Magamba ma Akîrîstû
6
1 Rîra ûmwe wacienu arî na ntheto na mwîtîgîri ûra ûngî bwiranaga kîrî agambithania batarî eetîgîri i kî, bantû a bwirîra ntheto inu antû ba Ngai baithikîîria bagiita îgamba? 2 Ka bûtaiyî ntugû îmwe antû ba Ngai bakaagiitîra antû ba nthîgûrû îgamba? Na ûkaaya kwîgua antû ba nthîgûrû yonthe bakaagiitîrwa îgamba i biû rî, n'ata bûtaûmba kûgiita tûgamba tûûkai? 3 I bwiyî îgiita rîgaakinya tûgiitîre araîka îgamba. Kwoogu na mma nwa tûgiite magamba ma mantû ma ûtûûro bûbû. 4 I kî n'ûntû rîra bûrî na magamba makoneetie ûtûûro bûbû bwiragîra mo bara batarî watho bwa gîîkanica? 5 Rîru n'îgi kîrî biû! Ka gûtarî we kanicaani arî na ûûme bwa kûgana ûntû aûmba kûgiita îgamba rîa mwîtîgîri na ûra ûngî? 6 Kûrîtuîkîka mwîtîgîri arîthitanga ûra ûngî kootiini kîrî antû batarî eetîgîri!7 Rîra bamwe beenu bûkûthitanga bara bangî kootiini i bûgwîteera nkuma. Ti kaaba bûgaakara bûbîtîrîtue woogu rîmwe? Kana bûgaakara bweneetue woogu wegua i bweneetue rîmwe? 8 Îndî narîo, bamwe beenu naabi i biû bûkûbîtîria bara bangî kana bûkabeenia, na n'aruanyûkwe na aaranyûkwe bûrî eetîgîri.
9-10 Ka bûtaiyî bara barûthaga mantû mataagîrîte batiewa rûgai rwa ûnene bwa Ngai? Bûtikeebenie. Gûtirî we kîrî bara barûthaga mantû mama akeewa rûgai rwa ûnene bwa Ngai: mûmaramari, mûrombi ngai cia ûrongo, mûthûngîîri, ûra amaamaga na antû arûme ta we, mwamba, mwîrirîîria, mûtogooni, ûra aatuuyagîîra ûra ûngî, na mûtuunyani. 11 Bamwe beenu i bu bwakari ûgu. Îndî ibwathambiirue bwathira meeyia, bwatherua na bwagîrithua riîtwaani rîa Mwathani Yiesû Kîrîstû na gûkûrûkîîra kîrî Kîrundu wa Ngai wetû.
Tûmagîraani mîîrî yenu gûkumia Ngai
12 Waûmba kwîgua muntû akiuga, “Niû gûtirî ûntû mbonaga bûrî bûthûûku.” Îndî narîo, mantû mara ûûmba kûrûtha ti meega monthe. Nwa mbuge gûtirî ûntû mbonaga bûrî bûthûûku, îndî niû gûtirî ûntû mbenda bûmbatha. 13 Na waûmba kwîgua ûngî n'we akiuga, “Nda n'ya gwîkîra irio, na irio i bia gwîkirwa nda.” Bûbu n'ûmma, îndî Ngai akeenyangia bionthe birî biîrî. Mwîrî t'wa gûtûmîka na njîra ya ûmaramari. Ûbatîîrue ûtûmîka n'ûntû bwa Mwathani, Mwathani n'we amenyagîîra mwîrî. 14 Kwa inya yake, Ngai naariûkiirie Mwathani. Na kwoogu wana kinya tiû twakua agatûriûkia.
15 Ka bûtaiyî mîîrî yenu n'icuncî bia mwîrî wa Kîrîstû? Gûtiûmbîka nthûkia gîcuncî gîa Kîrîstû nkîgwatithania na îrwaya! 16 Ka bûtaiyî ûra eegwatithanagia na îrwaya batuîkaga mwîrî ûmwe narîo. *Maandîko Maatheru maugaga, “Barî baîrî bagaatuîka mwîrî ûmwe.” 17 Îndî ûra we eegagua arî na ngwatanîro na Mwathani atuîkaga kîrundu ûmwe n'we.
18 Kuthûkaani wîyia bwa ûmaramari. Meeyia mara mangî monthe muntû arûthaga, amarûthagîra ome ya mwîrî wake, îndî ûra eeyagia wîyia bwa ûmaramari, i mwîrî wake wengwa eeyagîria. 19 Ga ûtaiyî mwîrî waku i Nyomba ya Ngai ya Kîrundu Ûmûtheru ûra atûûraga ndeeni yaku, ûra weerwe i Ngai? Ûtirî waku na bwaku, 20 n'ûntû ka bwagûrirwe goro mûno. Kwoogu ibûbatîîrue bûkumagia Ngai na njîra ira bûtûmagîra nacio mîîrî yenu.