Atongoria ba Ayaundi baabînda njûri ya kûûraga Yiesû
26
1 Yiesû akûthiria kweyana ngerekano inu cionthe eera arutwa baake, 2 “I bwiyî kîatho gîa *Pasaka i gîa aûke. I rîo Mwana wa Muntû akaanenkanîrwa akambwe mûtharabaani.”3 *Athînjîri bara banene ba Ngai na akûrû beethîrana amwe nyomba ya Kayafas ûra aarî mûthînjîri ûra mûnene wa Ngai. 4 Baanjîîria gûcûa bûra Yiesû akîgwatwa na ûûme bakamûûragithia. 5 Îndî baugîîte batimûgwata ntugû ya kîatho n'ûntû boonaga bamûgwata antû i bagaûkia gîtuma.
Mwekûrû ûmwe oonoreeria Yiesû maguta kîongo
6 Ntugû îmwe Yiesû naarî Bethania gwa Simioni ûra aayîîtue mûtigiri. 7 Mûka ûmwe aaya na cûûba yarûthîîtwe na iiga rîa goro yûyûri mîtaa ya goro mûno. Yiesû akîrîîyaga, mûka ûyu oonoreeria mîtaa înu kîongo gîake.
8 Arutwa ba Yiesû bakwona ûgu baathûûra. Baanjîîria kûûrania, “I kî n'ûntû îîndî mwekûrû ûyu akwînyangia maguta mama ûûgû? 9 Îîndî makîendiirue matikiuma mbia inyingî ikagaîrwa nkîa!”
10 Yiesû akwîgua ûgu abeera, “I mbi bûkûmûûria? Akûndûtha ûntû bwega. 11 Gûtirî rîo nkîa ikaathira, îndî niû îgiita irîengeerie gûkinya tûtigane. 12 Rîra antûûrîria mîtaa mwîrî akuuthuuranîra kûthikwa. 13 Na mma ga nkûbwîra, bantû onthe ara ntheto îmbega îgaatûmîîrua gûkû nthîgûrû, ûûgû mûka ûyû aarûtha bûkeeranagwa n'ûntû bwa kûmûririkana.”
Njundas eetîgîîria gûkunyanîra Yiesû
14 Ûmwe wa arutwa bara ba Yiesû îkûmi na baîrî ûra eetagwa Njundas Mûcikariota, aathi kîrî *athînjîri bara banene ba Ngai. 15 Abaûria, “I mbi bûgampa ndamûkunyanîra?” Baatara fetha mîrongo îthatû bamwaa. 16 Bakûgwatanîra, Njundas aanjîîria gûcûa kaanya keega ga gûkunyanîra Yiesû.
Yiesû aatûma arutwa baake bathi kûthuuranîra Pasaka
17 Ntugû ya mbere ya *kîatho kîa mîgaate îtaimbithîîtue, arutwa baathi kîrî Yiesû bamûûria, “I nakû ûkwenda tûthi gûkûthuuranîra biakûrîa bia *Pasaka?”
18 Yiesû abatûma abeera bathi Njerusaremu kwa muntû ûmwe bamwîre, “Mwarimû auga îgiita rîake rîrî akubî gûkinya na akaarîîra biakûrîa bia Pasaka amwe na arutwa baake gwaku.” 19 Kwoogu arutwa babu baathi baarûtha wa bûra Yiesû aabeerîîte, baathuuranîra Pasaka.
Kîatho kîa Mwathani
20 Ûgoro bûgûkinya Yiesû na arutwa baake baakara nthî kûrîa. 21 Yiesû abeera, “Na mma ga nkûbwîra, ûmwe kîrî biû agankunyanîra.”
22 Arutwa bakwîgua ûgu baagwatwa i kîeba. Baanjîîria kûmûûria ûmwe kwa ûmwe, “I niû, Mwathani?”
23 Yiesû abacookeria abeera, “N'ûmwe kîrî biû na i twîkanîîrie njara n'we mbakûriini. 24 Mwana wa Muntû agaakua wa ta bûra kwandîkîîtwe *Maandîkooni Maatheru. Îndî ûra akaamûkunyanîra, gîku na ti kînyamaara akoona. I kaaba atagîciarirwe!”
25 Njundas ûra aamûkunyanîîre amûûria, “Kana i niû, Mwathani?”
Yiesû amwîra, “Ûkuuga.”
26 Wa bakîrîîyaga, Yiesû aathûkia mûgaate aacookeria Ngai nkaatho. Na nyuma ya gûcookeria Ngai nkaatho, aung'enyûrania aunenkera arutwa baake. Abeera, “Thûkiani mûgaate ûyû bûrîe n'ûntû ûyû i mwîrî wakwa.”
