Koronerias oona kîoneki
10
1 I kwarî na muntû eetagwa Koronerias taûni ya Kaisaria. Aarî mûrûngamîîri wa mbûûtû ya ndûa yeetagwa Mbûûtû ya Itaria. 2 Aarî muntû aatîîyîîte Ngai na aamûkuthûkaga amwe na antû ba mûciî wake bonthe. Naateethagia nkîa mûno na aarombaga Ngai rîonthe. 3 Mûthenya ûmwe ta thaa kenda oona kîoneki. Mûraîka wa Ngai aathûngîra amwîta, “Koronerias!”4 Koronerias akwona mûraîka aamaka. Amûûria, “N'ata, Mwathani?”
Mûraîka ûyu amwîra, “Ngai atiriganîrîtue i maromba maaku na ûteethio bûra ûteetheetie nabu nkîa. 5 Tûma antû Njopa bageete muntû eetagwa Simioni, kaîrî Petûrû. 6 Arîkara kwa muntû atagutaga njûo eetagwa Simioni, atwîre akubî na îria.”
7 Mûraîka akûthi, Koronerias eeta aruti ngûgî baake ba mûciî baîrî na mûcikaarî ûmwe. Mûcikaarî ûyu aarî ûmwe wa bara baamûkaragia na naarombaga Ngai. 8 Abeera bunthe bûra gwakarîkîîte. Rîru abatûma Njopa.
Petûrû oona kîoneki arî Njopa
9 Rûûni antû babu wa barî njîraani barî akubî gûkinya Njopa, ta thaa thiita Petûrû i rîo aarî agwîtia rûûgûrû rwa nyomba kûromba. 10 Neegagua yûûra. Kwoogu neendaga kûrîa irio. Irio bikîrugagwa, oonua kîoneki. 11 Oona îgûrû rîrugûkîîte na gîntû gîakari ta cuka înene îîndamîîrîîtue agu kwarî na mwanya îrî ngwate koona cionthe irî inya. 12 Yarî na nyamû cia mîthemba yonthe. Nyamû cia magûrû mana, cia gwîkururia na nyoni. 13 Petûrû eegua kayû kamwîra, “Petûrû, thînja nyamû ino wîgaagûre!”
14 Petûrû auga, “Arî buru, Mwathani, n'ûntû gûtirî rîo ndaarîa gîntû gîtaagîrîte kana gîtarî kîtheru.”
15 Kayû gaku kaîrî kamwîra, “Ûtigeete into Ngai athereetie bitaagîrîte!”
16 Gwakarîkire ûgu maita mathatû. Na warîru cuka înu yacookua îgûrû.
17 Petûrû akîthûgaanagîria gîtûmi gîa kîoneki gîku, antû bara baatûmîîtwe i Koronerias i baarî bakwathîîrwa baakinya mwîrîgaani wa nyomba ya Simioni îra Petûrû aakaraga. 18 Beetana baûrithîria kana i kwarî na mûgeni aakaraga gûku eetagwa Simioni Petûrû.
19 Petûrû waagîcûûgagia kûmenya gîtûmi gîa kîoneki gîku, Kîrundu amwîra, “Kûrî antû bathatû bagûgûcûa. 20 Îndama na ûtikeegue ûrî na nkanja ûrega kûthi nabo, n'ûntû i niû mbatûmîîte kîrî woû.”
21 Petûrû eendama ngorobaani eera antû babu, “I niû ûra bûgûcûa. N'ata kûrî?”
22 Antû babu bamwîra, “Tûtûmîîtwe kîrî woû i Koronerias, mûtongoria wa mbûûtû ya ndûa. I muntû ûmwagîru akuthûkaga Ngai na atîîyîtwe n'Ayaundi bonthe. I mûraîka aramwîrire wîtwe ûthi gwake kaingo ûmwîra ntûmwa îra ûrî n'yo.”
23 Petûrû eera antû babu bakûrûke nyomba baraare.
Petûrû aaria na Koronerias
Rûûni rûkîîrî Petûrû aathi na antû babu na bamwe ba eetîgîri ba kuuma naagu Njopa. 24 Rûûni baakinya Kaisaria. Beethîra Koronerias abeeteereete barî na antû ba mûciî wao na acoore baake bara eetîîte. 25 Petûrû agûkinya ûgu, Koronerias amûthagaana amûturîria maru, amwîndamîîra akîmûgonga. 26 Îndî Petûrû amûûkîîria amwîra, “Rûngama. Niû ndî muntû ta woû tu.”
