Baranaba na Saûrû baathuurwa baatûmwa
13
1 Kanica ya Antiokia i kwarî na iroria na bara baarutanaga bara bangî. Baarî Baranaba, Simioni (ûra kaîrî eetagwa “Muntû ûmûyirû”), Rukias wa kuuma Kureni, Manaeni ûra aakûranîîtie amwe na Eronde ûra eetagwa Antipas, na Saûrû. 2 Kagiita kamwe antû babu batîîrîrîte kûrîa irio n'ûntû bwa maromba, Kîrundu Ûmûtheru abeera, “Ndekeriani Baranaba na Saûrû barute ngûgî îra mbeetîîte baruta.” 3 Baathi na mbere na gûtîîrîra kûrîa irio, baaromba. Rîru babu bangî baigîîra Baranaba na Saûrû njara, babarekeeria baathi.Baranaba na Saûrû baatûmîîria Kupooro
4 Kwoogu Baranaba na Saûrû bagûtûmwa i Kîrundu Ûmûtheru, baathi taûni yeetagwa Serukia. Baatwa meeri baathi gîcîgîîrioni kîa îria gîetagwa Kupooro. 5 Bagûkinya taûni yeetagwa Saramis, baatûmîîria kiugo kîa Ngai *masinagoogiini ma Ayaundi. I baarî na Njoana Maariko wa kûbatûmîkagîra.
6 Baungurania Kupooro yonthe, baumîîra taûni yeetagwa Pafos. Beethîra muntû aaringaga biama eetagwa Bari-Yiesû. Aarî Mûyaundi na eebîtaga kîroria. 7 Magiita na magiita muntû ûyu beegagua barî na ngabana wa gîcîgîîrio gîku kîa îria. Ngabana eetagwa Serigias Paûrûs na aarî muntû ûmûûme mûno. Eeta Baranaba na Saûrû n'ûntû neendaga kwîgua kiugo kîa Ngai. 8 Îndî muntû ûyu aaringaga biama aakararia Baranaba na Paûrû akîenda ngabana ûyu atigeetîgie. (Eetagwa Erimas na Kîîngiriki.) 9 Saûrû, kaîrî eetagwa Paûrû, aûyûrîîtwe i Kîrundu Ûmûtheru aacûûba muntû ûyu, 10 amwîra, “Ûrî mwana wa Nkoma na mûnthû wa bûra bunthe bwega! Ûûyûri ûrongo bwa mîthemba yonthe na wenania. I rî ûgaatiga kûrutana kîînyume kîa ûmma bwa Mwathani? 11 Îîndî ka ûûre na inya ya Mwathani. Ûrîûra meetho na ûtiona werû bwa riûa kwa îgiita rîgana ûna.”
Nthûti îmwe gîntû gîakari ta ngooki înjirû gîakunîka Erimas meetho. Aanjîîria kwondaondia agîcûa muntû amûgwata njara. 12 Ngabana akwona ûgu gwakarîkire eetîgia arigarîîte mûno n'ûrutani bwa Mwathani.
Paûrû na Baranaba baatûmîîria Antiokia ya Pisindia
13 Paûrû na bara baarî nabo baatwa meeri. Bauma Pafos baathi taûni yeetagwa Periga, nthîgûrû ya Pamuburia. Njoana Maariko aathûkana nabo, aacooka Njerusaremu. 14 Paûrû na Baranaba bakuuma Periga baathi taûni yeetagwa Antiokia, nthîgûrû ya Pisindia. *Sabatû îgûkinya, baathi *sinagoogiini baakara nthîgûrû. 15 Ithoomo bikûthoomwa kuuma mabukuuni ma watho bwa Musa na ma iroria, atongoria ba *sinagoogi înu baatûmana babeera wegua barî na mîgambo bakîûmba kûûmîîria antû n'yo, nwa babeere yo.
16 Paûrû aarûngama aûkîîria njara, aanjîîria kwaria. Auga, “Antû ba Isiraeri na bara bûkuthûkaga Ngai, nthikîîriani! 17 Ngai wa antû ba Isiraeri aathuurire biûyûûyû bietû, aingîyia antû beetû rîra baarî Miisiri, abaruta ku na inya yake înene. 18 Na kwa bantû a mîanka ta mîrongo îna barî rwanda, Ngai naabamenyagîîra.a 19 Ngai naathiriirie mîgongo mûgwanja îra yatûûraga nthîgûrû ya Kanaani aanenkera nthîgûrû yao antû baake yatuîka yao. 20 Mantû mamu monthe maathûkiirie bantû a mîanka ta magana mana ma mîrongo îtaano.
“Ngai aacooka aatuîkithia agambithania atongoria mwanka îgiita rîa kîroria Samweri. 21 Antû bauga barîenda mûnene wengwa. Rîru i rîo Ngai aatuîkithiirie Saûrû wa Kisi mûnene, aathana mîanka mîrongo îna. Aarî wa mwîrîga wa Benjameni. 22 Ngai akûruta Saûrû ûneneeni, aatuîkithia Ndaundi mûnene. Ngai auga, ‘I ndaroonire Ndaundi wa Njesii n'we muntû ûra arûthaga bûra nkwenda. Akaarûtha bunthe bûra nkeenda arûtha.’
