Paûrû eetheteera mbere ya Angiripa
26
1 Angiripa eera Paûrû, “Ûrî na rûûtha rwa kwîtheteera.”Paûrû aûkîîria njara, aanjîîria kwîtheteera. Auga, 2 “Mûnene Angiripa, ndîona ndîîte mûnyaka îmunthî ndî na kaanya ga kwîtheteera ûkîîgagua, îgûrû rîa mantû mara monthe Ayaundi bakuuga i ndûthîîte. 3 Mûno mûno, mûnyaka ûra ndîîte i kwîgua nwiyî wîthîre bunthe bwa Ayaundi na mantû mara baturanagîria mbaara. Kwoogu ingûkûûria ûnthikîîrie ûtakwîgua ûkînogerwa.
4 “Ayaundi bonthe i baiyî mûtugo wakwa unthe kuuma ndî mwana. I baiyî bûra ndaakari kuuma ndî gwetû na nkûthi Njerusaremu. 5 Bambiyî kwa îgiita rîîraaya mûno na bakeenda nwa bakûûyîîre atî ndatûûraga ndî *Mûfarisai. Na kûringana na ndini yetû, gîkundi kîa Afarisai i kîo kîrî mawatho maûmo mûno. 6 Îîndî ndî aaga nkîgambithua n'ûntû bwa wîrîgîîro bûra ndî nabu, bûra Ngai eere biûyûûyû bietû kûringana na wîrane bwake. 7 Mîîrîga yetû îrî îkûmi na îîrî îkaraga îkîrombaga mûthenya na ûtugû îîrîgîîrîîte kwona Ngai akiingia wîrane bûbu. Kwîgua ndî na wîrîgîîro bûbu i kîo Ayaundi banthitangîrîte, mûnene. 8 I mbi îgûtûma bwona bûrî ûntû bûrî inya Ngai kûriûkia antû?
9 “Mbereeni, niû ningwa kûrî rîo ndathûgaanagia nwa mwanka ngerie bûra bunthe gûkîûmbîka ndegane na athingati ba Yiesû wa Nasareethi. 10 Înu n'yo ngûgî îra ndarutaga Njerusaremu. Ndatûmagîra rûûtha rûra ndeetwe *n'athînjîri bara banene ba Ngai, ndathaîkithia nceera athingati baingî ba Yiesû. Na indaringaga kuura ya gwîtîgîîria batuîrwa kûûragwa. 11 Ndariûnganagia na *masinagoogi monthe magiita na magiita ngatûma banyamaarua nkîenda barekana na wîtîgio bwao. Indabameneete mûno mwanka ndaatua kûthiiyaga taûni cia nthîgûrû ingî mbanyamaaria.”
Paûrû auga bûra aagarûkangire
12 Paûrû auga, “Ndî rûgendooni ntugû îmwe nthiîte Ndamasiki ndî na watho na rûûtha kuuma kîrî *athînjîri bara banene ba Ngai, 13 ta thaa thiita ndî njîraani nthiîte, ngîkwîraga, mûnene, werû bwauma îgûrû bwanthararîra nteere cionthe tûrî na bara twathiyanîîtie nabo. Werû bûbu bwathararîîte nkûrûki ya werû bwa riûa. 14 Twinthe twagwa nthîgûrû. Ndeegua kayû kambûria na rûthiomi rwa Kîibirania, ‘Saûrû, Saûrû, i kî n'ûntû ûkûnnyamaaria? Nûkwîthîînia mana ûkîrûa na wendi bwakwa ta îng'ooi rîkîringa thiarî rwambo rwa ûra arîthingatîrîtie.’
15 “Ndaûria, ‘Î woû ûû, mûnene?’
“Mwathani ambîîra, ‘I niû Yiesû ûra ûkûnyamaaria. 16 Ûkîîra ûrûngame. Ndeebonania kîrî woû n'ûntû ngûkûthuura ûtuîka mûruti ngûgî wakwa, kaingo wîgua ûrî mûkûûyî wa ûntû bûbû woona na mantû mangî mara ngaakwonia. 17 Ngagûtunyûkagia antû beenu na kuuma kîrî bara batarî Ayaundi bara ngaagûtûmaga kîrî bo. 18 Ngaatûma ûtûme barancûkie, baume mwinduuni baaye werûûni, baume wathooni bwa Saitaani batuîke antû ba Ngai kaingo barekerwa meeyia maao, bathûkie kaanya kaao amwe na bara Ngai athereetie kuumania na wîtîgio bwao kîrî niû.’ ”
Paûrû auga ngûgî yake kîrî Ayaundi na bara batarî Ayaundi
19 Paûrû aathi na mbere na kwaria. Auga, “Kwoogu, mûnene Angiripa, i ndaathîkîîre kîoneki gîku kîaumire îgûrû. 20 Ndaanjîîrie gûtûmîîria mbere kîrî antû ba Ndamasiki, rîru ndathi kîrî ba Njerusaremu, kîrî ba Njundea yonthe, na kîrî bara batarî Ayaundi. Ndabatûmîîrie ndabeera beerire, batuîke antû ba Ngai na boonanie kwîrira kwao na mantû mara bakaarûthaga. 21 Gîku i kîo gîatûmire Ayaundi bangwata bakûmbîthîra Nyomba ya Ngai baacûûgia kûmbûraga. 22 Îndî Ngai nanteethetie ûkoona i niû îmunthî ndûngi aaga mbere yenu nkîbweyaga ûkûûyî baanene na baaniini. Na mantû mama nkûbwîra nwa mara iroria na Musa baugire magaatuîkîka, 23 atî, kwarî nwa mwanka *Mesia aûragwe na atuîke muntû wa mbere kûriûka, amenyithanie ûmma bwa wonokio kîrî Ayaundi na kîrî bara batarî Ayaundi.”
24 Festas akwîgua Paûrû akîîtheteera ûgu, amûgondokera na inya amwîra, “Nûrî na nkoma, Paûrû! Kîthoomo gîku gîaku ûthoomeete kîgana ûgu i kîo gîkûrutîîte nkoma.”
25 Paûrû amwîra, “Ntirî na nkoma, mûkaathe Festas. Mantû mama nkwaria i ma mma na ti ma ûtaku. 26 Mûnene Angiripa naiyî mantû mama. Na i kîo gîgûtûma mbaria n'we mbûmîîrîîtie. Ndî na mma gûtirî ûntû ndauga ataiyî n'ûntû mantû mama maataarûthîkîra withooni. 27 Mûnene Angiripa, Nwîtîgîîtie iroria? Imbiyî nûbiîtîgîîtie.”
28 Angiripa eera Paûrû, “Ûtintuîkithia Mûkîrîstû na mpwî ûgu!” 29 Paûrû amwîra, “Nwîgue i na mpwî kana i nyuma ya îgiita rîîraaya, îromba rîakwa kîrî Ngai n'atî, woû na bwinthe bara bûnthikîîrîîtie îmunthî bûkare ta niû. Îndî ingî bûtarî bathaîke na nyororo.”
30 Mûnene Festas, ngabana Angiripa, Mbenike na bara bangî baakari nabo baûkîîra 31 baathi. Bakîaria beerana, “Muntû ûyû gûtirî bu arûthîîte bûûmba gûtûma atuîrwa kûûragwa kana kûthaîkwa.”
32 Angiripa eera Festas, “Muntû ûyû akîrekua akathi ûkeegua ti bûra araugire arîenda Kaisaarî agiita îgamba rîake.”