Yiesû airwa kîrî Piraatû
27
1 Gûgûkea rûûni rûûkîîrî, *athînjîri bara banene ba Ngai bonthe na akûrû bonthe baakomana baabanga bûra bakaûragangithia Yiesû. 2 Bamûthaîka njara baathi n'we bamwirîra Piraatû ûra aarî ngabana.Gûkua kwa Njundas
3 Njundas ûra aakunyanîîre Yiesû akwona Yiesû aatuîrwa kûûragwa aanjîîria kwîrira nkorooni. Aacookeria *athînjîri bara banene ba Ngai na akûrû bara fetha ira mîrongo îthatû baamwete. 4 Abeera, “I mbîyîîtie ntûmîîte nthakame îtarî na ûthûûku îîtûûrwa.”
Bamwîra, “Aabu? Ga tûkûmaka n'ûgu tiû? Înu i thîîna yaku.”
5 Njundas aatiga aagera fetha inu nthîgûrû gûku baarî Nyomba ya Ngai, aathi eecuuria.
6 Athînjîri bara banene ba Ngai booya fetha inu. Bauga, “N'ûntû nikûgwetanîrua na kûûragwa kwa muntû, tûtiîtîgîîrîîtue tûciaiga kîgîînaani kîa Nyomba ya Ngai.” 7 Baagwatanîra bagûre nacio kîthaka gîetagwa “Kîthaka kîa mûûmbi wa nyûngû” gîa kûthikaga ageni bara baakuuyagîra Njerusaremu. 8 Na i ntûma wana îmunthî tûrî mûnda ûyu wîtagwa “Kîthaka kîa nthakame.” 9 Na wabu ûroria bûra kîroria Njeremia aaroriirie bwaûyûra, rîra aaroriirie auga, “Na baathûkia fetha ira mîrongo îthatû, ûgûri bûra bamwe ba Aisiraeri baagwatanîîre bamûrîe, 10 baagûra nacio kîthaka gîetagwa ‘Kîthaka kîa mûûmbi wa nyûngû,’ wa bûra Mwathani aambîîrîîte.”
Yiesû mbere ya Piraatû
11 Bakîrûtha ûgu, Yiesû n'aarûngi mbere ya ngabana wa Arooma, ngabana akîmûûragia, “I woû mûnene wa Ayaundi?”
Yiesû amwîra, “Nwa ta ûgu wauga.”
12 *Athînjîri bara banene ba Ngai na akûrû bamûtuîrîîra, îndî Yiesû ataaria. 13 Piraatû amûûria, “Anga nûkwîgua mantû mama monthe bakuuga nûrûthîîte?” 14 Îndî wanarîo gûtirî bu Yiesû auga eetheteera kîrî ûntû nwa bûmwe bwa mara eeragwa narûthîîte. Ûntû bûbu bwarigaria Piraatû mûno.
Yiesû aatuîrwa kûûragwa
15 Rîonthe kagiita ga kîatho gîa *Pasaka gaakinya, ngabana neetîgîîrîîtie kûthaûraga mûgwate ûmwe woora antû bakeenda. 16 Kagiitaani gaku i kwarî na mûgwate ûmwe eetagwa Baraba. Baraba naiyîkeene mûno n'ûntû bwa moothûûku mara aarûthîîte. 17 Kwoogu antû baathi kîrî Piraatû. Piraatû abaûria, “N'ûû bûkwenda mbuga arekeerua? I Baraba kana i Yiesû ûyû agwîtwa Kîrîstû?” 18 Aûriirie ûgu n'ûntû naarî akûmenya bwega *athînjîri bara banene ba Ngai na akûrû baathitangîîte Yiesû kîrî we n'ûntû bwa kûmwîgua rûriitho.
19 Na kaîrî akari waagu aakari ara aagiitagîra magamba, mwekûrû wake naatûmanîîte amwîra, “Menya ûûria muntû ûyu. I muntû ûmwagîru n'ûntû ûtugû i ndararootire kîrooto kîîthûûku n'ûntû bwake.”
20 Îndî amwe na ûgu *athînjîri bara banene ba Ngai na akûrû beera antû bauge i Baraba bakwenda na Yiesû naûragwe.
