Stifini eetheteera
7
1 Mûthînjîri ûra mûnene wa Ngai aûria Stifini, “Mantû mamu i ma mma?”2 Stifini aacookia auga, “Aruayia na babaaba, thikîîriani mbwîre! Ngai wa mwago eebonaniirie kîrî kîûyûûyû gîetû, Îburaîmu, warî Mesopotamia mbere ya athaamîra Arani, 3 amwîra, ‘Thaama nthîgûrû yenu ûtige antû beenu ûthi nthîgûrû îra ngaakwonia!’
4 “Îburaîmu aathaama nthîgûrû îra baatûîre ya Karindea aathi aatûûra Arani. Îthe agûkua aathaama aaya aatûûra gûkû bûtûîre îîndî. 5 Îndî Ngai ataamwaa nwa îkinya rîmwe rîa nthîgûrû îno rîtuîka rûgai rwake. I wîrane aamwere amwîra akamwaa îtuîke yake na rûrîîyo rwake, kinya wegua kagiita gaku Îburaîmu ataarî akûgîa na kaana. 6 Ngai aamwîrire ûûgû, ‘Nciarwa ciaku ikeegua irî ageni ndeeni ya nthîgûrû îngeni, bakainyîîrua barî nkombo gwa kagiita ka mîanka magana mana. 7 Naani, nkaanenkera nthîgûrû îra bagatûmîkîra barî nkombo îkaanûkia. Na nyumaani mbarute gûntû gûku baangonge barî aaga.’ 8 Ngai aarîîkanîîre na Îburaîmu, aatuîkithia rûtaano rwano rwa kîrîîkanîro gîku. Kwoogu Îburaîmu agûciara Isaka amûtaana arî na ûkûrû bwa ntugû inyanya. Nyumaani Isaka n'we aaciara Njakubu, Njakubu aaciara nthaka îkûmi na ciîrî, biûyûûyû bira bietû îkûmi na biîrî.
9 “Biûyûûyû bibu biegua Njosebu rûriitho. Bamwendia athi gûtuîka nkombo nthîgûrû ya Miisiri, îndî Ngai naarî amwe n'we. 10 Amûruta kûnyamaaruani kûra kunthe aanyamaaragua. Amwaa ûûme na aatûma akenia Faraû, mûnene wa Miisiri. Mûnene amûtuîkithia ngabana wa Miisiri na mûrûngamîîri wa nyomba yake.
11 “I kwarî na yûûra rîînene mûno gûku nthîgûrû ya Miisiri yonthe na ya Kanaani. Kwagîa kînyamaara kîînene mûno. Biûyûûyû bietû biaga irio. 12 Njakubu akwîgua i kwarî na ngano Miisiri, aatûma biûyûûyû bietû bithi kûthûgûra rîrî îgiita rîa mbere kûthi Miisiri. 13 Bakûthi kûthûgûra rîa maîrî Njosebu eemenyithania kîrî aruagina. Faraû aamenya aruagina babu ba Njosebu. 14 Njosebu aatûmana kîrî îthe, Njakubu, na antû baao bara bangî baaya Miisiri. Bonthe baarî antû mîrongo mûgwanja na bataano. 15 Kwoogu, Njakubu baathaamîra Miisiri. Naagu i noogo aakuîrîîre. Na kinya biûyûûyû bira bingî bietû nwa noogo biakuîrîîre. Îndî 16 mîîrî yao yairirwe Sekemu, baathikwa nthikooni ira Îburaîmu aagûrîrîte aana ba Amori mbia igana ûna.
17 “Kagiita karî akubî kara Ngai augîîte akaingia wîrane bûra eerire Îburaîmu, wegua antû beetû bara baarî Miisiri ibaarî bakwingîa. 18 Mûnene ûngî ataiyî Njosebu na antû baao aatuîka mûnene wa Miisiri. 19 Mûnene ûyu aacegeera antû beetû abanyamaaria. Auga bateeyage tûgenke twao twaciarwa kaingo tûkua.
