APIRIPI
Mantû ma baarûa îno
Baarûa îno yaandîkirwe i mûtûmwa Paûrû. Paûrû aandîkîrîte yo eetîgîri ba taûni yeetagwa Firipi. Firipi îrî gûntû gwîtagwa Macendonia. N'oogo bantû a mbere Paûrû gûtûmîîria ntheto îmbega rûraaya (thooma Ngûgî cia Atûmwa 16). Paûrû aandîkire baarûa îno arî nceera, n'ûntû bwa gûtûmîkîra Kîrîstû (thooma Apiripi 1:7). Îndî amwe noogu îtikari ta baarûa ya kwandîkwa i muntû arî nceera. I baarûa îrî na gîkeno na ûûmîîria bwingî mûno. Nyumaani Paûrû naayire kûrekua, oona mwanya wa kûriûngîra Apiripi maita maîrî.
Gîtûmi kîra kînene gîa Paûrû kwandîkîra Apiripi baarûa îno, i kûbacookeria nkaatho n'ûntû bwa kûmûtûmîra ûteethio aingia mathîîna mara aarî namo. Na kaîrî Paûrû aabandîkîîre n'ûntû ateendaga bathira wîru n'ûntû bwa mathîîna maake kana n'ûntû bwa mathîîna maao. Kagiitaani gaku Paûrû aabaandîkagîra, Apiripi ibaanyamaaragua i bara baarî “anthû” baao (thooma 1:28).
Na kûrî mantû mangî ma gîtûmi Paûrû aandîkîîte baarûani îno. Paûrû augîîte agîkinyagîîria atî, n'ûntû bûrî gîtûmi mûtûûrîreeni wa Mûkîrîstû kwînyithagia ta bûra Kîrîstû eenyithagia kîrî Îthe, Ngai. Eerîîte Apiripi atî, kûthingata watho bwa Kîîyaundi gûtiagîrithia muntû. Kwîgua muntû arî ûmwagîru i kîewa eegagua arî ûmûthaarime nakîo i Ngai. Na bara beetîgagia Yiesû i bo Ngai eeyaga kîo. Paûrû nakaanîîtie bara batarutanaga wagîru bûbu bwa mma.
Gwookubî baarûa îno îkari ûûgû:
Nkeethi, gûcookeria Ngai nkaatho na îromba (1:1-11)
Mantû mara maatuîkîkaga kîrî Paûrû îgiitaani rîru (1:12-26)
Kwînyiia, ngerekano ya Kîrîstû na mûtûûrîre wa Mûkîrîstû (2:1-18)
Mantû ma Timotheo na Epabironditas (2:19-30)
Wagîru bwa mma bûra Ngai athaarimaga nabu bara barî na wîtîgio (3:1-11)
“Rwîro” rwa Paûrû i “kuugia” atagûtangatanga (3:12-21)
Mîgambo ya gwîkîra Apiripi wîru, gûcookeria Ngai nkaatho, na nkeethi (4:1-23)