23 “Na Ngai athuurîîte Yiesû, ûmwe wa rûrîîyo rwa Ndaundi, atuîka Mwonokia wa Isiraeri, wa ta bûra eeyanire wîrane auga. 24 Mbere ya Yiesû aanjîîria ngûgî yake, muntû eetagwa Njoana naatûmîîrie antû bonthe ba Isiraeri abeera beerire meeyia maao babaatithue. 25 Njoana arî akubî kûthiria ngûgî yake, aûria antû, ‘Bûrîthûgaania ndî ûû? Ti niû ûra bûkûthûgaanîria. Ûyu aayîîte nyuma yakwa ntiagîrîte ûntû kinya mmûtharia ndigi cia iraatû biake.’
26 “Antû beetû, tiû rûciaro rwa Îburaîmu, na bara bûtarî Ayaundi bûkuthûkaga Ngai, ntûmwa îno ya wonokio îtûmîîtwe kîrî tiû. 27 Antû ba Njerusaremu na anene baao bataamenyaga Yiesû aarî ûû. Rîra baamûgiitîîre îgamba aûragwe i baingiirie mîgambo ya iroria îra îthoomagwa wa kîra mûthenya wa *Sabatû. 28 Wana bakwaga gîtûmi kîega gîa gûtûma aûragwa, beerire Piraatû arute watho Yiesû aûragwe. 29 Bakwingia ûroria bunthe kûringana na bûra kwandîkîîtwe *Maandîkooni Maatheru îgûrû rîa Yiesû, Yiesû aambûrwa mûtharabaani aigwa nthikooni. 30 Îndî Ngai amûriûkia 31 oonwa kwa îgiita rîîraaya i bara baathiyaniirie n'we rîra aumire Gariiri aathi Njerusaremu. Îîndî babu i bo akûûyî kîrî antû.
32 “Ntheto înu îmbega n'yo tûkûbwîra atî, wîrane bûra Ngai eere biûyûûyû bietû 33 îîndî i bu aingîîtie naati, rûrîîyo rwao. Na aingîîtie wîrane bûbu na njîra ya kûriûkia Yiesû, wa ta bûra kwandîkîîtwe gîcuncîîni kîa biîrî gîa Sabuuri atî,
‘Ûrî mwana wakwa, îmunthî ngûtuîka abaagu.’
34 “Ngai aamûriûkiirie kaingo atoora. Na ûûgû i bu kwandîkîîtwe mantûûni ma kûriûka gwake,
‘Nkabûthaarima ithaarimo biitheru na bia gwîtîgîka
wa ta bûra ndeerire Ndaundi.’
35 “Na kûrî bantû angî augîîte,
‘Ûtiireka Mûtheru waku oora.’
36 “Ndaundi akûthiria gûtûmîka kûringana na wendi bwa Ngai, aakua. Aathikwa, aathi kîrî biûyûûyû biake, oora. 37 Îndî ûra we Ngai aariûkiirie atoora.
38 “Kwoogu, antû beetû, ndîenda bûmenya atî, muntû ûyu n'we atûmîîte bûtûmîîrua mantû ma kûrekerwa meeyia. 39 Ûra wonthe amwîtîgagia naagîrithagua agakûûrwa mantûûni monthe, ûntû watho bwa Musa bûtaûmba kûrûtha. 40 Kwoogu menyeeraani bûra iroria biaugire bûtigaatuîkîke kîrî biû. Atî,
41 ‘Thikîîriani, biaa bibi!
Bûkaarigara, bûraûra!
Kûrî bu nkûrûtha wa bûrî mwoyo,
ûntû bûtagîîtîgia kinya
bûrî batarîîrie bwega.’ ”
42 Paûrû na Baranaba bakiumagarûka *sinagoogiini antû babeera baaye *Sabatû înu îngî babeere mantû mamu nkûrûki. 43 Antû bakuuma, Paûrû na Baranaba baathingatwa n'Ayaundi baingî na antû bataarî Ayaundi bara baarombaga Ngai. Atûmwa babu beekîra antû wîru babeera bakarage ûtugiini bwa Ngai.
44 Sabatû înu îngî îgûkinya, akubî antû ba taûni înu yonthe beethîrana kwîgua kiugo kîa Mwathani. 45 Ayaundi bakwona wingî bwa kîrîndî baagwatwa i rûriitho rwingî mûno. Baakararia bûra Paûrû augaga na bamûrumanga. 46 Paûrû na Baranaba baaria na ûcamba beera Ayaundi babu, “I kwarî na gîtûmi gîa kiugo kîa Ngai gûtûmîîrua kîrî biû mbere. Îndî n'ûntû bûkûrega na bwona bûtiagîrîte kwewa mwoyo wa tene na tene, ga tûtûmîîrie bara batarî Ayaundi. 47 N'ûntû Mwathani aatwîrire,
‘Ngûtuîkithîîtie werû kîrî antû bara batarî Ayaundi
ûtambia wonokio bûkinya nteere cionthe cia nthîgûrû.’ ”
48 Bara bataarî Ayaundi bakwîgua ûgu baakena. Baakumia Mwathani n'ûntû bwa ntûmwa yake. Na bara Ngai aathuurire bakoona mwoyo wa tene na tene, beetîgîra.
49 Kiugo kîa Mwathani gîatamba gûntû gûku kunthe. 50 Îndî Ayaundi beengîîra aka bangî baarî îgweta baarombaga Ngai, na arûme kinya bo baarî îgweta. Baatûma Paûrû na Baranaba banyamaarua. Babeengîîria bauma kwao. 51 Paûrû na Baranaba baatiga babaturaturîra tîîri ya mbayo ciao, rûrî rwano rwa kûboonia batirî ngwatanîro nabo. Baathi taûni yeetagwa Ikoniamu. 52 Îndî eetîgîri baatigirwe bakeneete mûno na booyûrîîtwe i Kîrundu Ûmûtheru.