Ngûgî îra Paûrû aarutire Efeso
19
1 Apooras arî Korintho, Paûrû i rîo aakûrûkîîrîîte gûntû na gûntû, aaya kuumîîra Efeso. Eethîra eetîgîri bamwe oogo. 2 Paûrû abaûria, “Anga bûreendamîîrwa i Kîrundu Ûmûtheru rîra bwetîgiirie?”Bamwîra, “Arî. Wana kwîgua tûteegua gîntû gîgwîtwa Kîrundu Ûmûtheru.”
3 Paûrû abaûria, “Aabu n'ûbaatithio bûbi bwabaatithiirue?”
Bamwîra, “Twabaatithiirue ûbaatithio bûra Njoana aabaatithanagia.”
4 Paûrû abeera, “Njoana aabaatithagia antû kwonania bakwîrira meeyia maao. Eerire antû beetîgie ûra aayîîte nyuma yake, ta we Yiesû.”
5 Bakwîgua ûgu baabaatithua kwa riîtwa rîa Mwathani Yiesû. 6 Paûrû akûbaigîîra njara, Kîrundu Ûmûtheru abeendamîîra. Baanjîîria kwaria na nthiomi mwanya mwanya, na baatua kûroria. 7 Bonthe baarî antû arûme ta îkûmi na baîrî.
8 Bantû a kagiita ka mîeri îthatû, Paûrû aathiiyaga *sinagoogiini agatûmîîria na ûcamba, akaaranîria na antû agîcûûgagia kûbakuuyia beetîgia mantû ma ûnene bwa Ngai. 9 Îndî bamwe ba antû babu baûmia biongo, baarega gwîtîgia. Baaria mantû maathûûku îgûrû rîa ûrutani bwa Mwathani mbere ya antû. Paûrû aarekana nabo. Aathûkia bara beetîgagia bonka. Wa kîra ntugû baakomanaga cukuru ya Tairanas, 10 bantû a mîanka îîrî. Antû ba Îcia bonthe beegua kiugo kîa Mwathani, Ayaundi na bara bataarî Ayaundi.
Nthaka mûgwanja cia Sikeba
11 Ngai naaringaga biama bia kûrigaria gûkûrûkîîra kîrî Paûrû. 12 Antû baathûkagia itambaa Paûrû atongeete bakairîra aayie bio mbayua ciao ikathira, na bara beegagua barî na irundu biithûûku bikauma.
13 I kwarî na Ayaundi bamwe baariûngaga bagîcûûgagia kwa riîtwa rîa Mwathani Yiesû kwîngatia irundu biithûûku biuma kîrî bara beegagua barî nabio. Baabiîraga, “Ndîbwatha buuma ngîtûmagîra riîtwa rîa Yiesû ûra Paûrû atûmagîîria mantû maake.” 14 I kwarî na Mûyaundi aarî mûthînjîri ûra mûnene wa Ngai, eetagwa Sikeba. Naarî na nthaka mûgwanja ciarutaga ngûgî înu. 15 Îgiita rîmwe bakîrûtha ûgu, kîrundu kîîthûûku kîabeera, “Yiesû imwiyî, na Paûrû imwiyî. Îîndî biû i biû ba ûû?” 16 Muntû ûyu aarî na kîrundu gîku aumbuthûkania nabo. Abakîria inya bonthe. Bauma nyomba înu na rwîro abatembûrangîrîte nguo baatigwa ûtheri na abatonyangîîte mîîrî.
17 Mantû mamu maamenyekana Efeso n'Ayaundi bonthe na bara bataarî Ayaundi. Bonthe baagwatwa n'ûguaya mûno. Baatîîya riîtwa rîa Mwathani Yiesû. 18 Baingî ba bara beetîgiirie baumbûra mbere ya antû mantû maathûûku monthe mara baarûthîîte. 19 Na baingî ba bara baarutaga ngûgî ya kûringia baareeta mabuku mara baatûmagîra bamabîîthia antû bakîonaga. Baatara ûgûri bwa mabuku mamu monthe boona ciarî fetha ngiri mîrongo îtaano.a 20 Kiugo kîa Mwathani gîatamba na kîagîa inya nkûrûki na njîra ta înu.
