Atongoria ba Ayaundi baabînda njûri ya kûûraga Yiesû
14
1 Ciatigeere ntugû ciîrî *Pasaka îkinya. Pasaka yarî ntugû ya mbere ya *kîatho kîa mîgaate îtaimbithîîtue. *Athînjîri bara banene ba Ngai na aarimû ba watho i baacûaga bûra Yiesû akîgwatwa na ûûme bakamûûragithia. 2 Îndî baugîîte batimûgwata ntugû ya kîatho n'ûntû boonaga bamûgwata antû i bagaûkia gîtuma.Mwekûrû ûmwe oonoreeria Yiesû maguta kîongo
3 Ntugû îmwe Yiesû arî Bethania gwa Simioni ûra aayîîtue mûtigiri, mûka ûmwe aaya bakîrîa irio. Mûka ûyu naarî na cûûba yarûthîîtwe na iiga rîa goro yûyûri mîtaa ya goro mûno ya matî meetagwa nandi îtaunganîîtue na gîntû kîngî. Akûûya aarebûra cûûba înu mûromooni ara yakunîkîîtwe, oonoreeria Yiesû mîtaa înu kîongo. 4 Bamwe ba bara baarî agu bakwona ûgu mûka ûyu aarûthire baathûûra n'we. Beerana, “N'ya kî mîtaa îno mûka ûyû eenyangia? 5 Îîndî mîtaa înu îkîendiirue îtikiuma mbia inyingî mûno igana îrîi rîa muntû wa kîbaarûa rîa mwanka unthe,a mbia inu ikagaîrwa nkîa?”
6 Yiesû abeera, “Rekanaani n'we! I mbi bûkûmûûria? Akûrûtha ûntû bwega. 7 Gûtirî rîo nkîa ikaathira. Kwoogu nwa bwîteethie rîonthe rîra bûkwenda. Îndî niû îgiita irîengeerie gûkinya tûtigane. 8 Bûra mûka ûyû aarûtha nwabu bunka akîûmba kûrûtha. Agwaka mwîrî wakwa mîtaa, authuuranîra kûthikwa. 9 Na mma ga nkûbwîra, bantû onthe ara ntheto îmbega îgaatûmîîrua gûkû nthîgûrû, ûûgû mûka ûyû aarûtha bûkeeranagwa n'ûntû bwa kûmûririkana.”
Njundas eetîgîîria gûkunyanîra Yiesû
10 Ûmwe wa arutwa bara îkûmi na baîrî ba Yiesû, ûra eetagwa Njundas Mûcikariota, aathi kîrî *athînjîri bara banene ba Ngai kûbangania nabo bûra akaabateetheeria kûgwata Yiesû. 11 Athînjîri babu ba Ngai baakena i mûbango ûyu. Beera Njundas bakamwaa mbia. Njundas aanjîîria gûcûa kaanya keega ga gûkunyanîra Yiesû.
Yiesû aatûma arutwa baake bathi kûthuuranîra Pasaka
12 Ntugû ya mbere yakinya ya *kîatho kîa mîgaate îtaimbithîîtue, i rîo kagondu ga *Pasaka kaûragagwa. Arutwa ba Yiesû bamûûria, “I nakû ûkwenda tûthi gûkûthuuranîra Pasaka?”
13 Yiesû aatûma arutwa baîrî. Abeera, “Îthiini taûni. Na bwakinya, bûthingate muntû ûra bûkaarîîkana n'we akamatîîte nyûngû îrî na rûûyî, 14 mwanka nyomba îra akaathûngîra. Aathûngîra, bûthûnganîrie n'we ku bwîre mwene nyomba, ‘Mwarimû auga ûtwonie kanyomba kara akaarîîra kîatho gîa Pasaka na arutwa baake.’ 15 Muntû ûyu, mwene nyomba, akabwonia kanyomba kaaneene ngorobaani kaathuuranîre kaigwa kîra gîntû. Gûku i ku bûkaathuuranîra kîatho.”
16 Arutwa babu baathi. Bakûthi mantû monthe maakarîka wa bûra Yiesû aabeerîîte, baathuuranîra kîatho gîa Pasaka.
Kîatho kîa Mwathani
17 Ûgoro bûgûkinya, Yiesû aathi nyomba înu na arutwa baake bara îkûmi na baîrî. 18 Bakîrîîyaga, Yiesû abeera, “Na mma ga nkûbwîra, ûmwe wenu akambîndîra njûri, ûmwe kîrî biû bûkûrîyanîra naani îîndî tûrî aaga.”
19 Arutwa bakwîgua ûgu baagwatwa i kîeba. Baanjîîria kwîra Yiesû woomwe kwa ûmwe, “Ti niû, i niû?”
20 Yiesû abeera, “N'ûmwe kîrî biû bûrî îkûmi na baîrî, ûra tûgûtombekanîria n'we mûgaate mbakûriini. 21 Mwana wa Muntû agaakua, wa ta bûra kwandîkîîtwe *Maandîkooni Maatheru. Îndî ûra akaamûkunyanîra kaingo aûragwa, gîku na ti kînyamaara akoona. I kaaba atagîciarirwe!”
