AGARATIA
Mantû ma baarûa îno
Ntheto îmbega ya Yiesû îkwanjîîria gûtûmîîrua, bara bataarî Ayaundi ibaamîkenagîîra mûno. Antû bataamenyaga wegua muntû kaingo atuîka Mûkîrîstû naabatîîrue eegua aathîkagîra *watho bwa Musa kinya bu kana arî. Paûrû augîîte bûbu t'ûntû bwa gîtûmi na bûtiûmba gûtûma muntû atuîka Mûkîrîstû. I wîtîgio bunka bûûmba gûtûma muntû agwatanîra na Ngai. Makanicaani ma Garatia, i kwarî na antû baanjîîrîîtie kûrutana kînyume kîa ûgu. Beeraga antû atî, nwa mwanka muntû athingate watho bwa Musa, ataanwe kaingo eegua arî na ngwatanîro na Ngai.
Paûrû aandîkîîre Agaratia baarûa îno kûbaririkania wîtîgio bwa mma, barûthaga mantû mara maagîrîte, na abeera baregane na bara baareeteete ûrutani bûbu bwa ûrongo.
Baarûani îno Paûrû aanjîîrîîtie na kwonania bwega ûmma bwa gîtûmi gîake gîa gûtûma eebîta mûtûmwa wa Yiesû Kîrîstû. Paûrû augîîte mwîto wake nwa kuuma kîrî Ngai, t'wa kuuma kîrî muntû. Kaîrî augîîte mwîto wake n'wa gûtûmîkîra bara batarî Ayaundi. Kuuma aaga i rîo aanjîîrîîtie kwonania bûra gûtarî ûntû bûngî bûûmba gûtûma muntû eegua arî na ngwatanîro na Ngai, tatiga wîtîgio. Na akîthiria, Paûrû atwîrîîte mûkarîre wa Mûkîrîstû wîbonanagia ungwa n'ûntû bwa wendo na mîtugo îra yumanagia na wîtîgio bwa muntû kîrî Kîrîstû.
Gwookubî baarûa îno îkari ûûgû:
Mûtûmwa wa mma na ntûmwa ya mma (1:1-10)
I Ngai aathuurire Paûrû atuîka mûtûmwa (1:11-24)
Paûrû akîtheteera ntûmwa îra aatûmagîîria (2:1-21)
Wîtîgio i bu bunka bûûmba gûtûma muntû oonoka (3:1-4:31)
Gûtongorua i Kîrundu na wendo (5:1-6:10)
Mantû ma mûthia (6:11-18)