27 Nyuma ya ûgu aacooka aathûkia gîkombe. Aacookeria Ngai nkaatho, aanenkera kîo arutwa baake. Abeera, “Îkundanaani. 28 Îno i nthakame yakwa îra îgeetûûrwa îrî rwano rwa kîrîîkanîro kîîyerû n'ûntû bwa antû baingî kûrekerwa meeyia maao. 29 Na ga nkûbwîra, ntiinyua ndibei îno kaîrî, tatiga îra tûkaanyua naabi ûneneeni bwa Baaba.”
30 Nyuma ya ûgu baina rwîmbo, baathi baatwa Karîmaani ka Mîceituuni.
Yiesû auga Petûrû akamûkaana
31 Yiesû abeera, “Ûtugû bûbû bwa îmunthî, biû bwinthe bûkaathi bûntige ninka n'ûntû kwandîkîîtwe *Maandîkooni Maatheru,
‘Nkaaringa mûrîîthi mmûûrage,
ng'ondu inyagaaranie.’
32 “Îndî ndariûka nkaathi Gariiri mbere yenu.”
33 Petûrû amwîra, “Wana wegua baba bangî bonthe bagagûtiga bathi, niû ntiithi ngûtiga.”
34 Yiesû eera Petûrû, “Na mma ga ngûkwîra, ûtugû bûbû bwa îmunthî mbere ya ngûkû îkurura, ûgaankaana maita mathatû.”
35 Îndî Petûrû aaremeeria na kûmwîra, “Wana wegua igûgaatuîka mbûragwe ûkîûragwa, ntigûkaana.” Arutwa bara bangî wana bo bonthe bauga wata Petûrû woogu.
Yiesû aaromba arî Ngethisemane
36 Bagûkinya bantû eetagwa Ngethisemane, Yiesû eera arutwa baake, “Karaani nthî aaga nthi nkarombe.” 37 Yiesû aathûkia Petûrû na aana bara baîrî ba Sabendi aathi nabo. Yiesû aagwatwa i kîeba na kîîthikîîro. 38 Abeera, “Inkwîgua ndî na kîeba mûno nkorooni yakwa akubî kinya kîmbûraga. Karagaani aaga na bûtikaamaame.”
39 Aathiiyanga gataaria, eeturania nthî, aaromba atiirithîîtie ûthiû nthî. Auga, “Baaba, wegua bwaûmbîka ruta gîkombe gîkî gîa kûnyamaarua mbere yakwa. Îndî rûtha bûra ûkwenda ti bûra nkwenda.”
40 Yiesû aûkîîra aacooka kîrî arutwa baake eethîra i bamaamire. Eeta Petûrû, “Petûrû!” Amwîra, “Bûtiraûmba gûkara bûtamaami nwa îthaa rîmwe nkîromba?” 41 Abeera, “Bûtikaamaame karagaani bûkîrombaga bwewa inya ya gûcinda magerio. Nkoro nîkwenda i mwîrî ûkûremwa.”
42 Yiesû aacooka kûromba rîa maîrî auga, “Baaba, wegua gûtiûmbîka ndutarutîrwa gîkombe gîkî mbere yakwa na nwa mwanka nkînyue, kwenda gwaku i kûrûthîke.”
43 Agûcooka kaîrî kîrî arutwa bara eethîra bamaamire kaîrî n'ûntû i baang'ontaga mûno. 44 Kwoogu abatiga, aacooka kûromba kaîrî rîa mathatû akiugaga mîgambo weera.
45 Akûthiria aacooka kîrî arutwa bara abaûria, “Î wana îîndî nwaka bûmaami bûnogokeete? Raithaani bwone. Îgiita rîgûkinya rîa Mwana wa Muntû kûnenkanîrwa kîrî antû ba meeyia. 46 Ûkîîraani tûthi. Eneeni, ûra aankunyanîrîte n'ûyu aayîîte!”
Yiesû aagwatwa
47 Yiesû akîaragia woogu, Njundas ûra aarî ûmwe wa arutwa bara baake îkûmi na baîrî aaya na mûkondo wa antû baakamatîîte ndûyiû na ncûgûma, batûmîîtwe *n'athînjîri bara banene ba Ngai na akûrû. 48 Njundas naarî akûbaathîîra bûra agaakunyanîra Yiesû. Aabeerîîte ûra bakoona aacunca bamenye n'we Yiesû, bamûgwate. 49 Njundas agûkinya ûgu, aathi kîrî Yiesû amwîra, “Mwarimû, muuga!” Amûcunca.
