Paûrû aakinya Korintho
18
1 Nyuma ya mantû mamu Paûrû auma Athene, aathi taûni yeetagwa Korintho. 2 Eethîra Mûyaundi eetagwa Akuira noogo. Akuira aaciarîrîtwe Pontas. We na mwekûrû wake, Pirisiira, îgiitaani warîru nwarîo baarî bagûkinya. Baumîîte nthîgûrû ya Itaria naara baarî mbere mûnene Kiraundias aruta watho auga Ayaundi bonthe baume taûni ya Rooma. Paûrû aathi kûbariûngîra. 3 Baakarakaranga nabo bagîtumaga marema n'ûntû baarî atumi marema ta we. 4 Na wa kîra ntugû ya *Sabatû, Paûrû eegagua arî *sinagoogiini akîaranîria na Ayaundi na bara bataarî Ayaundi agîcûûgia kûboonia ûmma.5 Sairas na Timotheo bakûûya baumîîte Macendonia, Paûrû eeruta kûrû gûtûmîîria kiugo agîkûûyagîîra kîrî Ayaundi atî Yiesû n'we *Mesia. 6 Ayaundi baaregana n'we bamûrumanga. Paûrû ababuruncîra nguo ciake abeera, “Îîndî n'îgûrû rîenu, t'îgûrû rîakwa kaîrî. Kwanjîîria îîndî nthiîte gûtûmîîria bara batarî Ayaundi.”
7 Paûrû auma sinagoogiini înu aarî. Aathi mûciî warî waagu akubî wa muntû aarombaga Ngai eetagwa Taitias Njastas. 8 Mûtongoria wa sinagoogi înu eetagwa Kirisipas na antû bonthe ba mûciî wake beetîgia Mwathani. Na Akorintho bangî baingî kinya bo bakwîgua ntûmwa beetîgia, baabaatithua.
9 Ûtugû bûmwe Mwathani aaria na Paûrû na njîra ya kîoneki. Amwîra, “Ûtikaamake. Îthi mbere na gûtûmîîria ûtagûtiga 10 n'ûntû ndî amwe naawe. Gûtirî we agaakûrûthîra ûntû bûûthûûku n'ûntû antû baingî taûni îno n'antû baakwa.” 11 Kwoogu Paûrû aakara mwanka na nucu akîrutanaga antû kiugo kîa Ngai.
12 Gario agûtuîka ngabana wa gîteere gîa Akaaya, Ayaundi barî amwe baabanga baagwata Paûrû, bamwira kîrî ngabana agiitîrwa îgamba. 13 Beera ngabana, “Muntû ûyû arîeneeria antû akabeera barombe Ngai na njîra îtakûgwatanîra na watho.”
14 Warîra Paûrû akîenda kwaria, Gario eera Ayaundi babu, “Ûkaaya kwîgua, Ayaundi, muntû ûyû ka kûrî watho aunîîte kana ûthûûku arûthîîte, ndabûthikîîria. 15 Îndî ûkeegua i mîgambo, mariîtwa, kana watho bwenu bûgûkararanîria, thiriani mantû mamu bûrî bwingwa. Niû ntienda kûgiita îgamba ta rîrî.” 16 Gario aabeengatia agu. 17 Kîrîndî gîku kîagwata Sosithenes, mûtongoria wa sinagoogi, bamûturîra waagu ome Gario akîonaga îndî ataatindanîra nabo.
Paûrû aacooka Antiokia
18 Paûrû baakara îgiita rîîraaya na eetîgîri ba Korintho, rîru abatiga aathi taûni yeetagwa Kenkiria eenjwa ntundu kûringana na wîthîre bwa Ayaundi n'ûntû kûrî wîrane aarî nabu na Ngai. Paûrû akuuma agu baatwa meeri na Pirisiira na Akuira baanjîîria rûgendo rwa kûthi nthîgûrû ya Aramu. 19 Bagûkinya taûni yeetagwa Efeso, Paûrû baathûkana na Pirisiira na Akuira. Paûrû aathi sinagoogiini kwaranîria na Ayaundi. 20 Ayaundi babu beera Paûrû eenda akarakarange, îndî Paûrû ateenda. 21 Akîthi aatiga abeera, “Wegua i kwenda kwa Ngai nkaaya kaîrî.” Paûrû aathi aatwa meeri, auma Efeso. 22 Agûkinya Kaisaria aathi gûkeethia eetîgîri. Auma agu aathi Antiokia.
23 Agûkarakaranga Antiokia, auma agu aageendeera gûntû na gûntû nthîgûrû cia Garatia na Furîgia agîîkagîra eetîgîri wîru.
Apooras aatûmîîria Efeso na Korintho
24 Mûyaundi ûmwe aaciarîrîtwe Aregisandiria aaya Efeso. Eetagwa Apooras na aarî muntû wa kanyua karî mûrîo,a na naiyî *Maandîko Maatheru bwega. 25 Naarî ûmûrutane mantû ma Mwathani. Aatûmagîîria na akarutana mantû ma Yiesû na inya yake yonthe atakûbîtia. Îndî bûra aiyî bunka n'ûbaatithio bûra Njoana aatûmagîîria. 26 Aatua gûtûmîîria *sinagoogiini na ûcamba. Pirisiira na Akuira bakûmwîgua bamûthookia kwao. Bamûrutana mantû ma Ngai bwega nkûrûki.
27 Apooras akwîra eetîgîri nakwenda kûthi Akaaya, bamwîkîra wîru. Baandîkîra eetîgîri ba noogo baarûa bakîbeeraga bagwate Apooras ûgeni. Apooras agûkinya, aateethia mûno bara beetîgîîtie n'ûntû bwa ûtugi bwa Mwathani. 28 Aaturania mbaara mûno na Ayaundi. Abacinda mbere ya antû, oonania kûringana na Maandîko Maatheru, Yiesû n'we *Mesia.