Saûrû aagarûka
9
1 Mantû mamu magîtuîkîka, Saûrû nwa aathiîtagia kûûraga athingati ba Mwathani. Aathi kîrî mûthînjîri ûra mûnene wa Ngai 2 amûûria amwe baarûa ciakûmûmenyithania *sinagoogiini cia Ndamasiki. Eendaga baarûa inu kaingo oona muntû arî mûthingati wa njîra ya Mwathani naagu Ndamasiki, amûreeta Njerusaremu arî ûmûthaîke, nwîgue i mûka aarî kana i muntû mûrûme.3 Athiîte arî akubî gûkinya Ndamasiki, nthûti îmwe werû bwauma îgûrû bwamûthararîra nteere cionthe. 4 Saûrû aagwa nthîgûrû. Eegua kayû kaaria n'we kauga, “Saûrû, Saûrû, i kî n'ûntû ûkûnnyamaaria?”
5 Saûrû aûria, “I woû ûû, Mwathani?”
Kayû gaku kamwîra, “Ndî Yiesû ûra ûkûnyamaaria. 6 Îndî amwe na ûgu, ûka ûthi taûni. Wakinya ûkeerwa bûra ûbatîîrue ûrûtha.”
7 Antû bara baathiyanîîtie na Saûrû baarûngi batarî na bwa kuuga. I beegiirue kayû, îndî gûtirî we boona.
8 Saûrû aûka, aarancûkia îndî ataûmba kwona. Antû babu baarî nabo bamûgwata njara bamûtongoreeria baakinya Ndamasiki. 9 Saûrû aakara ntugû ithatû atakwona. Na ntugû inu ithatû ataarîa kana anyua nwa mbi.
10 Gûku Ndamasiki i kwarî na mûthingati wa Mwathani eetagwa Anania. Mwathani amwîta na njîra ya kîoneki, “Anania!”
Anania eetîga auga, “Yîî, Mwathani!”
11 Mwathani amwîra, “Îthi na barabara îra yîtagwa ‘Îndûngaru,’ ûthi kwa Njundas ûûrithîrie oogo muntû wa kuuma Taarisas, eetagwa Saûrû. Îîndî ûgu nakûromba na 12 nkûmwonia na njîra ya kîoneki muntû eetagwa Anania aayîîte amwaigîîra njara kaingo atua kwona.”
13 Anania eera Mwathani, “Mwathani, i mbîgîîtue mantû ma muntû ûyu kuumania na antû baingî, bûra athîînîîtie antû baaku Njerusaremu. 14 Aayîîte naaga arî na watho kuuma kîrî *athînjîri bara banene ba Ngai eetîgîîrîîtue kûgwata bara bonthe barî athingati baaku.”
15 Mwathani eera Anania, “Îthi. Nthuurîîte muntû ûyu atambia riîtwa rîakwa kîrî bara batarî Ayaundi, anene, na antû ba Isiraeri. 16 Nwa mwanka anyamaare n'ûntû bwakwa na nkamwonia bûra akaanyamaara.”
17 Anania aathi aakinya kwa Njundas. Aigîîra Saûrû njara auga, “Mûruayia Saûrû, Mwathani, ta we Yiesû, ûra eebonaniirie kîrî woû ûrî njîraani, n'we aantûmîîte kaingo ûtua kwona kaîrî na ûûyûrwa i Kîrundu Ûmûtheru.”
18 Warîru gîntû gîkari ta magoko ma îkûyû mauma meetho ma Saûrû. Aatua kwona kaîrî, aabaatithua. 19 Aarîa irio aagwata inya.
Saûrû aatûmîîria taûni ya Ndamasiki
Saûrû aakarakaranga ntugû igana ûna na athingati ba Yiesû naagu Ndamasiki. 20 Aanjîîria gûtûmîîria *masinagoogiini akîonanagia atî Yiesû i Mwana wa Ngai. 21 Bonthe bara beegagua agîtûmîîria i baarigaraga. Baûranagia, “Anga muntû ûyû t'ûra aranyamaaragia bara beetîgîîtie Yiesû Njerusaremu? Anga akîîya ûûgû tika araayîîte kûbagwatithia bairwa Njerusaremu kîrî *athînjîri bara banene ba Ngai?”
