Mûbango wa Ngai na Ayaundi
9
1 Kîrîstû i mûnkûûyî n'ûmma nkwaria, ntikûrongoa. Nkoro yakwa îtongoreetue i Kîrundu Ûmûtheru nîkûmbîîra bûra nkuuga n'ûmma. 2 Nkorooni yakwa inkwîgua ndî na kwîthikîîra kûûnene na kîeba gîtakûthira 3 kîrî antû beetû ba Ayaundi. Nwa mbende Ngai andîrîke na ambathûrane na Kîrîstû wegua bûbu bûûmbîkana, ûkaaya kwîgua ûgu bûûmba gûtûma antû beetû boonokua. 4 I bo Aisiraeri, aana ba Ngai bara athuurîîte. Baroona mwago wa Ngai, i baarîîkanîrîte n'we na i beerwe *watho bwa Ngai i Musa. I baarutanirwe kûgonga Ngai na njîra yagîrîte na i beetwe wîrane i Ngai. 5 I bo nciarwa cia biûyûûyû. Na tûgîtaraga kîîmuntû, Kîrîstû aumîîte kîrî bo. Ngai ûra aathaga bionthe arookumua tene na tene. Aameni.6 Twaûmba kuuga Ngai araremwa kwingia wîrane bwake kîrî Ayaundi? Arî, n'ûntû ti kuuga muntû wonthe ûra acierwe n'Isiraeri n'ûmwe wa antû ba Ngai. 7 Kwîgua barî nciarwa cia Îburaîmu ti kuuga n'aana baake bongwa. Ririkanaani Ngai eerire Îburaîmu, “Nciarwa ciaku igaatarwa kuumania na Isaka.” 8 Kuuga ûgu i ta kwonania ti bara bonthe barî nciarwa cia Îburaîmu barî aana ba Ngai. Bara bacierwe kûringana na wîrane bwa Ngai i bo bataragwa barî aana ba mma, 9 n'ûntû Ngai eere Îburaîmu wîrane amwîra, “Kagiita kana ngakûthaarima, Saara agîe na kaana ga kaîyî.”
10 Na ûgu i ta bu gwakarire kîrî Rebeka. Aana baake barî baîrî baarî ba îthe ûmwe, ta we Isaka, ûmwe wa biûyûûyû bietû. 11-12 Îndî mbere ya kinya aana babu baciarwa, mbere ya barûtha ûthûûku kana wega, Ngai augire, “Ûra mûkûrû agaatûmîkîra ûra mûniini.” Ûgu i ta kwonania Ngai abaangagîra muntû kûringana na mûbango wake arî we, na ti kûringana na ûthûûku kana wega bûra arûthîîte. 13 Wa ta bûra *Maandîko Maatheru maugîîte, “Mbendeete Njakubu ntiendeete Esaû.”
“Nkeegua kîao woora nkeenda
na ngaacaamîra woora nkeenda.”
16 Kwoogu ti kuuga i bûra muntû akwenda arî we, kana bûra arûthîîte. I kûringana na bûra Ngai akeegua muntû kîao. 17 Maandîkooni Maatheru kwandîkîîtwe Ngai eerire mûnene wa Miisiri, “Ngûtuîkithîîtie mûnene kaingo mbonania naawe bûra ndî inya îgana, na ntambia îgweta rîakwa nthîgûrû yonthe.” 18 Kwoogu Ngai eegagua kîao woora akeenda na akaûmia kîongo woora akeenda.
Mûthûûro na kîao kîa Ngai
19 Waûmba kwîgua muntû akîûria, “I kî îîndî n'ûntû Ngai ataragîra antû mabîtia?” Kana “N'ûû amûkîria inya akaregana na wendi bwake?” 20 Ûrî ûû woû ûkûûria Ngai kîûria? Kîra kîrûthe kîaûmba kûûria ûra akîrûthîîte, “I kî n'ûntû ûndûthîîte ûûgû?” 21 Ntikuuga mûûmbi wa nyûngû nwa aûmbe na yûmba rîake nyûngû ya mûthemba woora akeenda? Twa aûmbe na yûmba warîmwe nyûngû ya gûtûmîka rîra kûrî na ûntû bwa mwanya, na akaûmba îngî ya gûtûmîkaga ntugû ira ingî? 22 I ta bu gûkari ûgu kîrî Ngai. Ngai eendaga kwonia antû bamwe mûthûûro wake, na eendaga antû boona bûra arî inya îgana. Îndî i kaanya Ngai eete antû babu n'ûntû bwa kwinyîkîria gwake. Akaabagambithia na mûthûûro wake abathirie, n'ûntû i babatîîrue kûthirua. 23 Ngai eendaga bangî nabo bamenya bûra arî ûkumio bûgana. Na babu i bo Ngai eegagua kîao. Kuuma tene, babu bo Ngai aababangîîre bakeewa mwago. 24 Tiû bara Ngai atwîtîîte, Ayaundi na bara batarî Ayaundi, ûgu i bu Ngai atûbangîrîte. 25 Wa ta bûra Ngai augîîte îbukuuni rîa kîroria Osea,
“Bara bataarî antû baakwa i bo ngeeta baakwa,
na bara nteendeete i bo nkeenda.”
26 Na kaîrî îbukuuni warîru augîîte,
“Bantû waara beerîîrwe, ‘Bûtirî antû baakwa,’
nwa woogo bageetîrwa, ‘Aana ba Ngai ûra atûûraga mwoyo.’ ”
27 Kîroria Isaya augîîrie na inya auga îgûrû rîa Isiraeri,
“Wana ûkeegua Aisiraeri ibaingîîte
ta mûthanga rûteere rwa îria,
i baakai kîrî bo bakoonokua,
28 n'ûntû Mwathani augîîte akaagiitîra antû îgamba
na mpwî na atiicookera.”
29 Na kaîrî Isaya augire,
“Ûkaaya kwîgua Mwathani wa Njûûrî
ataiga baakai beetû mwoyo,
twaya gûkara ta taûni ya Sondomu
kana ta ya Ngomoora ciathiriirue.”
Isiraeri îteetîgia
30 Kwoogu n'ata tûûmba kuuga? Ga tuuge, amwe na kwîgua bara batarî Ayaundi bataacûaga kwîgua barî baagîru, Ngai naabaagîrithiirie kuumania na wîtîgio. 31 Îndî Aisiraeri bo bagûcûûgia kûthingata *watho bakîîrîgagîîra bûkabaagîrithia, bûtaabaagîrithia. 32 Na i kî? Gîtûmi i kwîgua bateerîgagîîra wîtîgio bûbateethia, kûthingata watho i ku beerîgagîîra kûbateethia. Baatiirire “Iiga” baataratara, 33 wa ta bûra kwandîkîîtwe *Maandîkooni Maatheru,
“Ga nkûbwîra, nkaiga iiga Kîrîmaani gîa Sayuuni
na antû baingî bagaatiira iiga rîru bataratare bagwe.
Ûra akaarîîtîgia rîtimwîkîrithia nthoni.”