MAARIKO
Mantû ma îbuku rîrî
Maariko aarî mwîtîgîri wa Yiesû Kîrîstû, îndî tika aarî ûmwe wa arutwa bara îkûmi na baîrî ba Yiesû, ta Mathayo kana Njoana. Athoomi bara baingî beetîgagia mantû mara Maariko aandîkîîte îbukuuni rîrî eeragwa mo i mûtûmwa Petûrû ûra aarî ûmwe wa arutwa ba mbere ba Yiesû.
Îbuku rîrî rîanjîîrîîtie na kûgweta mantû ma ntheto îmbega ya Yiesû Kîrîstû, Mwana wa Ngai. Îbukuuni rîrî Yiesû arîoneka arî muntû wa kûrûtha mantû meega na arî na watho. Watho bwake bûrîonekana kuumania na ûrutani bwake, inya yake ya kworia antû ndwari, kwîngatia irundu biithûûku bikauma kîrî antû, na kûrekera antû meeyia.
Maariko aandîkîîte rûgono rwa Yiesû na njîra îmbûthû. Akinyîîrîîtie mûno kwenda kwonania mantû mara Yiesû aarûthire. Atiandîkîîte mantû maingî ma mara augire na mara aarutanire. Nyuma ya kûgweta na njîra înkubî mantû maakai ma Njoana Mûbaatithania na bûra Yiesû aagerangiirue i Nkoma, Maariko aandîkîîte mantû mara Yiesû aarûthire ta kworia aayie, kwîngatia irundu biithûûku bikauma kîrî antû, na mantû maakai kîrî mara aarutanire.
Wa bûra Yiesû aathiire mbere akîoragia antû na akîbarutanaga, nwabu athingati baake baathiire mbere kûmûmenya nkûrûki. Bara bateendaga kwîgua Yiesû bakwona ûgu bamûthûûra mûno. Mûthiani wa îbuku rîrî, Maariko nagweteete mantû mara maatuîkîkire kîrî Yiesû arî gûkû nthîgûrû, kiumiani kîa mûthia. Na mûno mûno, agweteete mantû ma kûgwatwa, kwambwa, gûkua, na kûriûka kwa Yiesû.
Gwookubî îbuku rîrî rîkari ûûgû:
Mwanjîîrio wa ntûmîîri (1:1-13)
Mantû mara Yiesû aarûthire arî Gariiri (1:14-9:50)
Yiesû akuuma Gariiri kûthi Njerusaremu (10:1-52)
Yiesû arî akubî na Njerusaremu na agûkinya (11:1-14:31)
Yiesû aagwatwa, aagambithua, aambwa mûtharabaani (14:32-15:47)
Yiesû aariûka (16:1-8)
Yiesû eebonania nyuma ya kûriûka na agîîtia îgûrû (16:9-20)