Paûrû aageendeera Macendonia na nthîgûrû ya Angiriki
20
1 Gîtuma gîku gîkûthira, Paûrû eeta eetîgîri. Abeekîra wîru, rîru abatiga aathi Macendonia. 2 Paûrû aageendeera Macendonia agîîkagîra eetîgîri wîru na mantû maingî, mwanka aaya gûkinya nthîgûrû ya Ngiriki. 3 Aakara ku mîeri îthatû. Warîra arî akubî kûthi nthîgûrû ya Aramu, aamenya Ayaundi ibamûbangîrîte. Aabanga acookeere Macendonia kaîrî. 4 Baathi na muntû wa kuuma Berea, eetagwa Sopeta wa Piras, antû bangî baîrî ba kuuma Thesaronike, beetagwa Aristakas na Sekundas, na ûngî wa kuuma Ndabi, eetagwa Gayas. I baarî kinya na Timotheo na antû bangî baîrî ba kuuma Îcia, beetagwa Tikikas na Turofimas. 5 Antû babu baathi gûtweteera Tiroas. 6 Nyuma ya *kîatho kîa mîgaate îtaimbithîîtue, twathi taûni ya Firipi twatwa meeri. Twathi twakinya Tiroas ntugû ya itaano, twabeethîra oogo. Twakara oogo ntugû mûgwanja.Yutikas aakua aariûkua i Paûrû
7 Ntugû ya mbere ya kiumia tweethîrana amwe n'ûntû bwa kûrîyanîra mûgaate. Paûrû aarîria antû. Na n'ûntû aarî araûke kûthi rûûni rûkîîrî, aaria mwanka ûtugû mainda. 8 I kwarî na taa inyingî ciankanaga ngorobaani înu twarî. 9 I kwarî na mûthaka ûmwe eetagwa Yutikas aakari ndîrîcaani. Paûrû akwaria mûno, mûthaka ûyu aagwatwa i toro. Akûmaama aagwa nthîgûrû kuuma ngorobaani înu ya ithatû twarî. Antû bakûthi beethîra arî ûmûkuû. 10 Paûrû eendama noogo, aathi amûkumbata. Eera antû, “Bûtikaamake arî mwoyo!” 11 Paûrû beetia ngorobaani kaîrî, baang'enyûra mûgaate baarîa. Paûrû aarîria antû kwa îgiita rîîraaya mwanka kwereerûka, rîru aathi. 12 Antû beenûka na Yutikas barî na ûûmîîria.
Rûgendo rwa kuuma Tiroas kûthi Miretas
13 Paûrû atwîra tûthiyage n'ûntû we aabangîîte kûûyaga na magûrû. Tiû twatwa meeri twathiyaga taûni ya Asos ara Paûrû aarî atwîthîre. 14 Akûûya atwîthîra Asos aatwa meeriini twathi taûni ya Mitireni. 15 Rûûni twauma Mitireni twakûrûkîîra akubî na gîcîgîîrio kîa îria gîetagwa Kios. Ntugû înu îngî yathingatîîte twakinya gîcîgîîrioni kîa îria gîetagwa Samos. Ntugû înu îngî twakinya taûni ya Miretas. 16 Paûrû aabangîîte tûtikaathûkîre Efeso. Ateendaga tûta îgiita Îcia n'ûntû naarî na mpwî cia gûkinya Njerusaremu wegua gûkîûmbîka, mbere ya ntugû ya *Pentekosti îkinya.
Rwaria rwa Paûrû rwa mûthia kîrî akûrû ba kanica ya Efeso
17 Tûrî Miretas, Paûrû aatûmana kîrî akûrû ba kanica ya Efeso auga bathi boonane. 18 Bagûkinya abeera, “Biû bwingwa i bwiyî bûra ndaratûûranagia naabi kagiita kara konthe tûraarî amwe, kuuma ntugû ya mbere rîra ndaayire Îcia. 19 Ndararutaga ngûgî ya Mwathani ndî na kwînyiia kûûnene mûno na meethori ndeetûûra, ndaûmîîria magerio mara marambûyagîîra kuumania na mîbango îmîthûûku îra Ayaundi barambangagîra. 20 I bwiyî gûtirî ûntû bûrî gîtûmi ndaremwa kûbwîra. Ndarabûtûmagîîria na nkabûrutana mbere ya antû na bûrî mîciî yenu. 21 Ndarakûûyagîîra kîrî bonthe, Ayaundi na bara batarî Ayaundi nkabeera beerire bagarûke kîrî Ngai, beetîgie Mwathani wetû Yiesû Kîrîstû.
22 “Îîndî ga nkûbwîra, nthiîte Njerusaremu ntongorereetue i Kîrundu. Ntiiyî bûra gûgaakarîka kîrî niû ndathi noogo. 23 Bûra bunka nkûmenya n'atî, Kîrundu Ûmûtheru ambîîrîîte wa kîra taûni nkaathi nceera na kûnyamaarua ibimbeteereete. 24 Ntionaga mwoyo wakwa ûrî gîtûmi. Îromba rîakwa i nthirie ngûgî îra Mwathani Yiesû aampeere nduta, ntûmîîrie ntheto îmbega ya ûtugi bwa Ngai.
25 “Ndarabûriûngagîra nkîbûtûmagîîria mantû ma ûnene bwa Ngai, îndî îîndî ndaramenyire gûtirî we wacienu akaambona kaîrî. 26 Kwoogu îmunthî ga nkûbwîra, wana kinya muntû akaûra îîndî ntiûrua. 27 N'ûntû gûtirî ûntû ndaremwa kûbwîra. Ndarabwîraga bûra bunthe Ngai eendaga. 28 Kwoogu îmenyeereeni bwingwa na menyeeraani bara Kîrundu Ûmûtheru athuurîîte bûbacûûbîra. Rîîthiani kanica ya Ngai îra atuîkithîîtie yake na nthakame ya Mwana wake.a 29 Imbiyî ndathi antû baathûûku ta ncûgi ing'etu bakaaya beethûngîrie gîkundiini kîenu babûthûûkie batarî na kîao. 30 Na kinya kîrî biû ûkeegua kûrî na antû bakaaragia ûrongo bakîenda kweneeria eetîgîri batuîka athingati baao. 31 Kwoogu karagaani bwîmenyeereete. Na ririkanagaani mbîtûûrîîte meethori mîanka îthatû, mûthenya na ûtugû, ntakûnoga i gûkaania wa kîra ûmwe wacienu.
32 “Îîndî ndîbûtiga bûrî ûmenyeerini bwa Ngai bûrî na kiugo gîa ûtugi bwake. Kiugo gîake kîrî inya ya gûkûria wîtîgio bwenu na kîrî inya ya gûtûma bwewa rûgai amwe na bara bonthe bathereetue. 33 Gûtirî rîo ndeerirîria mbia kana nguo cia muntû. 34 Wana biû bwingwa i bwiyî ndararutaga ngûgî ningwa ngeecûîra bira ndareegagua ndî bata nabio na ngacûîra bara barantûmîkagîra bira bareegagua barî bata nabio. 35 Kîrî mara monthe ndararûthaga ndarabwonagia na njîra cionthe atî tûbatîîrue tûrutaga ngûgî na inya ta ûgu, kaingo tûteethagia bara batakwîyûmba. Na tûririkanageeni biugo bia Mwathani Yiesû bira augire wengwa atî, ‘Ûra eeyanaga nathaarimagwa nkûrûki ya ûra eeyagwa.’ ”