22 Bakîrîîyaga, Yiesû aathûkia mûgaate, aacookeria Ngai nkaatho. Aung'enyûrania, aanenkera arutwa baake. Abeera, “Thûkiani, ûyû i mwîrî wakwa.” 23 Yiesû aathûkia gîkombe nakîo. Aacookeria Ngai nkaatho, aanenkera arutwa baake, bonthe bakundana kîra kîarî ku. 24 Yiesû abeera, “Îno i nthakame yakwa îra îgeetûûrwa n'ûntû bwa antû baingî, îrî rwano rwa kîrîîkanîro kîîyerû. 25 Na mma ga nkûbwîra, ntiinyua ndibei îno ya matunda ma mûcabiibû kaîrî, tatiga rîra nkaamînyua îrî înjerû ûneneeni bwa Ngai.”
26 Baina rwîmbo. Rwîmbo rûkûthira bauma baathi bwa Karîma ka Mîceituuni.
Yiesû auga Petûrû akamûkaana
27 Yiesû eera arutwa baake, “Wîtîgio bwenu bwinthe bûkabûringa nthî wa ta bûra kwandîkîîtwe *Maandîkooni Maatheru atî,
‘Nkaaringa mûrîîthi mmûûrage,
ng'ondu inyagaaranie.’
28 “Îndî ndariûka nkaathi Gariiri mbere yenu.”
29 Petûrû amwîra, “Wîtîgio bwa baba bangî bonthe nwa bûbaringe nthî, îndî ti niû!”
30 Yiesû amwîra, “Na mma ga ngûkwîra, ûtugû bûbû bwa îmunthî mbere ya ngûkû îkurura maita maîrî, ûgankaana maita mathatû.”
31 Îndî Petûrû aaremeeria na kwîra Yiesû, “Wana wegua igûgaatuîka mbûragwe ûkîûragwa, ntigûkaana!” Arutwa bara bangî wana bo bonthe bauga wata Petûrû woogu.
Yiesû aaromba arî Ngethisemane
32 Yiesû na arutwa baake baathi bantû eetagwa Ngethisemane. Yiesû eera arutwa baake, “Karaani nthî aaga nthi nkarombe.” 33 Yiesû aathûkia Petûrû, Njakubu na Njoana, aathi nabo. Yiesû aanjîîria kûgwatwa i kîeba na kwîgua atarî ûmûganîre. 34 Eera Petûrû, Njakubu na Njoana, “Nkorooni yakwa inkwîgua ndî na kwîthikîîra kûûnene mûno. Ndîîgua taka gûkaambûraga. Karagaani aaga na bûtikaamaame.”
35 Yiesû aathiyathiyanga gataaria kuuma agu baarî. Eeturania nthî, aaromba akîûragia kana wegua gûkîûmbîka atanyamaarue kagiitaani gaku. 36 Aarombire auga, “Abba, Baaba! Woû gûtirî ûntû bûkûrema. Ruta gîkombe gîkî gîa kûnyamaarua mbere yakwa. Îndî rûtha bûra ûkwenda, ti bûra nkwenda.”
37 Yiesû agûcooka kîrî arutwa bara bathatû eethîra i bamaamire. Eeta Petûrû, “Simioni!” Amwîra, “Koomaamire ingî? Ûtiraûmba gûkara ûtamaami nwa îthaa rîmwe?” 38 Abeera, “Bûtikaamaame karagaani bûkîrombaga bwewa inya ya gûcinda magerio. Nkoro nîkwenda i mwîrî ûkûremwa.”
39 Yiesû aacooka kûromba kaîrî akiugaga mîgambo weera. 40 Agûcooka kîrî arutwa bara eethîra i bamaamire kaîrî n'ûntû i baang'ontaga mûno. Arutwa babu baaga bwa kûmwîra. 41 Yiesû akuuma kûromba rîa mathatû, abeera, “Wana îîndî nwa bûmaami bûnogokeete? N'ûgu îîndî! Îgiita rîgûkinya rîa Mwana wa Muntû kûnenkanîrwa kîrî antû ba meeyia. 42 Ûkîîraani tûthi. Eneeni, ûra aankunyanîrîte n'ûyu aayîîte!”
Yiesû aagwatwa
43 Yiesû atirarîîkia kuuga bûra augaga, nthûti îmwe Njundas, ûmwe wa arutwa bara baake îkûmi na baîrî aaya na mûkondo wa antû bakamatîîte ndûyiû na ncûgûma. Antû babu baatûmîîtwe *n'athînjîri bara banene ba Ngai, aarimû ba watho na akûrû ba Kîîyaundi. 44 Njundas naarî akûbaathîîra bûra akaaboonangia Yiesû. Aabeerîîte, “Ûra ngaacunca, bûmenye ûyu n'we Yiesû. Bûmûgwate bûthi n'we bûmûkabîrîte bwega.”
