NGÛGÎ CIA ATÛMWA
Yiesû eetia îgûrû
1
1 Îbukuuni rîakwa rîa mbere kîrî woû, Thiofiras, ndaandîkire mantû monthe mara Yiesû aarûthaga na mara aarutanaga antû kuuma rîra aanjîîrie ngûgî yake, 2 mwanka ntugû îra aathûkiirue eetithua îgûrû matuuni. Na mbere ya gwîtithua, Yiesû aatigire aatha atûmwa baake na njîra ya Kîrundu Ûmûtheru bara aathuurîîte. 3 Nyuma ya gûkua, Yiesû akûriûka neebonaniirie kîrî bo na njîra inyingî itaarî nkanja. Îgiita na îgiita neebonaniirie kîrî bo bantû a ntugû mîrongo îna akîaragia nabo mantû makoneetie ûnene bwa Ngai. 4 Kagiita kamwe barî amwe bakîrîîyaga, Yiesû eera atûmwa ûûgû, “Bûtikaume Njerusaremu. Eteeraani bwewe kîewa gîa kwîgua bûrî na Kîrundu Ûmûtheru ûra Baaba eeranire, naani ndabwîra. 5 Njoana aabaatithaniirie na rûûyî. Îndî bûkaabaatithua na Kîrundu Ûmûtheru nyuma ya ntugû inkai ciiyîîte.”6 Bakwonana kagiita kangî atûmwa baûria Yiesû, “Kagiita gaka i ko ûgaacookeria Aisiraeri ûnene bwao?”
7 Yiesû abacookeria abeera, “Kagiita na tarîki cia mantû mamu i Baaba wenka aituîte kûringana na watho bwake. T'îgûrû rîenu kûmenya i rî ûkeegua kûrî. 8 Îndî bûkaagîa inya rîra Kîrundu Ûmûtheru akaabwîndamîîra. Na bûgaatuîka akûûyî baakwa kwanjîîria Njerusaremu, nthîgûrû yonthe ya Njundea, Samaria, mwanka nteere cionthe cia nthîgûrû yonthe.”
9 Yiesû akûrîîkia kuuga ûgu, atûmwa bamûcûûbîîte woogu boona aathûkua eetithua îgûrû. Îtu rîamûkunîkîra mwanka aatherekeria baatiga kûmwona. 10 Bagûtigwa bakûnîîrîîte îgûrû meetho Yiesû eetîîtie, atûmwa boona araîka baîrî beekîrîte nguo injerû barûngi waagu akubî nabo. 11 Araîka babu baaria nabo. Babeera, “Antû ba Gariiri, n'ata bûkûrûtha aaga bûkari bûkûnîîrîîte îgûrû meetho? Yiesû wooyu bwona aathûkua kuuma kîrî biû eetithua îgûrû, akaaya kaîrî na njîra ta înu bwona eetia n'yo.”
Ngwatanîro ya atûmwa na antû bangî
12 Bakuuma agu baarî Karîmaani ka Mîceituuni, baacooka baathi bantû ta a kiromita îmwe baakinya Njerusaremu. 13 Bagûkinya, baatwa ngoroba baathi nyomba yao kûra baakaraga. Atûmwa babu baarî; Petûrû, Njoana, Njakubu, Enderea, Firibû, Tooma, Bathoromayo, Mathayo, Njakubu wa Arufayo, Simioni (ûra kaîrî eetagwa Mûciroti) na Njundas wa Njakubu. 14 Atûmwa babu beethîranaga gûku ngorobaani rîonthe bakaromba barî amwe bonthe. Kinya eekûrû bamwe ta Maria gina wa Yiesû na aruagina ba Yiesû i beegagua barî oogo.
Mathias aataarwa bantû a Njundas
15 Îgiitaani rîru eetîgîri ta îgana rîmwe na mîrongo îîrî beethîreene, Petûrû aarûngama mbere yao kûbaarîria. Abeera, 16 “Aruayia na antû beetû, ûroria bûra bûrî *Maandîkooni Maatheru bwarî nwa mwanka bûûyûre. Tene Kîrundu Ûmûtheru aariirie gûkûrûkîîra kîrî Ndaundi aaroria mantû ma Njundas ûra aatongoreerie kîrîndî kîra kîagwatire Yiesû. 17 Njundas aarî ûmwe wa gîkundi gîetû na aathuurîîtwe aruta ngûgî ya ûtûmwa.”
18 (N'ûntû bwa mbia ira oonire agûkunyanîra Yiesû, aathiire aagûra nacio kîthaka. Aagwîre gûku aatembûka into bia nda biauma bietîga. 19 Mantû mamu ma Njundas maamenyekanire Njerusaremu yonthe. Antû beeta kîthaka gîku na rwaria rwao “Akerindama”. Na i ta kuuga “Kîthaka kîa nthakame”.)
20 Petûrû aathi na mbere kwaria. Auga, “Îbuku rîa Sabuuri narîo riugîîte ûûgû mantûûni ma muntû ta ûyu, ‘Nyomba yake nîkare îrî îkurungu. Gûtikaagîte muntû athaamîra ku.’ Kaîrî rîauga, ‘Muntû ûngî nathûkie kaanya gaake.’ 21 Na ûra akaathûkia kaanya gaake nwa mwanka eegue arî muntû arakaranîîtie naati îgiita rîonthe rîra Mwathani Yiesû aarî amwe naati, 22 kuuma rîra Njoana aabaatithanagia mwanka rîra Yiesû aathûkiirue eetithua îgûrû.”
23 Antû beeyana mariîtwa maîrî ma bara beendaga. Ûmwe aarî Njosebu, ûra kaîrî eetagwa Barisabas kana Njastas, na wa baîrî eetagwa Mathias. 24 Baaromba barî amwe bauga, “Mwathani, n'ûntû i woû wiyî nkoro cia antû bonthe, tûtongorie kûmenya n'ûû ûkwenda kûthuura kîrî antû baba baîrî barî aaga, 25 kaingo athûkia kaanya ga gûtuîka mûtûmwa kara Njundas aatigire akîthi bûra aathiire.” 26 Baaringa kuura, Mathias aacinda oongeereka kîrî atûmwa bara îkûmi na ûmwe.