27 Baakûrûka nyomba bakîaragia. Petûrû eethîra antû baingî beethîreene gûku. 28 Petûrû auga, “Biû bwingwa i bwiyî atî, Mûyaundi atiîtîgîîrîîtue i watho bwa ndini yake eengîrana kana ariûngîra muntû atarî Mûyaundi. Îndî Ngai narîîkîîtie kûmbonia ntigeete muntû ataagîrîte kana atarî mûtheru. 29 Kwoogu gîku i kîo kîratûmire ûkûmbîta mbîtîgîîria kûûya ntakûûria kîûria. Ta mbîîra gîtûmi gîa gûntûmana.”
30 Koronerias amwîra, “Ta îîndî tûrî, thaa kenda cia mûthenya, mbere ya îco, indarombaga ndî nyomba. Nthûti îmwe, ndoona muntû eekîrîte nguo ciayicaga aaya aarûngama mbere yakwa. 31 Aambîta, ‘Koronerias!’ Ambîîra, ‘Ngai neegîîtue maromba maaku na atiriganîrîtue n'ûteethio bûra ûteetheetie nabu nkîa. 32 Kwoogu tûmana Njopa wîtîrwe muntû eetagwa Simioni, kaîrî Petûrû. Arîkara kwa muntû atagutaga njûo eetagwa Simioni, atwîre akubî na îria.’ 33 Kwoogu i rîo ndatûmanire wîtwa nthûti weenu na ûkûrûtha bwega waya. Îîndî tûrî aaga twinthe meethooni ma Ngai twîgua bûra bunthe Mwathani akwîrîîte ûtwîra.”
34 Petûrû aanjîîria kûbaarîria. Abeera, “Îîndî nkûmenya i mma gûtirî antû Ngai eendeete nkûrûki ya bara bangî. 35 Kîrî wa kîra mûgongo, ûra akuthûkaga Ngai na arûthaga bûra kûbatîîrue, Ngai namwîtîgagîra. 36 Ndî na mma bûreegua ntûmwa îra Ngai aatûmanire kîrî antû ba Isiraeri na bûra aatûmîîrie ntheto îmbega îra îreetaga ûkiri gûkûrûkîîra kîrî Yiesû Kîrîstû, Mwathani wa bonthe. 37 Na i bwîgîîtue mantû mara maatuîkîkire Njundea, mara manjîîrie na Gariiri nyuma ya Njoana agûtûmîîria mantû ma ûbaatithio. 38 I bwiyî bûra Ngai eetûûrîrie Yiesû wa Nasareethi maguta na njîra ya Kîrundu Ûmûtheru na amûûyûria inya. Na n'ûntû Ngai naarî amwe n'we, Yiesû aathi gûntû na gûntû akîrûthaga mantû meega na akîoragia bara baathîînagua i Nkoma.
39 “Tiû, atûmwa, tûrî akûûyî ba mantû monthe mara Yiesû aarûthire nthîgûrû ya Ayaundi na Njerusaremu. Aûragirwe na njîra ya kwambwa mûtharabaani, 40 îndî Ngai amûriûkia ntugû ya ithatû, aatûma ooneka arî mwoyo. 41 Îndî ti bonthe baamwonire. Ankûûyî bara Ngai aathuurîîte i bo baamwonire bonka. Na ankûûyî babu i tiû, atûmwa. Na kûrîa tûrarîyanîra amwe n'we na twanyunyanîra amwe n'we nyuma ya akûriûka. 42 Aatwîrire tûtûmîîrie antû na tûkûûyîîre atî, we n'we Ngai athuurîîte akaagiitîra îgamba bara barî mwoyo na bara bakuû. 43 Iroria bionthe n'ankûûyî. Biaugire ûra wonthe amwîtîgagîra akaarekerwa meeyia maake gûkûrûkîîra kîrî riîtwa rîake.”
Antû batarî Ayaundi beendamîîrwa i Kîrundu Ûmûtheru