaciîtîgia. 12 Petûrû auma agu na rwîro aathi nthikooni. Agûkinya aakuamîîria aaraithîîria ndeeni. Akûraithîîria i nguo ira Yiesû oogeetwe nacio oonire cionka. Aacooka kaîrî arigarîîte i bûra gwakarîkîîte.
Yiesû eebonania kîrî arutwa baake baîrî agarûkîîte
13 Ntugû weenu arutwa bamwe baîrî ba Yiesû i baathiîte gataûni geetagwa Emaûs. Gataûni gaku kaarî ta mairi mûgwanja kuuma taûni ya Njerusaremu. 14 Baathiîte bakîaragia mantû monthe mara maakarîkîîte. 15 Bakîaragîîria mantû mamu, Yiesû abagwatagwata baathiyania. 16 Ibaamwonire îndî bataamûmenyaga.
17 Yiesû abaûria, “N'ata bûthiîte bûkiugaga na njîra?”
Arutwa babu baarûngama moothiû maao makîonanagia kîeba. 18 Ûmwe wao eetagwa Kiriopas amwîra, “Inkûthûgaania i woû wenka Njerusaremu ûtaiyî mantû mara matuîkîkîîte.”
19 Abaûria, “Mantû mabi?”
Bamwîra, “Mantû mara maratuîkîkire kîrî Yiesû Mûnasareethi. Araarî kîroria kîrî inya înene. Mantû mara ararûthaga na mara araaragia imaroonanagia araumîîte kîrî Ngai na antû ibarakenaga n'we. 20 Îndî athînjîri bara banene ba Ngai na atongoria i baatûmire atuîrwa kûûragwa na njîra ya kwambwa. 21 Tûreerîgagîîra n'we agaatûkûûra, tiû Aisiraeri, tuume kîrî anthû beetû. Îîndî îmunthî i ntugû ya ithatû kuuma mantû mamu magûkarîka. 22 Eekûrû bamwe bacietû batûrigariirie mûno. Baraûkire nthikooni rûkîîrî mûno, 23 na batiroona mwîrî wa Yiesû. Bagûcooka baugire i boonire araîka babeera arî mwoyo. 24 Wana bamwe beetû bakûthi nthikooni beethîîre gûkari wata ûgu eekûrû babu batwîrire. Îndî batiramwona.”
25 Yiesû abeera, “Biû bûtakîîte mûno n'ûntû bwa kûûmia biongo bienu bûkarega gwîtîgia mantû mara iroria biaroriirie. 26 Ga Kîrîstû ataabatîîrue kûnyamaara i mantû mamu rîru acooka mwagooni wake?” 27 Yiesû abataûrîra bûra *Maandîko Maatheru maugîîte îgûrû rîake, kwanjîîria na mabuku mara maandîkirwe i Musa na mara monthe maandîkirwe n'iroria.
28 Barî akubî gûkinya gataûni gaku baathiîte, Yiesû aakara taka aakûrûkanîîtie. 29 Arutwa babu bateendaga athi. Bamwîra, “Raara n'ûntû riûa rîrî akubî kûthûa na igûgûtuga.” Yiesû eetîgîîria baaraara.
30 Bagûkara meethaani barîa, Yiesû aathûkia mûgaate aacookeria Ngai nkaatho, aung'enyûrania abanenkera. 31 Rîru i rîo meetho maao maarancûkire bamûmenya. Bakûmûmenya bataamwona agu kaîrî. 32 Baûrania, “Tuuge i kîo n'ûntû nkoro cietû ikûringaga ûra rîra akwaragia naati njîraani agîtûtaûrîra Maandîko Maatheru?”
33 Bauma agu thaa wa inu baacooka Njerusaremu. Beethîra arutwa bara îkûmi na ûmwe ba Yiesû beethîreene amwe na bara bangî baarî nabo. 34 Arutwa babu beethîreene babeera, “I mma Mwathani nariûkire. Noonirwe i Simioni!” 35 Arutwa babu baîrî nabo babeera bûra gwakarîkîîte barî njîraani na bûra baamenyangire i Mwathani aarî akîng'enyûrania mûgaate.
Yiesû eebonania kîrî arutwa baingî baake
36 Wabakîaragia mantû mamu, nthûti îmwe boona Yiesû arûngi amwe nabo. Abeera, “Ûkiri bûrookara naabi!”
37 Baamaka n'ûntû baathûgaanagia i nkoma aarî. 38 Yiesû abaûria, “I mbi yabûmakia? Na i mbi n'ûntû bûtagwîtîgia? 39 Raithaani njara na magûrû maakwa bwone i niû ningwa. Ndingithiani bwîgue n'ûntû nkoma atirî mwîrî na atirî maîndî ta niû.”
40 Akuuga ûgu aboonia njara ciake na magûrû. 41 Îndî wanarîo bateetîgia n'ûntû bwa bûra baakeneete na bûra baarigarîîte bûgana. Aacooka abaûria, “Bûrî na gîntû gîa kûrîa aaga?” 42 Bamûnenkera kînuku gîa îkûyû rîîruge. 43 Yiesû aathûkia aarîa bakîonaga.
44 Rîru Yiesû abeera, “Mama i mo mantû mara ndaabwîraga rîra ndaarakaranagia naabi. Rîra ndarabwîraga nwa mwanka mantû maakwa monthe maûyûre mara maandîkîîtwe *wathooni bwa Musa, mabukuuni ma iroria, na Sabuuriini.”
45 Abaa ûûme bwa kûmenya *Maandîko mamu Maatheru. 46 Abeera, “Kwandîkîîtwe ûûgû, Kîrîstû akaanyamaarua îndî akaariûka ntugû ya ithatû. 47 Na kwa riîtwa rîakwa, kwanjîîria Njerusaremu antû bonthe bagaatûmîîrua mantû ma kwîrira na kûrekerwa meeyia. 48 Biû bûrî ankûûyî ba mantû mama. 49 Na nkabûtûmîra Kîrundu Ûmûtheru, ûra Baaba augire akabwaa. Karaani aaga taûni mwanka rîra bûkeewa inya ya Kîrundu Ûmûtheru.”
Yiesû eetia îgûrû
50 Yiesû aathi na arutwa baake kuuma Njerusaremu mwanka Bethania. Bagûkinya aûkîîria njara ciake îgûrû abathaarima. 51 Warîo Ngai amwathûrana nabo amwîtithia îgûrû. 52 Arutwa baake bamûgonga. Rîru baacooka Njerusaremu bakeneete mûno. 53 Îgiita rîao rîra riingî beegagua barî Nyomba ya Ngai bakîmûkumagia.