45 Njundas agûkinya ûgu, aathi kîrî Yiesû amwîta, “Mwarimû!” Amûcunca. 46 Antû babu baakamatîîte ndûyiû na ncûgûma baagwata Yiesû. 47 Ûmwe wa arutwa ba Yiesû ûra aarî akubî n'we aacomoora rûûyiû. Aatema mûruti ngûgî ûmwe wa mûthînjîri ûra mûnene wa Ngai, amûgiita gûtû.
48 Yiesû abaûria, “Ka ndî mûtuunyani n'ûntû bwaya kûngwata na ndûyiû na ncûgûma? 49 Anga ntugû cionthe tûtiratindaga naabi Nyomba ya Ngai nkîrutanaga na bûtirangwataga? Îndî ingî gwakarîka ûgu kwingia *Maandîko Maatheru.” 50 Arutwa ba Yiesû bamûtoorooka bonthe, baugia rwîro baathi.
51 Mûthaka ûmwe eegererete cuka akî mwîrî naathingatîîte Yiesû. Wana we aagwatwa n'antû babu baagwete Yiesû, 52 îndî cuka yatharûka augia, aathi arî ûtheri.
Yiesû aagambithua n'atongoria ba Ayaundi
53 Antû babu baira Yiesû kwa mûthînjîri ûra mûnene wa Ngai. Gûku i ku *athînjîri bara bangî banene ba Ngai bonthe, akûrû, na aarimû ba watho beethîreene. 54 Petûrû abathingata arî gataaria baathûngîra gûku kwa mûthînjîri ûra mûnene wa Ngai. Petûrû aakara agu ome agîotaga mwanki na aruti ngûgî bara baarî oogo. 55 Athînjîri babu banene ba Ngai na njûri ya Ayaundi yonthe baacûa ûntû bûûthûûku bwa kuuga Yiesû ararûtha kaingo bamûtuîra kûûragwa, îndî baaga. 56 Akûûyî baingî baatuîrîîra Yiesû, îndî ûkûûyî bwao bûtaagwatanagîra. 57 Antû bamwe baarûngama baaria ûrongo bauga, 58 “Twegiirue muntû ûyû akiuga akomborania Nyomba ya Ngai îra yakîîtwe n'antû, aake îngî îtarî ya gwakwa n'antû na ntugû ithatû.” 59 Îndî amwe na ûgu, ûkûûyî bwao bûtaagwatanagîra.
60 Mûthînjîri ûra mûnene wa Ngai aarûngama mbere yao. Aûria Yiesû, “N'ata ûkuuga woû? Gûtirî bu ûkuuga îgûrû rîa mantû mama antû baba bakuuga nûrûthîîte?” 61 Yiesû ataaria amûcookeria kîûria gîake.
Mûthînjîri ûyu mûnene wa Ngai aûria Yiesû kîûria kîngî. Amûûria, “I woû Kîrîstû, Mwana wa Ngai ûra mûthaarime?”
62 Yiesû auga, “Yîî, i niû. Na îgiita rîkaaya bûkoona Mwana wa Muntû akari rûteere rwa ûrîo rwa Ngai, Mwene Inya. Na bûkoona aayîîte na matu, kuuma îgûrû!”
63 Mûthînjîri ûra mûnene wa Ngai aatembûra nguo yake wengwa îra eekîrîte.b Auga, “N'ûgu îîndî. Gûtirî ûkûûyî bûngî tûkwenda! 64 Bwinthe bûkwîgua bûra auga akîîganaania na Ngai. Mbîîraani îîndî bûra bûgûtua.”
Antû bonthe bauga Yiesû naabîtîîtie, na kwoogu abuîrîîte aûragwa. 65 Antû bamwe baanjîîria gûtuîra Yiesû mata na kûmûkunîka meetho bakamûringa bakamwîra, “Ta roria [ûtwîre ûra akûringa]!”c Acikaarî baathûkia Yiesû baathi n'we bakîmûringangaga.
Petûrû aakaana Yiesû
66 Mwarî ûmwe, mûruti ngûgî wa mûthînjîri ûra mûnene wa Ngai aakûrûkîîra agu Petûrû baakari ome bagîotaga mwanki. 67 Mwarî ûyu akwona Petûrû, amûcûûba kii. Amwîra, “Wana woû i bûkûrî na Yiesû wa kuuma Nasareethi.”
68 Petûrû aakaana auga, “Niû ntiiyî na ntikûmenya bûra ûkuuga.” Auma aarûngama mwîrîgaani. [Ngûkû yakurura.]d
69 Mwarî ûyu akwona Petûrû aathi aarûngama mwîrîgaani, eera bara baarûngi akubî n'we, “Muntû ûûra n'ûmwe wa bara baayaniirie na Yiesû.” 70 Îndî Petûrû aakaana kaîrî. Nyuma ya kagiita gaakai, antû bamwe baarûngi akubî na Petûrû bamwîra, “I mma ûrî ûmwe wa athingati ba Yiesû n'ûntû ûrî wa kuuma Gariiri.”