2 AKORINTHO
Mantû ma baarûa îno
Nyuma ya Paûrû agûtûmîra Akorintho baarûa yake ya mbere arî taûni ya Efeso, naacookire abariûngîra abateetheeria kûthiria mathîîna mara baarî namo. Na kûrîonekana Paûrû ataakena i bûra gwakarîkire. Ariuga yarî ndiûnga ya kîeba (thooma 2:1). Waûmba kwîgua n'antû baamûkarariirie mûno. Na kuumania na bûra gwakarîkire, kûrîonekana Paûrû naandîkîîre Akorintho baarûa îngî îtarî ya mathee (thooma 2:3-4; 7:8), aatûma Tito aira yo. Îndî baarûa înu îtaaringanîrwa na mabuku mara mangî ma *Kîrîîkanîro Kîîyerû rîra maaringanagîrwa amwe. Rîru Tito airîîte baarûa înu i rîo Paûrû aumire Efeso aathi taûni yîtagwa Tiroas. Aacooka auma Tiroas aathi taûni yîtagwa Macendonia. Naagu Macendonia i noogo baarîîkanire na Tito akuuma kwira baarûa. Mantû mara Tito eerire Paûrû agûcooka maarî meega. Paûrû aakena mûno akwîgua kwîrira gwa Akorintho na bûra baacookire kûmwenda (thooma 7:6-15).
Kuumania na mantû mara Paûrû eerirwe i Tito akuuma Korintho, i rîo aandîkire baarûa îno arî Macendonia. Baarûa îno yiyîkeene mûno ta baarûa ya ciîrî ya Paûrû kîrî Akorintho. Baarûani îno Paûrû nacookeretie Akorintho nkaatho n'ûntû bwa kwîrira kwao, baacooka kwathîkîra Ngai. Na kaîrî aabandîkîîre kûbeera beethîranie mwothi barîîkie. Mwothi ûyu warî wa kwaa Akîrîstû ba Njerusaremu bara baarî nkîa. Baarûani îno yonthe Paûrû neetheteereete kuumania na bûra iroria bia ûrongo biakararagia watho bwake arî mûtûmwa (mûno mûno, Gîcu. 10-13)
Gwookubî baarûa îno îkari ûûgû
Nkeethi na nkaatho cia Paûrû (1:1-11)
Paûrû aabangûra mûbango wa rûgendo rwake (1:12-24)
Paûrû aarekera mwîyia akwîrira (2:5-11)
Ntheto îmbega îtirî îbîtia nwa rîmwe (2:12-7:4)
Gîkeno gîa Paûrû Tito agûcooka (7:5-16)
Mwothi wa kwaa Akîrîstû ba Njerusaremu bara baarî nkîa (8:1-9:15)
Paûrû akîîtheteera îgûrû rîa atûmwa ba ûrongo (10:1-11:15)
Mathîîna mara Paûrû oonire (11:16-12:10)
Bûra Paûrû aathûgaanagîria Akorintho (12:11-13:10)
Nkeethi cia mûthia na ithaarimo (13:11-13)