Yiesû aariûka
28
1 Ntugû ya *Sabatû îgûkûrûka, rûûni rûûkîîrî mûno ntugû ya Kiumia, Maria Mûmagindari na Maria gina wa Yiesû baaraûka nthikooni kwona.2 Warîmwe nthîgûrû yainaina na inya mûno. Mûraîka wa Mwathani eendama kuuma îgûrû, aathi aingiritia iiga rîra rîakunîkîrîte mûromo wa nthiko ya Yiesû, arîkarîra îgûrû. 3 Mwonekere wake akîonekana aarî na werû ta bwa rweni, na nguo ciake ciarî injerû ce ta îra. 4 Akaria bara baacûûbîrîte nthiko bainaina mûno n'ûguaya, baakara ta antû bakuû.
5 Mûraîka eera eekûrû babu, “Tigaani kûmaka. Imbiyî i Yiesû ûra arambîîtwe bûgûcûa. 6 Îndî atirî gûkû nariûkire wa ta bûra augire. Ncûûni bwone ara araigîîtwe. 7 Cookaani na mpwî bûmenyithie arutwa baake, bûbeere nariûkire na akûthiyaga Gariiri mbere yenu. Bwathi noogo bûkamwona. Na bûtikaariganîrue n'ûgu ndabwîra.”
8 Eekûrû babu bauma agu bakiinainaga n'ûguaya, îndî nkorooni ciao i baûyûrîîtwe i gîkeno. Baathi baugîîtie rwîro kwîra arutwa baake bûra mûraîka aabeerire. 9 Wabathiîte baugîîtie, nthûti îmwe boona Yiesû. Abeera, “Muugaani.” Baathiiyanga akubî n'we, bamûgonga batiirithîîtie moothiû maao agu mbayoonia ciake. 10 Yiesû abeera, “Tigaani gûkuthûka. Îthiini bwîre aruayia bathi Gariiri i noogo tûkoonanîra.”
11 Eekûrû babu wa barî njîraani bathiîte, bamwe ba akaria ba nthiko baaya taûni beera *athînjîri bara banene ba Ngai mantû monthe bûra maakarîkire. 12 Athînjîri bara banene ba Ngai na akûrû baarûtha mûceemanio. Baarûtha mûbango baanenkera acikaarî mbia inyingî mûno. 13 Babeera bakaaya kûûrua i muntû bamwîre n'arutwa ba Yiesû baraayire ûtugû bamaami baiya mwîrî wake baathi na uu. 14 Babeera, “Wegua mantû mama magaakinyîîra ngabana tûkamwoneeria wabu i bu kûrî kaingo bûtoona thîîna.” 15 Acikaarî baathûkia mbia baarûtha wa bûra beerirwe. Na rûru i ru rûgono rûra Ayaundi baatambiirie mwanka îmunthî tûrî.
Kwîbonania kwa Yiesû kîrî arutwa baake îkûmi na ûmwe
16 Arutwa baathi Gariiri barî îkûmi na ûmwe, baakinya kîrîmaani kîra Yiesû aabeerîîte bakomane. 17 Bakûmwona bamûgonga, îndî bamwe baao ibaarî na nkanja. 18 Rîra Yiesû aayire abeera, “Impeetwe wathani bunthe îgûrû na nthîgûrû. 19 Kwoogu îthiini bûgatuîkithie antû ba nthîgûrû cionthe arutwa baakwa, bûkîbabaatithagia kwa riîtwa rîa Baaba, rîa Mwana na rîa Kîrundu Ûmûtheru. 20 Na bûbarutanage kwathîkagîra mantû monthe mara mbwathîîte. Na ûkeegagua ndî amwe naabi kinya îgiita rîa mûthiro wa nthîgûrû.”