AKOROSAI
Mantû ma baarûa îno
Baarûa îno yaandîkirwe i mûtûmwa Paûrû, na aandîkîîre yo eetîgîri ba taûni yeetagwa Korosai. Korosai yarî taûni înene na yakûraga na mpwî. Îrî nthîgûrû yeetagwa Îcia (îîndî yîtagwa Takî). Paûrû ataatûmîîria Akorosai arî we (thooma 2:1). Kûrîoneka i muntû eetagwa Epabaras airire ntûmwa kwao Korosai, akwîgua Paûrû agîtûmîîria taûni ya Efeso. I rîo antû bamwe baatuîkire eetîgîri baatua kûrîîkanaga amwe barî kanica (thooma 1:7).
Nyuma ya mîanka ta îthanthatû kana mûgwanja kuuma kanica ya Korosai îkwanjîîria, Paûrû eegua i baarî na mathîîna. Akwîgua ûgu i rîo aabaandîkîîre baarûa îno arî nceera, kûthiria mathîîna mamu. Gûkîthûgaanîrua athoomi baugaga waûmba kwîgua Paûrû aathaîkîîtwe Rooma.
I kwarî na antû bamwe naagu Korosai baarutanaga mantû mataagwatanagîra na ntûmwa ya mma ya Gîîkîrîstû. Maarî mantû kuumania na ûûme bwa kîîmuntû (thooma 2:8). Mataarî mantû ma Ngai. Baarutanaga eetîgîri bakabeera i baagîrîtwe beegagua barî na biatho kûringana na watho bwa Kîîyaundi (thooma 2:21). I baabarutanaga kinya kûromba araîka (thooma 2:18), na baareeta maathana mangî maûmo mûno maakoneetie bira bitabatîîrue kûrîwa kana gûtongwa (thooma 2:21).
Paûrû akîarîîria îgûrû rîa ûrutani bûbu bwa ûrongo augîîte, i Yiesû Kîrîstû wenka aûmba kwonokia muntû kûrû atakûthingata mathûgaania ta mamu arutani babu ba ûrongo baarutanaga kana bûra baugaga kûrûthagwe. Paûrû augîîte mantû ta mamu matireetaga muntû akubî na Ngai. Kwaria mma imairaga muntû aaraayaraaya na Ngai. Kîrîstû n'we Mwonokia wenka. Ngai aûmbire nthîgûrû gûkûrûkîîra kîrî Kîrîstû (thooma 1:16). Na Ngai agaatûma antû bonthe bagwatanîra n'we gûkûrûkîîra kîrî Kîrîstû. Na kaîrî Paûrû aandîkîîte auga muntû kwîgua arî na ngwatanîro na Kîrîstû i ku gunka kûûmba gûtûma oonokua. Na kaîrî naugîîte gîtûmi kîa muntû gûtûûra mûtûûrîre wa Gîîkîrîstû, agatigana na mantû maathûûku. Mûtûûrîre wa gîîKîrîstû ûringithîîtie bonthe: arûme na eekûrû baao, aana na aciari, nkombo na anene ba cio.
Gwookubî baarûa îno îkari ûûgû:
Nkeethi, gûcookia nkaatho, na îromba (1:1-14)
Ûnene bwa Kîrîstû na gîtûmi gîake kûringana na mûbango wa Ngai (1:15-23)
Bûra Paûrû aatûmîîrie bûgana na bûra aanyamaarîîte bûgana (1:24-2:3)
Paûrû eera Akorosai beemenyeere îgûrû rîa ûrutani bwa ûrongo (2:4-3:4)
Mûtûûrîre ûmûyerû wa gîîkîrîstû (3:5-17)
Gûkarania na bara bangî (3:18-4:1)
Mantû ma mûthia na nkeethi (4:2-18)