22 Îndî amwe na ûgu, Saûrû aathi na mbere gûtûmîîria, ûcamba bûkîongeerekaga. Noonaniirie bwega atî Yiesû n'we Kîrîstû, mwanka Ayaundi bara baatûîre Ndamasiki baaga kîûria gîa kûmûûria.
23 Nyuma ya ntugû igana ûna, Ayaundi baarûtha mûceemanio baabanga kûmûûraga. 24 Îndî Saûrû aamenya mûbango wao. Mûthenya na ûtugû, Ayaundi babu baamûgiitagîra mîîrîgaani ya rûthingo rûra rwathiûrûkîrîte taûni kaingo bamûûraga. 25 Kwoogu ûtugû bûmwe eetîgîri baatûrithîîria Saûrû bantû kwarî na mwanya rûthingooni, bamwîndamîîria oogo bamwîkîrîte gîkabûûni.
Saûrû aacooka Njerusaremu
26 Saûrû aacooka Njerusaremu, aageria kûgwatanîra na eetîgîri bara bangî. Îndî bonthe ibaamûkuthûkaga n'ûntû bateetîgagia kana wabu naarî agûtuîka mûthingati wa Yiesû. 27 Baranaba amûthûkia amwira kîrî atûmwa. Abeera bûra Mwathani eebonaniirie kîrî Saûrû na bûra aariirie n'we arî njîraani. Baranaba eera atûmwa bûra Saûrû aatûmîîrie Ndamasiki kwa riîtwa rîa Yiesû arî na ûcamba. 28 I rîo eetîgîri baagwatanîîre na Saûrû. Saûrû aariûnga Njerusaremu agîtûmagîîria na ûcamba kwa riîtwa rîa Mwathani.
29 Saûrû naatûmîîrie kinya Ayaundi bara baaragia Kîîngiriki. Aakararania nabo mwanka beenda kûmûûraga. 30 Eetîgîri bakûmenya ûgu baakuthûkia Saûrû bamwira Kaisaria. Bakûmûkinyithia Kaisaria bamwîra acooke kwao Taarisas.
31 Eetîgîri ba Njundea, Gariiri, na Samaria i baarî na ûkiri. Baathiire bakîongeerekaga na bakîgîîyaga ûûmîîria, bakîîgagua baganîrîîtwe i Kîrundu Ûmûtheru na bagîkuthûkaga Mwathani.
Ainias oorua
32 Petûrû waakîriûngaga gûntû na gûntû, aariûngîra eetîgîri ba taûni yeetagwa Runda. 33 Eethîra muntû taûni înu eetagwa Ainias. Ainias aarî kîonje na aatûîre amaami mûkondorooni mîanka înaana. 34 Petûrû amwîra, “Ainias, Yiesû Kîrîstû nagûkworia. Ûkîîra ûûmbie mûkondoro waku.” Warîru Ainias aarûngama. 35 Antû ba taûni înu na ba taûni ya Saroni bakwona ûgu baagarûka kîrî Mwathani.
Ndorokas aariûkua
36 Kûrî mwekûrû ûmwe wa taûni yeetagwa Njopa aarî mwîtîgîri, eetagwa Tabiitha. (Na Kîîngiriki i bûmwe na Ndorokas. Ndorokas i “Nthia”.) Aarî mwekûrû aarûthaga mantû meega na aateethagia nkîa rîonthe. 37 Îndî kagiitaani gaku aayua, aakua. Antû baathambia kiimba gîake, beetithia ngorobaani baiga ku. 38 Taûni înu ya Njopa îtirî kûraaya na ya Runda. Kwoogu eetîgîri bakûmenye Petûrû naarî Runda baatûma antû baîrî. Antû babu baathi bamwîra, “Tûthi Njopa na mpwî.”
39 Petûrû aacookania nabo warîru. Petûrû bagûkinya, beetia ngoroba. Eethîra eekûrû ntigwa bakîrîraga. Bamwonia nguo ira Ndorokas aatumaga arî mwoyo. 40 Petûrû abaruta nja bonthe. Aaturia maru aaromba. Rîru aacooka eera ntungu, “Tabiitha, ûka!” Tabiitha aarancûkia oona Petûrû, aakara nthîgûrû. 41 Petûrû amûgwata njara amûrûngamia. Eeta eetîgîri na eekûrû bara ntigwa abanenkera Ndorokas arî mwoyo.