AEFESO
Mantû ma baarûa îno
Mwandîki wa baarûa îno augîîte wengwa i Paûrû (thooma 1:1; 3:1). Kwaûmbîka ûkeegua aandîkire baarûa îno îgiita rîra aandîkagîra Akorosai. Nîbuaneene mûno na ya Akorosai. Paûrû akîandîka baarûa îno aarî nceera n'ûntû bwa ngûgî îra aarutagîra Kîrîstû (thooma 4:1; 6:20). Na gûkîthûgaanîrua aathaîkîîtwe Rooma.
Baarûa îno yaandîkîîrwe Akîrîstû ba taûni ya Efeso. Efeso îrî nthîgûrû yîtagwa Îcia. Îndî athoomi baingî beetîgîîtie Paûrû eendeete îtambua makanicaani maingî, ti Efeso yonka.
Paûrû ataandîka baarûa îno kûruta mabîtia bara aandîkagîra. Aabandîkîîre kûgeria baciûkîrwa bamenya bwega nkûrûki kîriga kîa mûbango wa Ngai wa tene na tene, na ûtugi bûra Ngai eeyaga antû, kûringana na bûra ntheto îmbega yugîîte. Na kaîrî Paûrû naarîîtie îgûrû rîa bûra kanica îkarakari, bûra îrî gîntû kîmwe, na biewa bira Ngai eeyaga eetîgîri kaingo biteethia kanica. Paûrû naarîîtie kinya îgûrû rîa bûra Akîrîstû babatîîrue bakarania na antû mwanya mwanya, arûme na eekûrû baao, aana na aciari baao, na nkombo na anene ba cio. Na akîthiria Paûrû aarîîrîîtie îgûrû rîa ndûa îra Akîrîstû barûaga na mainya ma ûthûûku. Bara “barikîîte kîrî Mwathani” babatîîrue beetîgia bagaacinda n'ûntû bwa bûra Ngai abeete mathaga ma ndûa ma gîîkîrundu, na n'ûntû bwa maromba mara barombaga (thooma 6:10-18).
Gwookubî baarûa îno îkari ûûgû:
Nkeethi (1:1-2)
Mûbango wa Ngai (1:3-14)
Îromba rîa kwewa ûûme na gûciûkîrwa (1:15-23)
Eetîgîri barî mwoyo bûmwe na Kîrîstû (2:1-22)
Kîriga kîa ntheto îmbega (3:1-21)
Gûtûûrania na ngwatanîro (4:1-16)
Mûtûûrîre wa gîîkîrîstû (4:17-5:20)
Gûkarania na bara bangî (5:21-6:9)
Inya ya Ngai ndûani ya gîîkîrundu (6:10-20)
Mûthia, nkeethi na kîthaarimo (6:21-24)