Kûnyamaarua gwa eetîgîri
8
1 Saûrû oona ûntû bûbu bwa kûûragwa gwa Stifini bûrî bwega. Na kuuma ntugû înu eetîgîri bara baarî Njerusaremu baanjîîria kûnyamaarua mûno. Baanyagaarania bonthe baathi bwa Njundea na Samaria, tatiga atûmwa bonka. 2 Antû bamwe baakuthûkaga Ngai baathûkia kiimba gîa Stifini baathika, baakara na kîeba kîînene. 3 Saûrû aatua kûthîînia eetîgîri. Aathiiyaga wa kîra mûciî akabaruta nyomba bonthe, aka na arûme akabathaîkithia.Ntheto îmbega yatambua nthîgûrû ya Samaria
4 Eetîgîri babu bakûnyagaarania baathiire bagîtûmagîîria kiugo gûntû na gûntû. 5 Ûmwe wao eetagwa Firibû aathi taûni ya Samaria aatûmîîria mantû ma Kîrîstû. 6 Antû baingî beegua bwega mantû mara Firibû aaragia. Na wabathikîîrîîtie i boonaga biama bira aaringaga. 7 Firibû neengatagia irundu biingî biithûûku bikauma kîrî bara beegagua barî nabio. Aabiîngatagia bikauma bigîkayaga na inya. Na nooriirie bionje biingî na ithua biingî. 8 I kwarî na gîkeno kîînene taûni înu.
Simioni na biama biake
9 Taûniini înu i kwarî na muntû eetagwa Simioni. Aaringaga biama akarigaria antû ba Samaria, akîboonagia aarî muntû wa gîtûmi. 10 Bonthe baanene na baaniini i baamwîtîgîîtie. Baugaga, “Ûyû n'we inya ya Ngai îra yîtagwa inya înene.” 11 Baamwîtîgîîtie n'ûntû naabarigarîîtie na biama bibu aaringaga kwa îgiita rîîraaya. 12 Antû bagwîtîgia ntûmwa îra Firibû aabatûmîîrie îgûrû rîa ûnene bwa Ngai na mantû ma Yiesû Kîrîstû, baabaatithua bonthe, aka na arûme. 13 Simioni wana we eetîgia. Akûbaatithua aatua kûthiiyanagia na Firibû. Akwona biama biinene na iriga bira Firibû aaringaga, aarigara mûno.
14 Atûmwa bara baarî Njerusaremu bakwîgua antû ba Samaria i beetîgîîre kiugo kîa Ngai, baatûma Petûrû na Njoana noogo. 15 Petûrû na Njoana bakûûya baarombera eetîgîri babu kaingo beewa Kîrundu Ûmûtheru 16 n'ûntû Kîrundu Ûmûtheru ataarî akûbeendamîîra. Îndî i baarî bakûbaatithua kwa riîtwa rîa Mwathani Yiesû. 17 Kwoogu, Petûrû na Njoana babaigîîra njara. Bonthe baagîa na Kîrundu Ûmûtheru.
18 Simioni akwona atûmwa baigîîra antû njara baagîa Kîrundu Ûmûtheru, eenda kwaa Petûrû na Njoana mbia. 19 Abeera, “Mpaani inya înu na niû kaingo ûra nkaigîîra njara agîa Kîrundu Ûmûtheru.”
20 Petûrû amûcookeria amwîra, “Ûraûra na mbia ciaku, n'ûntû ûrîthûgaania wagûra kîewa kîa Ngai na mbia. 21 Ûtirî ûmwe wetû ngûgîîni îno n'ûntû nkoro yaku îtigûkenia Ngai. 22 Kwoogu îîrire ûthûûku bûbû na ûrombe Ngai akûrekere îthûgaanio rîru ûrî narîo nkorooni, rîîthûûku. 23 Ndîgûcûûba ûgu nkoona ûrî na rûriitho mûno na ûtaîtwe i meeyia.”
24 Simioni eera Petûrû na Njoana, “Ndomberaani Mwathani bûrî biû ntikoone ûntû nwa bûmwe bwa mamu bwambîîra.”
25 Petûrû na Njoana beeyana ûkûûyî bwao kîrî antû baatûmîîria kiugo kîa Mwathani. Bakûthiria baacooka Njerusaremu wa bagîtûmagîîria taûni inyingî cia Samaria.
Firibû na Mûethiopia
26 Mûraîka wa Mwathani aaria na Firibû amwira, “Îndama na barabara îra yumîîte Njerusaremu yakûrûkîîra rwanda îthiîte Gasa.” 27 Firibû eendamîîte n'yo oona Mûethiopia ûmwe aarî ûmûkabe eenûkîîte aumîîte Njerusaremu kûromba Ngai. Aarî mûrûngamîîri wa mbia cia Kandaki, mûka ûra aathanaga nthîgûrû înu. 28 Mûethiopia ûyu aakamatîîtwe i nkaarî ya mbaraathi akîthoomaga îbuku rîa kîroria Isaya. 29 Kîrundu eera Firibû, “Îthi nkaarîîni îîra.”
30 Firibû augia rwîro amûgwatagwata. Eegua mûnene ûyu akîthooma îbuku rîa kîroria Isaya. Firibû amûûria, “Nûgûciûkîrwa i bûra ûkûthooma?”
31 Mûnene ûyu amûûria, “N'ata mbûmba gûciûkîrwa ntarî na muntû wa gûntaûrîra?” Eera Firibû atwe nkaarîîni bakare n'we.
32 Gîcuncî kîa *Maandîko Maatheru kîra aathoomaga kîaugaga,
“Aatongoreerue ta ng'ondu îthiîte kûthînjwa,
ta kagondu kamaarîîrîîte gakîenjwa guaya,
ataatumûra kanyua.
33 Aarûthîîrwe mantû ma îgi na ûmma bûtaathingatwa.
Gûtirî we auga naiyî nciarwa ciake
n'ûntû ntugû ciake cia aaga nthîgûrû i ciathirire.”
34 Mûethiopia ûyu aûria Firibû, “Ingûkûûria, n'ûû kîroria gîkwarîîria aaga? I kîo kîongwa kana i muntû ûngî?” 35 Firibû aanjîîria rwaria rwake na gîcuncî gîku, amwîra ntheto îmbega îgûrû rîa Yiesû.
36 Bathiîte baakinya bantû kwarî na rûûyî. Mûethiopia eera Firibû, “Ene, I rûûrû rûûyî. Ga kûrî kîo kîûmba kûndigîîria ntikaabaatithue?”
Mûethiopia eera Firibû, “Ingwîtîgia Yiesû Kîrîstû i Mwana wa Ngai.”a ] 38 Mûethiopia auga nkaarî îrûngamue. Baathûngîra rûûyîîni na Firibû. Firibû amûbaatithia. 39 Bakuuma rûûyîîni, Kîrundu wa Mwathani aathûkia Firibû. Mûethiopia ataamwona kaîrî. Aathi na mbere na rûgendo rwake akeneete. 40 Firibû eebona arî taûni yeetagwa Asotas. Aanjîîria gûtûmîîria oogo, aathi na mbere agîtûmagîîria ntheto îmbega taûni cionthe mwanka aakinya taûni yeetagwa Kaisaria.