20 “Îgiitaani rîru i rîo Musa aaciarirwe. Kaarî kaana kaathongi mûno meethooni ma Ngai. Agûciarwa, aciari baake bamwitha nyomba yao bantû a mîeri îthatû. 21 Akwithûrwa nyomba, mwarî wa Faraû amûthûkia amûrera ta mwana wake. 22 Musa aathoomithua mantû mara monthe Amiisiri baathoomaga, aûmea. Aatuîka muntû wa îgweta kuumania na mîgambo îra aaragia na mantû mara aarûthaga.
23 “Musa arî na mîanka mîrongo îna, aathûgaania kûthi kûriûngîra antû baao ba Isiraeri. 24 Akûthi oona ûmwe wao agîturwa i Mûmiisiri. Musa aathi gûtunyûkia muntû wao. Akîrîithia aûraga Mûmiisiri. 25 Aathûgaanagia ûtakîîgua antû baao ibaamenyaga atî Ngai akîmûtûmîra akabakûûra, îndî nabo bataaciûkîrwa bamenya ûgu. 26 Rûûni rwa ntugû înu, Musa eethîra Aisiraeri baîrî bakîrûaga. Musa aacûûgia kûbeeguithania. Abaûria, ‘Anga bûtirî ta muntû na mûruagina, itû aba. I mbi bûkûrwîra?’ 27 Ûra aacûîrîrîîte ûra ûngî ûgîti aatiindîka Musa. Amûûria, ‘N'ûû agûtuîkithîîtie mûnene wetû na mûtûgiitîri magamba? 28 N'ûkwenda kûmbûraga ta bûra ûraûragire Mûmiisiri ûra îgoro?’ 29 Musa akwîgua ûgu aatoorooka, auma nthîgûrû înu. Aathi gûtûûra nthîgûrû yeetagwa Mindiani. Arî noogo aagûrana aaciara nthaka ciîrî.
30 “Nyuma ya mîanka mîrongo îna, Musa arî rwanda akubî na Kîrîma gîa Sinai mûraîka amuumîîra arî rûrîrîmbîîni rwa mwanki rûgîakanaga gakandooni. 31 Musa akwona ûgu, aarigara mûno. Athiîte akubî kwona bwega, eegua kayû ka Mwathani gakîaria n'we gakiugaga, 32 ‘I niû Ngai wa biûyûûyû bienu, Ngai wa Îburaîmu, Isaka na Njakubu!’ Musa aatua kwinaina n'ûguaya, na ataûmîîria kinya kûraitha noogo. 33 Mwathani amwîra, ‘Ruta iraatû magûrû n'ûntû bantû agu ûrûngi i bantû aatheru. 34 I ndîîkîîtie kwona bûra antû baakwa bakûnyamaarîra Miisiri na i mbîgîîtue bûra bagûkaya bûgana. Ndauma îgûrû mbûyîîte kûbakûûra. Kwoogu ka ngûtûme Miisiri.’
35 “Musa wooyu nwa we ûra antû baao baarî bakûmûrega bakîmûûragia, ‘N'ûû agûtuîkithîîtie mûnene wetû na mûtûgiitîri magamba?’ Musa n'we Ngai aatûmire kîrî antû baake atuîka mûtongoria na mûkûûri wao kuumania na ûteethio bwa mûraîka ûra aariirie n'we gakandooni. 36 N'we aarutire Aisiraeri ûkombooni bwa Miisiri akîonanagia magegania na akîringaga biama; barî Miisiri, bakîringa Îria Rîtuune, na bakûrûkîîrîîte rwanda kagiita ka mîanka mîrongo îna. 37 I Musa wooyu eerire Aisiraeri, ‘Ngai akabûthuurîra kîroria kuuma wa kîrî biû, wa ta bûra aanthuurire.’ 38 Na nwa Musa wooyu eethîranîrîtwe i biûyûûyû bietû rwanda. Na nwa we mûraîka aariirie n'we Kîrîmaani gîa Sinai, rîra eerwe biugo bia mwoyo, bira aatwere.
