1 ATHESARONIKE
Mantû ma baarûa îno
Thesaronike yarî taûni îra nene ya gûntû gweetagwa Macendonia, akubî na taûni yeetagwa Firipi. Mûtûmwa Paûrû na bara baarî nabo bakuuma nthîgûrû ya Îcia, baagendeere Macendonia bathiîte bwa nthîgûrû ya Angiriki. Paûrû aambire aatûmîîria Firipi akîîya kûthi Thesaronike. Kuumania na ntûmîîri yake i kwonekire antû baanjîîria kûrûthaga ngwatanîro.
Paûrû bataakara Thesaronike mûno, n'ûntû Ayaundi i baarî bakwanjîîria kûbeegua rûriitho, baatua kûbanyamaaria (thooma Ngûgî cia Atûmwa 17:5-9). Na gîku i kîo gîatûmire Paûrû bauma Thesaronike. Bakuuma Thesaronike baagendeere taûni yeetagwa Berea, baathi îngî yeetagwa Athene. Bagûkinya Athene, Paûrû aatûma Timotheo ûra baathiyanagia n'we. Timotheo aacooka Thesaronike kaîrî. Akuuma Thesaronike eethîîre Paûrû taûni ya Korintho. Na barî Korintho i rîo baandîkire baarûa îno. Na kwaûmbîka ûkeegua baarûa îno n'yo îbuku rîa mbere *Kîrîîkanîroni Kîîyerû.
Gîtûmi gîa Paûrû kwandîkîra eetîgîri ba Thesaronike baarûa îno, na abeekîra wîru na abaûmîîria, na agîcookeria Ngai nkaatho n'ûntû bwa mantû mara eegîîtue kuumania na Timotheo. Na mûno mûno, abeekîrîte wîru na abaûmîîria n'ûntû bwa wendo bûra baarî nabu, na n'ûntû bwa wîtîgio bwao. Paûrû abaririkanîîtie bûra ntheto îmbega yabakinyangîîre, na bûra mûkarîre wake wakari rîra aarî kwao. Abeerîîte bathingate mûkarîre wake na baathîkîre mantû mara aabarutanire.
Na kaîrî baarûani îno, Paûrû naarîîtie mantû ma gûcooka kwa Mwathani, mara Athesaronike beendaga kûmenya. Athesaronike beendaga kûmenya bûra gûgaakarîka kîrî eetîgîri bara baakuire, rîra Mwathani agaacooka. Na kaîrî Paûrû eerîîte Athesaronike barutage ngûgî ciao bakirîîrîîtie, beeteere Mwathani acooke.
Na akîthiria abeerîîte bathoomere eetîgîri bonthe baarûa îno (thooma 5:27). Na aabeerire ûgu n'ûntû îgiita rîru eetîgîri baakomanaga mîciî, gûntû mwanya mwanya.
Gwookubî baarûa îno îkari ûûgû:
Nkeethi (1:1-2)
Gûcookia nkaatho (1:3-10)
Ngûgî îra Paûrû aarutire arî Thesaronike (2:1-16)
Wendo bwa Paûrû bwa kwona eetîgîri ba Thesaronike (2:17-3:13)
Kûrûtha wendo bwa Ngai (4:1-12)
Gûcooka kwa Mwathani (4:13-5:11)
Mantû ma mûthia (5:12-28)