2 AKORINTHO
Nkeethi
1
1 I niû Paûrû nkûbwandîkîra tûrî na mûruayia wetû Timotheo. Ntuîkithîîtue mûtûmwa wa Kîrîstû Yiesû kûringana na wendi bwa Ngai.Tûrîbwandîkîra biû eetîgîri ba kanica ya Ngai ya Korintho na antû bonthe ba Ngai ba gûntû kunthe Akaaya.
2 Ngai Baaba wetû na Mwathani Yiesû Kîrîstû baroobwaa ûtugi na ûkiri.
Nkaatho kîrî Ngai ûra atûûmagîîria
3 Ga tûkumieni Ngai Îthe wa Mwathani wetû Yiesû Kîrîstû. We i Baaba ûra atwîgagua kîao na i Ngai ûra atweyaga kûûmîîria kûûnene. 4 Atûûmagîîria mathîînaani meetû monthe kaingo naati tûûmîîria bara barî na mathîîna ma mîthemba yonthe na kûûmîîria kûra tiû Ngai atwete. 5 Wa ta bûra tûnyamaaragua mûno n'ûntû bwa Kîrîstû nwa ta bu tweyagwa kûûmîîria kûûnene mûno n'ûntû bwa Kîrîstû. 6 Twathîînua, kûthîînua gwetû gûgaatûma bûûmîîria na bûteetheka. Twaûmîîrua, kûûmîîrua gwetû gûgaatûma bûûmîîria. Na kwoogu nwa bwote kûûmîîria kûnyamaaruani ta kûra tûnyamaaragua. 7 Wîrîgîîro bwetû îgûrû rîenu i bûûnene. Itûkûmenya wa bûra bûkûnyamaarua tûkînyamaarua, wana biû ibûkwewa kûûmîîria tûkîewa.
8 Aruayia na aarayia, itûkwenda kûbûririkania thîîna îra twoonire rîra twarî nthîgûrû ya Îcia. Twoonire thîîna înene îtainyîkîrîka mwanka yatûma tûthira wîrîgîîro bunthe bwa gûtûûra mwoyo. 9 Nkorooni cietû itweegagua tûgaakua îgamba rîetû i rîîgiite. Îndî mantû mama maatuîkîkire kaingo wîtîgio bwetû bûteegua bûrî kîrî inya yetû twingwa, îndî i kîrî Ngai ûra aûmba kûriûkia muntû ûmûkuû. 10 Ngai naatwonokiirie twauma moogwatiini ta mamu manene ûgu makîûmba gûtûreetera gîkuû. Na wana îîndî natwonokagia. Tûrî na mma akaathi na mbere gûtwonokia. 11 Wana biû ibûtûteethagia na gûtûrombera. Na kwoogu antû baingî bagaacookeria Ngai nkaatho n'ûntû bwetû. Maromba ma antû baingî bara batûrombagîra imacookagua.
Paûrû aabangûra mûbango wa rûgendo rwake
12 Nkorooni cietû itwîgagua tûtirî na mabîtia. Nwa tuuge tûkeneetea mantû mara tûrûthaga gûkû nthîgûrû, na mûno mûno kîrî biû, twarûthire mo tûtarî na ûntû bûûthûûku, tûrî na mathûgaania meega mbere ya Ngai. Tûûmbîîte kûrûtha mantû mamu monthe n'ûntû bwa ûtugi bwa Ngai, t'ûntû bwa ûûme bûra antû barî. 13-14 Tûrîbwandîkîra mantû mara bûûmba kûthooma bûgaciûra. Na wa ta bûra bûtwiyî mantûûni mamwe, inkwîrîgîîra bûgatûmenya caû. Na rîru nwa bûtûkeneere,b ta bûra wana tiû tûkaabûkeneerac ntugû îra Mwathani wetû Yiesû akaaya kaîrî.
15 I ndaiyî ûgu i bu bûgaatûthûkia na i ntûma mbangîîte kwamba kûbûriûngîra mbere kaingo bûthaarimwa maita maîrî. 16 Mbangîîte mbûyîîre kwenu mbûriûngîre nthiîte bwa Macendonia. Na ncookeete mbûye kaîrî nkîbûriûngîra bûkîmbumagaria nthi bwa Njundea. 17 Ntigûceetha nkiuga nkabûriûngîra. Ntikûrûtha ta antû ba nthîgûrû bara baugaga yîî, îndî bataingie bûra bauga.
18 Twîtîgieni ta bûra bwiyî Ngai i mwîtîgua. Twabwîra yîî, ûgu twauga nwabu tûkaarûtha. 19 Yiesû Kîrîstû, Mwana wa Ngai, ûra twabûtûmîîrie tûrî na Sairas na Timotheo, we t'ûra augaga yîî na agacooka akauga arî kagiita kangî. Augaga yîî kîrî ûntû bunthe, 20 kîrî mawîrane ma Ngai monthe. Na i ntûma tûtûmagîra riîtwa rîake kuuga “Aameni,” n'ûntû bwa ûkumio bwa Ngai. 21 I Ngai atûmaga tûrika wîtîgioni bwetû kîrî Kîrîstû. I Ngai aatûthuurire tûtuîka antû ba mwanya kîrî we. 22 N'we aatwîkîîre rwano rwake rwa kwonania tûrî baake na atwa Kîrundu nkorooni cietû arî mûkûûyî wa mma wa mantû monthe mara atwetwe wîrane bwa mo.