39 “Îndî biûyûûyû bietû bateendaga kûmwathîkîra. Baamûregire bauga i kaaba bagacooka Miisiri. 40 Beera Arûni, ‘Tûrûthîre ngai ira igaatûtongoreeria rûgendooni n'ûntû tûtiiyî bûra Musa ûra aatûrutire Miisiri akarire.’ 41 Kwoogu beerûthîra ngai îkari ta kayaû bamîrutîra kîgongwana, baakeneera gîntû gîa kûrûtha na njara ciao. 42 Ngai aatigana nabo. Abarekeeria baaromba nthata cia îgûrû, wa ta bûra kwandîkîîtwe mabukuuni ma iroria kwerwa,
‘Antû ba Isiraeri, i bwanthînjîîre nyamû
na bwandutîra îgongwana rwanda
kagiita ka mîanka mîrongo îna?
43 Bwakamatire îrema rîa ngai Moreku
na mûbuanaano wa nthata wa ngai wenu Refani,
birî ngai cienu cia mîbuanaano.
N'ûntû bwa ûgu, i nkaabûtuîkithia atae Mbabironi.’
44 “Biûyûûyû bietû bakûrûkîîrîîte rwanda ibaarî na îrema rîa kwonania Ngai arî amwe nabo. Îrema rîru rîarûngamagua wa bûra Musa oonetue i Ngai. 45 Biûyûûyû bietû i biarî narîo bagûkinya Kanaani batongorereetue i Njosua. Mîgongo îra beethagîra, Ngai naamîngatagia bakathûkia nthîgûrû inu igatuîka ciao. Na kinya îgiita rîa Ndaundi nwa baarî na îrema rîru. 46 Ndaundi naakeniirie Ngai. Aûria Ngai wa Njakubu amwîtîgîîrie amwakîre bantû a gûkara. 47 Îndî i Soromoni aamwakîîre nyomba.
48 “Îndî Ngai Ûra Arî Îgûrû Mûno atikaraga nyomba cia gwakwa n'antû, wa ta bûra kîroria kîaugire,
49 ‘Mwathani ariuga, “Îgûrû i gîtî gîakwa kîa ûnene
na nthîgûrû n'ûkinyo bwa magûrû maakwa.
I nyomba mbi bûûmbakîra, i kû bûkuuga nkarage?
50 Anga ti niû mbûmbîîte into bibi bionthe?” ’
51 “Biû bûûmîîtie biongo mûno. Nkoro cienu ciûyûri wîrirîîria na bûûrîrîtie matû mûno. Bûtuatîîtie biûyûûyû bienu, bûkararagia Kîrundu Ûmûtheru rîonthe. 52 Anga kûrî kîroria biûyûûyû bienu bitaanyamaaria? Biaûragire bara baaroriirie tene babeera mantû ma kûûya kwa ûra mwagîru, naabi nyumaani bwamûnenkanîra aûragwa, 53 na ingî nwa biû bweerirwe watho gûkûrûkîîra kîrî araîka, îndî amwe na ûgu bûtaabuathîkîra.”
Stifini aûragwa na maiga
54 Akîama bakwîgua ûgu, baamuntwa i nkoro, baathûûra mûno. 55 Stifini naûyûrîîtwe i Kîrundu Ûmûtheru. Aacûûba îgûrû oona mwago wa Ngai na Yiesû arî rûteere rwa ûrîo rwa Ngai. 56 Eera akîama babu, “Cûûbaani bwone! Inkwona îgûrû rîrugûkîîte na Mwana wa Muntû arî rûteere rwa ûrîo rwa Ngai.”
57 Akîama baûkia gîtuma, bainga matû. Bonthe baumbuthûkania na Stifini 58 bamûruta taûni kaingo bamûûraga na maiga. Babu baarî bamûûrage baaruta nguo îra ndaayaa baiga bantû mûthaka eetagwa Saûrû aarûngi.