50 Yiesû amwîra, “Mûcoore, rûtha bûra bûgûkûreeteete.”
Warîru antû babu baathi baagwata Yiesû. 51 Mûrutwa ûmwe wa Yiesû aatambûrûkia njara, aacomoora rûûyiû aatema mûruti ngûgî ûmwe wa mûthînjîri ûra mûnene wa Ngai, amûgiita gûtû. 52 Yiesû amwîra, “Cookia rûûyiû rwaku ara rûkaraga. Aûragani na rûûyiû bonthe baûragagwa na rûûyiû wanabo. 53 Nûkûthûgaania nkîendire ntigîîta Baaba ûra arî îgûrû nkamwîra aandeetere njûûrî nkûrûki ya îkûmi na ciîrî cia araîka na akandeetera? 54 Îndî narîo n'ata *Maandîko Maatheru makaûyûranga mara maugîîte nwa mwanka mantû mamu makarîke woogu?”
55 Îgiitaani warîru Yiesû aûria kîrîndî, “Ka ndî mûtuunyani n'ûntû bwaya kûngwata na ndûyiû na ncûgûma? Anga ntugû cionthe tûtiratindaga naabi Nyomba ya Ngai nkîrutanaga na bûtirangwataga? 56 Îndî gûtirî ûntû n'ûntû gwakarîka ûgu kaingo Maandîko mara maandîkîîtwe n'iroria maûyûra.” Arutwa baake bonthe bamûtoorooka, baugia rwîro.
Yiesû aagambithua n'atongoria ba Ayaundi
57 Bara baagwatire Yiesû bamwira gwa Kayafas, ûra aarî mûthînjîri ûra mûnene wa Ngai, kûra aarimû ba watho na akûrû beethîreene. 58 Petûrû amûthingata arî gataaria mwanka baakinya. Aathûngîra aakara nthî amwe na aruti ngûgî eeteera oona bûra gûgaakara.
59 Athînjîri bara banene ba Ngai na kîama kîra kîarî oogo baacûa antû bagûtuîrîîra Yiesû kaingo aûragwa. 60 Antû baingî baatuîrîîra Yiesû, îndî kîama gîtoona gîtûmi kîa Yiesû kûûragwa. Mûthiani antû baîrî baarûngama 61 bauga beeguire Yiesû akiuga nwa oomboranie Nyomba ya Ngai akamîaka kaîrî na ntugû ithatû.
62 Bakuuga ûgu mûthînjîri ûra mûnene aarûngama. Aûria Yiesû, “N'ata ûkuuga ûrî woû? Gûtirî bu ûkuuga îgûrû rîa mantû mama antû baba bakuuga nûrûthîîte?” 63 Yiesû ataaria.
Mûthînjîri ûyu auga, “Ta thiîtia na Ngai ûra arî mwoyo ûtwîre wegua i woû Kîrîstû, Mwana wa Ngai.”
64 Yiesû amwîra, “Ûkuuga. Na ga nkûbwîra bûkoona Mwana wa Muntû akari rûteere rwa ûrîo rwa ûra arî inya. Na bûkoona aayîîte na matu kuuma îgûrû!”
65 Yiesû akuuga ûgu, mûthînjîri ûra mûnene aatembûra nguo yake wengwa ira eekîrîte,a auga, “Akûruma Ngai! N'ûgu îîndî, tûtikwenda ûkûûyî bûngî. Wana biû bûkwîgua. 66 Mbîîraani îîndî bûra bûgûtua.”
Bonthe baatua bauga, “Naûragwe.”
67 Antû bamwe ba kîama baanjîîria gûtuîra Yiesû mata ûthiû bakîmûringangaga. Bamwe kîrî bo bamûringanga makoobi 68 bakîmwîraga, “Kîrîstû, ta roria ûtwîre ûra akûringa!”
Petûrû aakaana Yiesû
69 Petûrû akari ome kîaragooni, mwarî ûmwe mûruti ngûgî wa mûthînjîri ûyu amwona. Aathi akubî n'we auga, “Wana woû i bûkûrî na Yiesû ûra wa kuuma Gariiri.”
70 Îndî Petûrû aakaana mbere ya bonthe bara baarî agu. Auga, “Wana ntikûmenya bûra ûkuuga.”
71 Petûrû aûkîîra aathi mwîrîgaani wa kîarago, eethîra antû bangî oogo. Mwarî ûngî tatiga ûyu wa mbere amwona. Eera bara baarûngi agu, “Muntû ûyû i bakûrî na Yiesû wa Nasareethi.”
72 Petûrû aakaana kaîrî. Aathiîtia auga, “Niû ntiiyî muntû ûyû.”
73 Nyuma ya kagiita gatarî karaaya, antû bara baarûngi amwe n'we wana bo baanjîîria kûmwîra, “N'ûmma ûrî ûmwe wao n'ûntû wana rwaria rwaku runka i rûkuuga.”
74 Petûrû eerîrîka wengwa, aathiîtia auga, “Ntiiyî muntû ûyû!”