Gîtuma gîaûka Efeso
21 Nyuma ya mantû mamu, Paûrû aabanga kûgendeera Macendonia na Akaaya, acookeete Njerusaremu. Auga, “Nkaaya gûkinya noogo nwa mwanka nthi Rooma n'yo.” 22 Aatûma ateetheeria baake baîrî, Timotheo na Erastas. Abeera bathiiyage Macendonia, we aatigangîîrwa Îcia.
23 Kagiitaani gaku i kwarî na thîîna înene mûno Efeso îgûrû rîa ûrutani bwa Mwathani. 24 I kwarî mûturi eetagwa Ndemeterias aaturaga into bia îthaga rîa fetha. Aaturaga mûbuanaano wa kîrombero kîa ngai wa mûka eetagwa Aritemas. Biacaara înu yake nîatûmaga antû baingî boona ngûgî. 25 Ndemeterias eeta antû babu amwe na bara bangî tabo. Abeera, “Akûrû, i bwiyî baita îra twonaga na ngûgî îno. 26 Îîndî i bwoneete na bweegua bûra muntû agwîtwa Paûrû akûrûtha. Arîîra antû atî, ngai ba kûrûthwa n'antû ti ngai ba mma. Na naûmbîîte gûtûma antû baingî boona ta ûmma. Na ti gûkû Efeso gunka, n'Îcia yonthe. 27 Biacaara yetû îrî ûgwatiini bwa kûgwetanîrua na ûthûûku. Na nkûrûki ya ûgu, kîrombero kîa ngai wetû, Aritemas, ûra mûnene, gîtionwa kîrî na gîtûmi kaîrî. Ngai ûra arombagwa Îcia na nthîgûrû yonthe nakaagîrua gîtûmi.”
28 Antû bakwîgua mantû mamu baagwatwa i mûthûûro. Baanjîîria kûringa gîtuma bakiugaga, “Aritemas wa kuuma Efeso i mûnene.” 29 Taûni yaûyûra gîtuma. Kîrîndî kîengana na muntû eetagwa Gayas na ûngî eetagwa Aristakas, kîabagwata. Baarî Amacendonia na baathiiyeenie na Paûrû. Kîrîndî kîabaira na taka kîeniini kîra baarûthagîra mîceemanio. 30 Paûrû neendaga kûthi boonana na antû babu, îndî eetîgîri bamûkaania. 31 Wana anene bamwe ba nthîgûrû înu ya Îcia, n'ûntû baarî acoore baake, baatûmana bamûkaania bamwîra atikaathi naagu kîeniini gîku.
32 Antû babu beethîreene kîeniini gîku i baarigiceene. Bamwe bakiuga ûûgû, bangî i bakuuga bwao nabo, bakîyogaga. Baingî baao bataiyî kîra gîatûmîîte beethîrana. 33 Ayaundi baatindîka muntû eetagwa Aregisanda athi mbere bakîendaga aarîria antû. Aregisanda oonia antû na njara bakire akîenda kwaria îgûrû rîa Ayaundi. 34 Antû bakûmenya Aregisanda aarî Mûyaundi, baaringa gîtuma bonthe bantû ta a mathaa maîrî bakiugaga, “Aritemas wa kuuma Efeso i mûnene!”
35 Mûthiani mwandîki wa taûni aûmba gûkiria kîrîndî. Abeera, “Antû beetû ba Efeso, n'ûû ataiyî taûni ya Efeso n'yo îmenyagîîra kîrombero kîa Aritemas, ûra mûnene, ûra mûbuanaano wake waarûkire kuuma îgûrû? 36 N'ûntû gûtirî we akararia mantû mamu, kirîîriani na bûtikaarûthe nwa ata na mpwî mpwî. 37 Bûreetire antû baba aaga na tika baiyîîte iromberooni kana barumîîte ngai wetû. 38 Kwoogu, ûkaaya kwîgua Ndemeterias na bara bangî bagwatanîrîte n'we ngûgîîni barî na ûntû bakwîgua bathitangîra antû baba, kooti irî oogo na agiiti magamba barî oogo. I bathi babathitange noogo. 39 Îndî ûkeegua n'ûntû bûngî, ûntû bûbu bûbatîîrue bwarîîrua na njîra yagîrîte. 40 Kûringana na bûra gûkari aaga îmunthî, tûrî ûgwatiini twaûmba kûthitangîrwa gîtuma gîkî. Gûtirî gîtûmi kîega tweyana twîtheteera n'ûntû bwa gîtuma gîkî.” 41 Mwandîki ûyu akuuga ûgu eera antû baaragane bathi.