Yiesû airwa kîrî Piraatû
23
1 Gîkundi gîa antû bonthe bara baagambithagia Yiesû bamwira kîrî Piraatû. 2 Bamûthitanga bauga, “Twîthîîre muntû ûyû akîrutana antû mantû mataagîrîte akîbeeraga batikaarûnge ûgooti kîrî Kaisaarî. Na ariugaga we n'we Kîrîstû, na i mûnene.”3 Piraatû aûria Yiesû, “I woû mûnene wa Ayaundi?”
Yiesû amwîra, “Nwa ta ûgu wauga.”
4 Piraatû eera *athînjîri bara banene ba Ngai na kîrîndî kîra kîngî, “Niû ntikwona mabîtia mara muntû ûyû arûthîîte.”
5 Bonthe baakinyîîria mantû mamu na inya mûno bauga, “Mantû mara arutanîîte antû ba Njundea yonthe imareeteete thîîna. Aanjîîrie mantû mamu Gariiri na îîndî nwa mo mama areeteete naaga.”
Yiesû airwa kîrî Eronde
6 Piraatû akwîgua ûgu, aûria, “Ka muntû ûyû arî wa kuuma Gariiri?” 7 Akwîrwa Yiesû aarî wa kuuma rûteere rûra rwathagwa n'Eronde, auga nairwe kîrî Eronde n'ûntû Eronde naarî Njerusaremu kagiita gaku.
8 Eronde akwona Yiesû aakena mûno n'ûntû kuumania na bûra eegîîtue, kwa îgiita rîîraaya neendeete mûno kwona Yiesû akîringa kîama. 9 Yiesû akwirwa kîrî we, Eronde amûûria biûria biingî. Îndî Yiesû aarega kûmûcookeria. 10 *Athînjîri bara banene ba Ngai na aarimû ba watho beethîrana agu baatuîrîîra Yiesû na taka. 11 Eronde na acikaarî baake baanyûrûnta Yiesû bamûbûthîîria. Bamwîkîra nguo ya goro îndaaya. Eronde auga acookue kîrî Piraatû. 12 Kuuma ntugû înu, Eronde na Piraatû baatuma ûcoore n'ûntû ibaameneene mbereeni.
Yiesû aagiitîrwa îgamba aûragwe
13 Piraatû eeta *athînjîri bara banene ba Ngai, atongoria, na antû bonthe. 14 Abeera, “Bûndeteere muntû ûyû bwauga nakûrutanaga antû mantû mataagîrîte, îndî nkûmûûria wana biû bûrî oogo, ntiroona mabîtia mara arûthîîte kîrî mantû mara bûmûthitangîrîte. 15 Wana kinya Eronde atiroona mabîtia maake. I ntûma auga nacookue kîrî tiû. Gûtirî bu muntû ûyû arûthîîte bûra bûûmba gûtûma aûragwa. 16 Kwoogu nkauga aringwe ibooko mmûrekeerie athi.” [ 17 Rîonthe kagiita ga kîatho gîa *Pasaka gaakinya, bwarî wîthîre mûgwate ûmwe athaûragwe.]a
18 Antû bonthe baugîîria bauga, “Naûragwe! Baraba nathaûrwe!” ( 19 Kûrî kagiita gîtuma gîaûkîîte taûni ya Njerusaremu. Baraba n'we eengîîre antû baagoma, na aarî mûûragani. Na gîku i kîo gîatûmîîte agwatwa athaîkwa nceera.)
20 Piraatû aaria na antû kaîrî akîenda kûrekeeria Yiesû. 21 Îndî antû baugîîria bauga, “Mwambe! Mwambe!”
22 Rîa mathatû, Piraatû abaûria, “Ka muntû ûyû arûthîîte mabîtia marîkû? Ntikwona bûra arûthîîte bûra bûûmba gûtûma aûragwa! Kwoogu nkauga aringwe ibooko mmûrekeerie athi.”
23 Îndî amwe na ûgu kîrîndî kîathi na mbere na kuugîîria na inya mûno gîkiugaga Yiesû nambwe. Baacookeeria ûgu kaîrî na kaîrî, mwanka Piraatû eetîgîîria. 24 Piraatû aagiitîra Yiesû îgamba kûringana na bûra antû beendaga. 25 Aathaûra ûra antû baugire n'we bakwenda abathaûrîra, ûra aathaîkîîtwe atûmîîte antû baûkia gîtuma, mûûragani. Rîru aanenkanîra Yiesû kûringana na bûra antû beendaga.
Yiesû aambwa
26 Acikaarî bathiîte kwamba Yiesû baarîîkana na muntû eetagwa Simioni aumîîte mûndaani. Baathûkia mûtharaba wa Yiesû bamûkamatithia arî nyuma yake. Simioni aarî wa kuuma gûntû gwetagwa Kureni.
