1 AKORINTHO
Mantû ma baarûa îno
Taûni ya Korintho îrî nthîgûrû ya Angiriki. Îbukuuni rîa Ngûgî cia Atûmwa itwîrîîtwe bûra Akorintho beetîgangiirie ntheto îmbega rîa mbere (Gîcu. 18). Mûtûmwa Paûrû akuuma Macendonia aathiire aakarakaranga taûni yîtagwa Athene akîîya kûthi taûni ya Korintho. Akûthi Korintho aatûmîîria ntheto îmbega antû baingî beetîgia. Amwe na kwîgua Ayaundi bara baatûîre gûku i baamûkarariirie mûno, antû baingî i baagîîre wîtîgio na Mwathani Yiesû. Paûrû aakarire Korintho mîeri îkûmi na înaana akîrutaga ngûgî ya ûtûmwa noogo (Gîcu. 18:11). Na nyumaani akuuma Korintho i rîo aandîkire baarûa îno arî Efeso.
Baarûa îno îrionania Paûrû akûthi Akorintho baatigirwe baagîa na mathîîna maanene mûno. Akorintho barî bo i bo baandîkîîre Paûrû bamwîra mathîîna mamwe ma mara baarî namo. Mara mangî Paûrû n'egiirue makîgwetwa arî naagu Efeso. Athoomi bara baingî baugaga kuuma Gîcu. 1-6, Paûrû aarîîrîîtie îgûrû rîa mantû mara eegîîtue. Na kuuma Gîcu. 7-16, Paûrû aarîîrîîtie îgûrû rîa mathîîna mara Akorintho baamwîrîîte.
Mathîîna mara magweteetwe baarûani îno i maingî. Makoneetie; ngwatanîro kîrî eetîgîri, ûthûngîîri bûteeguîka kaîrî, mwîtîgîri kûthitanga ûra ûngî kootiini, mantû ma kûgûrana kana kûgûrwa, kûrîa nyama irutîrîîtwe ngai cia ûrongo, kîatho kîa Mwathani, gûtûmîka kwa biewa bia gîîkîrundu kanicaani, na ûmma bwa bûra bara bakuû bakaariûkangua. Gîcuncî kîra kiiyîkeene mûno îbukuuni rîrî i Gîcu. 13 kîra kîaragîîria îgûrû rîa wendo gîkauga wendo i kîo kîewa kîra kînene Ngai aûmba kwaa muntû.
Gwookubî baarûa îno îkari ûûgû:
Nkeethi na gûcookia nkaatho, (1:1-9)
Kwathûkana gwa eetîgîri, (1:10-4:21)
Ûthûngîîri bûteeguîkîîte kaîrî, Gîcu. (5:1-13)
Mwîtîgîri kûgambana na ûra ûngî kootiini, (6:1-11)
Mwîrî ûbatîîrue ûtûmîka na njîra îkwonania muntû nagûtîîya Ngai, (6:12-20)
Kûgûrana kana kûgûrwa na gûtigana, (7:1-40)
Irio birutîrîtwe ngai cia ûrongo, (8:1-11:1)
Eetîgîri barî maromba kanicaani kana barî na kîatho kîa Mwathani ikûbatîîrue kwîgua kûrî na mûtaratara, (11:2-34)
Biewa bia gîîkîrundu, (12:1-14:40)
Kûriûkua kwa bara bakuû, (15:1-58)
Mwothi wa kwaa nkîa na mantû mangî, (16:1-12)
Mîgambo ya mûthia na nkeethi, (16:13-24)