21 Ngabana aûria antû kaîrî, “N'ûû kîrî bo barî baîrî bûkwenda arekeerua?”
Bamwîra, “I Baraba!”
22 Piraatû abaûria, “Aabu n'ata bûkwenda ndûtha na Yiesû ûyû agwîtwa Kîrîstû?”
Bonthe bauganîîria rîmwe bamwîra, “Nambwe!”
23 Piraatû abaûria, “I kî? I mabîtia marîkû arûthîîte?”
Îndî amwe na ûgu kîrîndî kîathi na mbere kûyoga nkûrûki gîkîmwîraga, “Nambwe!”
24 Piraatû akwona mantû makûrema na antû i beendaga kûreeta thîîna, aathûkia rûûyî aathamba njara mbere yao bonthe bakîonaga. Auga, “Niû ntirî na meeyia îgûrû rîa gîkuû kîa muntû ûyû. N'îgûrû rîenu!”
25 Kîrîndî kîonthe kîamwîra, “Yîî, nthakame yake îrootûcookera na nciarwa cietû mbene!”
26 I rîo Piraatû eetîgîîrie auga Baraba arekue na Yiesû aringwe ibooko. Rîru amûnenkanîra athi kwambwa.
Acikaarî baanyûrûnta Yiesû
27 Acikaarî ba Piraatû baira Yiesû nyomba îra magamba maagiitagîrwa gûku kambîîni ya Ngabana îra yeetagwa Puritoria. Beethîrania mbûûtû ya acikaarî bara bangî bonthe. 28 Bamûruta nguo ciake bamwîkîra nguo îndaaya întuune. 29 Baatumania matî ma mîîgua maakara ta nthûmbî ya ûnene bamwîkîra mo kîongo, bamûgwatithia kamûraagi na njara ya ûrîo ta mûnene. Rîru baatua kûmûturîria maru bakamûnyûrûnta bakîmwîraga, “N'ata îîndî, mûnene wa Ayaundi?” 30 Bamûtuîra mata, baathûkia kamûraagi gaku bamûkûng'anga nako kîongo. 31 Bakûrîîkia kûmûnyûrûnta ûgu, bamûruta nguo înu, bamwîkîra nguo ciake kaîrî. Rîru baathi kûmwamba.
Yiesû aambwa
32 Acikaarî babu barî njîraani bathiîte kwamba Yiesû, boona muntû eetagwa Simioni wa kuuma gûntû gweetagwa Kureni. Bamûkamatithia na taka mûtharaba ûra Yiesû aakamatîîte. 33 Bagûkinya bantû eetagwa Gorogotha, tûgîtaûra i ta kuuga, “Kîîndî gîa kîongo,” 34 baakundia Yiesû ndibei yarî na gana. Îndî Yiesû aarega kûmînyua. 35 Bakûmwamba mûtharabaani baacooka baaringîra nguo ciake kuura bathi nacio. 36 Rîru baakara nthî bamûkaria. 37 Îgûrû ya kîongo gîake i baaringaringîrîte kabaaû mûtharabaani ga kwonania kîra gîatûmîîte Yiesû aambwa. Baandîkîîte, “Ûyû i Yiesû, Mûnene wa Ayaundi.” 38 I kwarî na atuunyani baîrî wana bo baambîîtwe agu akubî na ara Yiesû aambîîtwe. Ûmwe aarî rûteere rwa ûrîo na ûra ûngî rûteere rwa ûmotho. 39 Bara baakûrûkagîîra agu Yiesû aambîîtwe, bamwona aambîîtwe bakamûgiitithia irumi na bakainainia biongo 40 bakiugaga, “Anga ingî kaayia ti woû ûraugaga ûkomborania Nyomba ya Ngai na ûmîake kaîrî yûyûre na ntugû ithatû! Wegua ûrî Mwana wa Ngai ta îbaambûre agu ûrî!”