27 Antû baingî mûno baathingata Yiesû. Kîrî bo i kwarî na eekûrû baamûrîragîra barî na kwîthikîîra kûûnene. 28 Yiesû aûndûka eera eekûrû babu, “Biû eekûrû ba kuuma Njerusaremu bûtikaandîrîre. Îîrîrîreeni bwingwa na bûkîrîra aana beenu! 29 Îgiita rîgaakinya rîra antû bakauga ‘I baathaarime eekûrû bara bataagîa na twana. I baathaarime bara bataagîa na twana twa gwonkia!’ 30 Îgiita rîru, kûrî antû bakeera irîma, ‘Tûthiîkeeni!’ Na bangî beere tûrîma, ‘Tûkunîkîreeni!’ 31 Ûkoona i muntû ûmwagîru akûnyamaara ûûgû rî, î bara batarî baagîru bakaanyamaara bûgana ata?”b
32 I kwarî na atuunyani baîrî baathiîte kûûragwa Yiesû akîûragwa. 33 Bagûkinya bantû eetagwa “Kîîndî gîa kîongo,” baamba Yiesû na atuunyani babu baîrî oogo. Mûtuunyani ûmwe aarî rûteere rwa ûrîo, ûyu ûngî rwa ûmotho.
34 Yiesû aarombera bara baamwambire auga, “Barekere, Baaba! Batikûmenya bûra bakûrûtha.” Acikaarî baathûkia nguo cia Yiesû bairingîra kuura boona nguo îra muntû agaacinda, athi n'yo.
35 Kîrîndî kîarûngama kîîthaîra mantû. Atongoria ba Ayaundi baanyûrûnta Yiesû bauga, “Naroonokagia bara bangî. Taneebonokie ingî wegua n'we Kîrîstû ûra athuurîîtwe i Ngai.”
36 Acikaarî bakînyûrûnta Yiesû wana bo baathi bamûkundia ndibei yarî na gana. 37 Bamwîra, “Teebonokie ingî wegua ûrî mûnene wa Ayaundi!”
38 Îgûrû rîa kîongo kîa Yiesû agu mûtharabaani i baaringaringîrîte kabaaû kaandîkîîtwe, “ÛYÛ I MÛNENE WA AYAUNDI.”
39 Ûmwe wa atuunyani babu aaruma Yiesû amwîra, “Anga ti woû Kîrîstû? Aabu ûteebonokie ûgîtwonokia na tiû!”
40 Mûtuunyani ûyu ûngî aagondokera ûyu wa mbere akîmûkaania. Amûûria, “Woû ka ûtagûkuthûka Ngai wana wegua twagiitîrwa îgamba bûmwe n'we? 41 Rîetû tiû twagiitîrwa kûringana na bûra tûrûthîîte. Îndî we gûtirî ûthûûku arûthîîte.”
42 Mûtuunyani ûyu wa baîrî eera Yiesû, “Wakinya ûneneeni bwaku, ûndirikane!”
43 Yiesû amwîra, “Îmunthî ga ngûkwîra, ûkeegua ûrî amwe naani îkenero.”c
Yiesû aakua
44 Kwanjîîria ta mûthenya gatî mwanka thaa kenda, mwindu waruma nthîgûrû înu yonthe. 45 Gîtambaa kîra kîagaanîîtie Nyomba ya Ngai gîatembûkana maita maîrî.d 46 Yiesû aagondoka na inya mûno auga, “Baaba, ndaiga mwoyo wakwa ûmenyeerini bwaku” Akuuga ûgu, aanyaarûka.
47 Mûtongoria wa acikaarî akwona bûra gwakarîkire aakumia Ngai. Auga, “Na mma muntû ûyû araarî ûmwagîru!”
48 Antû bonthe bara beethîreene oogo bakîona bûra gûgaakarîka bakwona ûgu beenûka bakîringaringaga i bara biao i kîîthikîîro. 49 Antû bonthe bara baiyeene na Yiesû na eekûrû bara baamûthingatîîte kuuma Gariiri baacûûbîîrîîtie barûngi gataaria.
Yiesû aathikwa
50 I kwarî na muntû eetagwa Njosebu wa kuuma gataûni ka Arimathea, gîteere kîa Njundea. Aarî muntû ûmwega na ûmwagîru. 51 Aakaraga eeteereete kûûya kwa ûnene bwa Ngai. Aarî ûmwe wa akîama, îndî we ateetîganîîria na mûbango wa akîama bara bangî wa kûûraga Yiesû. 52 Muntû ûyu aathi kîrî Piraatû amwîra amwîtîgîîrie athûkie mwîrî wa Yiesû akauthike. 53 Njosebu aambûra mwîrî wa Yiesû, acuoga na nkûngû. Aukamata aathûngîria nthikooni yenjîîtwe rwaraani rwa iiga. Nthiko înu îtaathikîîtwe muntû ûngî. 54 Kwarî ntugû ya Ncumaa,e na *Sabatû n'yarî akubî kwanjîîria.