Îgamba rîa Paûrû rîathikîîrua i Festas
25
1 Nyuma ya ntugû ithatû kuuma Festas akûûya, auma Kaisaria aathi Njerusaremu. Akûthi noogo 2 *athînjîri bara banene ba Ngai na atongoria ba Ayaundi bamwîra mantû mara baugaga Paûrû naarûthîîte. Bamûûria 3 abarûthanîrie mantû, Paûrû areetwe Njerusaremu. Mûbango wao warî bamûûragîre njîraani. 4 Festas abeera, “Paûrû agaakara Kaisaria na nkaathi noogo nyuma ya îgiita rîtarî rîraaya. 5 Kwoogu îtîgîîriani nkîthi tûthiiyanie na atongoria bamwe beenu bakauge kîra bûkûmûthitangîra, wegua kûrî mabîtia muntû ûyu arûthîîte.”6 Nyuma ya ntugû ta inyanya ûgu kana îkûmi, Festas aacooka Kaisaria. Rûûni rwa ntugû înu aakinyire, aathi aakara nthîgûrû gîtîîni kîra aakaragîra akîgiita magamba. Aaruta watho auga Paûrû areetwe. 7 Paûrû akûreetwa Ayaundi bara baumîîte Njerusaremu bamwirigîra. Baatarania mantû maingî maathûûku mûno mara baugaga narûthîîte, îndî bataûmba kwonania ûmma bwa mo.
8 Paûrû eetheteera. Auga, “Gûtirî mabîtia ndûthîîte ta kuuna watho bwa Kîîyaundi, gwîkîra Nyomba ya Ngai mûgiro, kana kûrega kwathîkîra Kaisaarî.”
9 Festas akîenda gûkenia Ayaundi, aûria Paûrû, “Wenda kwirwa Njerusaremu nkagiitîre îgamba rîaku noogo?”
10 Paûrû amwîra, “Ndûngi mbere ya kooti ya Kaisaarî. Na aaga noogo mbatîîrue ngiitîrwa îgamba ndî. Gûtirî mabîtia ndûthîrîte Ayaundi. Wana woû nûkûmenya ûgu bwega mûno. 11 Îndî nkaaya kwonwa ndûthîîte ûntû bwagîrîte ntuîrwa kûûragwa, ntiuga ntikaûragwe. Îndî ûkaaya kwîgua mantû mama antû baba bakûnthitangîra i ma ûrongo, gûtirî we abatîîrue aanenkanîra kîrî bo. Kwoogu inkûromba ngiitîrwe îgamba i Kaisaarî wengwa!”
12 Nyuma ya Festas akwaranîria na bara baamweyaga ûkûrû, eera Paûrû, “N'ûntû wauga ûrîenda kûgiitîrwa îgamba i Kaisaarî, îîndî nwa kîrî Kaisaarî ûkairwa.”
Festas eera mûnene Angiripa mantû ma îgamba rîa Paûrû
13 Nyuma ya ntugû igana ûna, mûnene Angiripa na mwaragina eetagwa Mbenike baaya Kaisaria gûkeethia Festas. 14 Bagûkaranga ntugû inyingî, Festas eera mûnene mantû ma îgamba rîa Paûrû. Abeera, “Kûrî muntû arî aaga aatigirwe nceera i Ferîksi. 15 Rîra ndaarî Njerusaremu, *athînjîri bara banene ba Ngai, na akûrû ba Ayaundi baamûthitangire kîrî niû, bambîîra ngiite îgamba rîake mbuge nabîtîîtie.
16 “Ndabeera ti wîthîre bwa Arooma kûgiitîra muntû îgamba mbere ya eewa kaanya ga kûgambana na bara bamûthitangîîte, eetheteera. 17 Bakûûya aaga ntaata thaa. Gwakeere rûûni rûkîîrî ndaakara gîtîîni kîra ndakaragîra nkîgiita magamba ndauga muntû ûyu areetwe. 18 Babu baamûthitangîîte bakûrûngama kwaria, nteegua ûntû bûûthûûku kîrî mara ndeerîgîîrîîte kwîgua. 19 Bûra ndeegiirue, i mbaara baaturanagia n'we îgûrû rîa ndini yao na îgûrû rîa muntû aakuire eetagwa Yiesû, îndî Paûrû augaga arî mwoyo. 20 Nkwaga bwa kuuga îgûrû rîa mantû mamu, kwoogu ndaûria Paûrû kana wegua akîenda akairwa Njerusaremu nkathikîîria îgamba rîake noogo. 21 Îndî Paûrû aûria agiitîrwe îgamba i Kaisaarî. Kwoogu ndaaruta watho ndauga akarue bwega mwanka rîra nkoona kaanya ga kûmûtûmanîra kîrî Kaisaarî.”
22 Angiripa eera Festas, “Niû ndeenda kûthikîîria muntû ûyu akîaria.”
Festas amwîra, “Ûkamûthikîîria rûû.”
Paûrû aaria na Angiripa
23 Rûûni Angiripa na Mbenike baakinya beekîrîte nguo bwega mûno, beethîra beeteereetwe na gîtîîyo kîînene. Baakûrûka kûra magamba maagiitagîrwa. Baayanîîtie na atongoria ba ndûa na antû ba taûni înu bara baarî îgweta. Festas aaruta watho auga Paûrû areetwe. 24 Festas auga, “Mûnene Angiripa na bara bwinthe bûrî aaga amwe naati. Aaga mbere yenu kûrî na muntû ûyû. Ayaundi bonthe bara barî Njerusaremu na bara barî gûkû bamûthitangîîte kîrî niû bakîringaga gîtuma bakauga atibatîîrue eegua arî mwoyo. 25 Gûtirî mabîtia ndoona arûthîîte matûma atuîrwa kûûragwa. Îndî akuuga arîenda kûgiitîrwa îgamba i Kaisaarî, mbangîîte kûmûtûmanîra kîrî we. 26 Ntirî na ûntû bwa kwandîkîra mûnene wakwa mmwîra îgûrû rîake. Kwoogu gîku i kîo gîtûmîîte mbuga areetwe mbere yenu bwinthe, na mûno mûno, kîrî woû, mûnene Angiripa, kaingo ndathikîîria bûkîmûûria biûria mbona kana kûrî bu nkeegua bwa kwandîkîra mûnene mmwîre. 27 Ndîona n'ûtaku mûno kuuga mûgwate airwe ntakuuga kîra athitangîrîtwe.”