Ateetheeria mûgwanja ba atûmwa
6
1 Kagiitaani gaku eetîgîri bakûthi na mbere kwingîa, eetîgîri Angiriki na eetîgîri Aibirania i baarî na îtheto. Angiriki baanung'unaga bakauga ntigwa ciao i teeyagwa ûteethio bwa kûgana irio bikîgaîwa kîra ntugû. 2 Atûmwa babu îkûmi na baîrî beeta eetîgîri amwe bonthe. Babeera, “Gûtiagîrîte tûtiga gûtûmîîria kiugo kîa Ngai n'ûntû bwa kûgaa irio. 3 Kwoogu, aruayia na aarayia, thuuraani antû arûme mûgwanja kîrî biû, bara bûkûmenya i baûyûrîîtwe i Kîrundu Ûmûtheru na barî na ûûme bwingî. Antû babu mûgwanja i bo tûkaa ngûgî înu. 4 Tiû tûkeenenkanîra kûromba na kûruta ngûgî ya gûtûmîîria kiugo.”5 Eetîgîri bonthe baakeneera îthûgaanio rîru. Baathuura muntû eetagwa Stifini aarî na wîtîgio bûûnene mûno na aûyûrîîtwe i Kîrundu Ûmûtheru. Baacooka baathuura Firibû, Purokooras, Nikanoori, Timooni, Parimenas na Nikooraûs. (Nikooraûs aarî wa kuuma Antiokia, naagarûkîîte atuîka wa ndini ya kîîyaundi.) 6 Antû babu bairwa mbere ya atûmwa. Atûmwa babarombera babaigîîrîîte njara.
7 Kiugo kîa Ngai kîathi na mbere gûtamba, eetîgîri bongeereka mûno Njerusaremu. Na kinya *athînjîri ba Ngai baingî baagîa na wîtîgio.
Stifini aagwatwa
8 Stifini aarî muntû aûyûrîîtwe n'ûtugi na inya. Naaringaga biama biinene na akoonania magegania maanene. 9 Kûrî antû baaturagia Stifini mbaara. Antû babu baarî ba *sinagoogi yeetagwa “Sinagoogi ya bara bathaûre,” na baumîîte Kureni, Aregisandiria, Sirîsia na Îcia. Antû babu i baakararagia Stifini, 10 îndî batikîmûkîria ûûme n'ûntû Stifini aaragia na ûûme bûûnene mûno, na inya ya Kîrundu Ûmûtheru. 11 Antû babu baabangîra Stifini. Antû bamwe baakûûyîîra ûrongo bauga, “Tûreegiirue akîaria mantû maathûûku îgûrû rîa Musa na Ngai.”
12 Beengîîra antû, akûrû, na aarimû ba watho baagwata Stifini bamwira kîrî akîama. 13 Baareeta antû baatuîrîîra Stifini, bauga, “Muntû ûyû rîonthe agwetaga mantû maathûûku îgûrû rîa nyomba îno întheru ya Ngai na *watho bwa Musa. 14 Tûreegiirue akiuga Yiesû ûyu wa kuuma Nasareethi akomborania nyomba îno ya Ngai na agarûre wîthîre bûra twaumaniirie nabu kîrî Musa!”
15 Bara bonthe baarî gûku kîamaani nwaka boona ûthiû bwa Stifini bwagarûka. Baakara bamûkûnîîrîîte meetho, boona bwakara ta bwa mûraîka.