41 Wana *athînjîri bara banene ba Ngai, aarimû ba watho na akûrû baamûnyûrûntaga bakauga, 42 “Naroonokagia bara bangî îndî we atikûûmba kwîbonokia na ingî kaayia i mûnene wa Isiraeri. Ta neebambûre agu aambîîtwe, tûmwîtîgie! 43 Na n'ûntû eetîgîîtie Ngai, Ngai ûyu îîndî ta namûteethie wegua nakwenda, twone, n'ûntû ingî araugaga we i Mwana wa Ngai.” 44 Na kinya atuunyani babu baambanîrîtue na Yiesû nwabu baamûkûthagîîria irumi.
Yiesû aakua
45 Kwanjîîria mûthenya gatî mwanka thaa kenda, mwindu waruma nthîgûrû yonthe. 46 Na ta thaa inu kenda, Yiesû aagondoka na inya mûno. Auga, “Eloi, Eloi, lama sabakithani?” Tûgîtaûra, ûgu i ta kuuga, “Ngai wakwa, Ngai wakwa, i kî n'ûntû wantiganîria?”
47 Antû bamwe ba bara baarî oogo bakwîgua Yiesû akiuga ûgu bauga, “Muntû ûyû i kîroria Eriya agwîta!”
48 Muntû ûmwe augia rwîro aathi aathûkia cibonji amîtombeka ndibeini yarî na gana, rîru amîogeera mûthiani wa kamûtî, amîtiirithia mîromo ya Yiesû amûkundia. 49 Îndî bara bangî bamwîra, “Tiga. Ga twone ingî kana wegua Eriya akaaya amwonokie.”
50 Yiesû aagondoka na inya mûno kaîrî agîîkaîra, aanyaarûka. 51 Na warîru, gîtambaa kîra kîagaanîîtie Nyomba ya Ngaia gîatembûkana maita maîrî kîganeene, kuuma îgûrû mwanka nthî. Nthîgûrû yainaina, ndwara cia maiga ciatûkanga. 52 Nthiko ciarugûka mîîrî ya atheru bara baarî bagûkua yariûka. 53 Na rîra Yiesû aarîûkire atheru babu bauma nthikooni baathi bwa taûni îra ntheru ya Njerusaremu antû baingî baboona.
54 Mûtongoria wa njûûrî ya acikaarî na bara baarî n'we agu bakarîîtie Yiesû, bakwona nthîgûrû yainaina na bûra gwakarîkire baagwatwa i kîmako kîînene mûno. Bauga, “Na mma muntû ûyû araarî Mwana wa Ngai.”
55 I kwarî na eekûrû baingî mma baacûûbîîrîîtie barî gataaria. Eekûrû babu baathingatîîte Yiesû kuuma Gariiri bakîmûmenyagîîra. 56 Bamwe baao baarî Maria Mûmagindari, Maria gina wa Njakubu na Njosebu, na mwekûrû wa Sabendi.
Yiesû aathikwa
57 Ûgoro mbere riûa rîthwa, muntû ûmwe eetagwa Njosebu wa kuuma ntûûra ya Arimathea aaya. Njosebu aarî gîtonga na aarî ûmwe wa arutwa ba Yiesû. Akûûya, 58 aathi kîrî Piraatû amwîra amwîtîgîîrie athûkie mwîrî wa Yiesû akauthike. Piraatû eetîgîîria auga anenkerwe. 59 Njosebu aambûra mwîrî wa Yiesû, acuoga na cuka, 60 aukamata authûngîria nthikooni yake eenjîîte bantû rwaraani rwa iiga. Rîru aingiritia iiga rîînene mûno aakunîkîra narîo mûromo wa nthiko, aathi. 61 Rîru aarûthaga ûgu, Maria Mûmagindari barî na Maria ûra ûngî baamûcûûbîîrîîtie barî mbarî îra îngî ya nthiko.
Nthiko yakarua
62 Rûûni ntugû ya *Sabatû, *athînjîri bara banene ba Ngai na *Afarisai baathi kîrî Piraatû. 63 Bamwîra, “Ngabana, n'ûntû rîra mûûrongo ûra araarî mwoyo araugaga akaariûka ntugû ya ithatû, 64 uga nthiko yake îkarue bwega mwanka ntugû ithatû ithire bûra arutwa baake bataûmba kûthi baiya mwîrî wake, rîru beera antû narariûkire. Gûgakarîka ûgu ûrongo bûbu bwa mûthia i bu bûnenea nkûrûki ya bûra bwa mbere.”