Tûrî na mwoyo bûmwe na Kîrîstû
2
1 Mbereeni bwarî baakuû n'ûntû bwa kûrega kwathîkîra maathana ma Ngai na n'ûntû bwa meeyia meenu. 2 Bwatûûraga bûkari ta antû ba nthîgûrû bûkîathîkagîra mûnene wa mainya mara maathanaga maanganyoni. Mûnene ûyu i kîrundu kîra kîrutaga ngûgî antûûni bara baregaga kwathîkîra Ngai. 3 Ûgu i bu tiû twinthe twatûûraga tûkari, tûkîathîkagîra mawîrirîîria ma mîîrî yetû. Twarûthaga bûra bunthe mîîrî yetû na mathûgaania meetû meeriragîîria. Na Ngai naathûûraga mûno i tiû ta bûra aathûûragua i bara bangî.4 Îndî n'ûntû bwa bûra kîao na wendo bwa Ngai bûrî bûûnene kîrî tiû, 5 wana kinya ûkeegua itwakuîte n'ûntû bwa kûrega kwathîka gwetû, Ngai naatwere mwoyo bûmwe na Kîrîstû. N'ûtugi bwa Ngai bûtûmîîte bwonokua. 6 Ngai n'aatûriûkanîîrie amwe na Kîrîstû, aatûma tûkaranîîra n'we kûra îgûrû n'ûntû tûrî ndeeni ya Kîrîstû Yiesû. 7 Ngai aarûthire ûgu kwonia nthuke cionthe ira ikaaro ciiya bûra ûtugi bwake bwingîîte bûgana. Ûtugi bûbu bwonekanaga na mantû meega mara aatûrûthîrîte gûkûrûkîîra kîrî Kîrîstû Yiesû. 8 Bwonokiirue n'ûntû bwa ûtugi bwa Ngai rîra bwetîgiirie Yiesû Kîrîstû. Bûtoonokua n'ûntû bwa mantû meega mara bwarûtha. Wonokio bwenu i kîewa kîa ûtheri kuuma kîrî Ngai. 9 Na n'ûntû twaka twonokagua i ngûgî imbega ira tûrutaga, muntû atibatîîrue eekumîria bu. 10 I Ngai atûmîîte twîgua tûkari ûgu tûkari. Ngai aatûûmbire tûrî ndeeni ya Kîrîstû Yiesû, kaingo tûrûthaga mantû meega ta bûra mûbango wake wakari kuuma tene.
Bûrî kîmwe na Kîrîstû
11 Bara bûtaaciarwa bûrî Ayaundi, biû bwîragwa n'Ayaundi bûtirî bataane, (îndî ingî gûtaanwa kwao i kwa mwîrî tika kûrî gwa nkoro), bûtikaariganîrueni i bûra bwakari mbereeni. 12 Mbereeni bwatûûraga bûtaiyî Kîrîstû. Bwarî kwa itha na bûtaataragwa bûrî Aisiraeri, antû ba Ngai. Bûtaataragîrwa irîîkanîrooni na mawîraneeni mara Ngai aarîîkanagîra nabo. Bwatwîre nthîgûrû îno bûtarî na wîrîgîîro na bûtarî na Ngai. 13 Îndî îîndî n'ûntû bwa nthakame ya Kîrîstû, biû bara bwarî kûraaya ibwareetirwe akubî na Ngai gûkûrûkîîra kîrî Kîrîstû.
14 Kîrîstû naareetire ûkiri kîrî Ayaundi na bara batarî Ayaundi, twatuîka gîntû kîmwe. Noomboraniirie rûthingo rûra rwatwathûranaga, aathiria ûthû bûra twarî nabu. 15 Kîrîstû naathiriirie watho bwa kîîyaundi na maathana ma bu, kaingo Ayaundi na bara batarî Ayaundi atûûmba ndeeni yake tûtuîka muntû ûmwe ûmûyerû. Ûgu i bu aareetangire ûkiri kîrî twinthe. 16 N'ûntû bwa gûkua gwake mûtharabaani, Kîrîstû naatûmire Ayaundi na bara batarî Ayaundi tûrî ta muntû ûmwe tweeganua na Ngai, aathiria ûthû bûra twarî nabu. 17 Kîrîstû aayire aareeta ntheto îmbega ya ûkiri kîrî biû bara bûtarî Ayaundi, bara bwarî kûraaya na Ngai, na kîrî biû Ayaundi bwarî akubî n'we. 18 Kwoogu gûkûrûkîîra kîrî Kîrîstû twinthe twaûmba kûthengeera Îthe tûrî Kîrunduuni ûra ûmwe.
19 Kwoogu bûtirî kwa itha na bûtirî ageni kaîrî. Îîndî bûrî atûûri amwe na bara bangî ba Ngai. Bûrî antû ba Nyomba ya Ngai 20 îra aakîîte mûcingiini rwa atûmwa na iroria. Kîrîstû Yiesû we wengwa n'we iiga rîa koona rîa nyomba înu. 21 I Kîrîstû agwatithanîîtie nyomba înu yonthe, kaingo îkûra îtuîka nyomba întheru ndeeni ya Mwathani. 22 Ngai arîbûtûmîra gwaka ndeeni ya Kîrîstû, bûtuîka ara aûmba gûtûûra gûkûrûkîîra kîrî Kîrundu wake.