2 ATHESARONIKE
Mantû ma baarûa îno
I mûtûmwa Paûrû aandîkire baarûa îno, na n'yo ya ciîrî kwandîkîra kanica ya Thesaronike. Paûrû aamîandîkire kûthiria mathîîna mara kanica înu yarî namo. Thîîna îmwe yakoneetie gûcooka kwa Mwathani Yiesû Kîrîstû. Kûrîonekana kûrî aarimû bamwe ba ûrongo baayîîte Thesaronike beera Akîrîstû atî, Kîrîstû naacookire (thooma 2:2). Paûrû aandîkîîre Akîrîstû ba Thesaronike kûbeera batikeeneerue n'antû babu. Paûrû eerîîte Athesaronike atî, mbere ya Mwathani acooka kûrî mantû magaakarîka. Na bûra bûnene kîrî mo i “Muntû wa Meeyia” akaaya (2:3), eekîre antû wîru bwa kûrûtha ûthûûku akîringaga biama bia ûrongo. Îndî Mwathani nakaamûthiria rîra agaacooka.
Thîîna îngî îra Paûrû aarîîrîîtie baarûani îno, i thîîna ya Akîrîstû bamwe kûrega kûruta ngûgî. Kûrî Akîrîstû bamwe baarî bagûtiga kûruta ngûgî bakiugaga gûtirî gîtûmi n'ûntû Yiesû neengeerie gûcooka, nthîgûrû îthire. Mathûgaanio mamu Akîrîstû babu baarî namo ti ma mma. Gûtirî muntû aiyî irî Mwathani agaacooka. Kwoogu tûtibatîîrue tûtiga kûruta ngûgî. Paûrû aandîkîîte auga kûruta ngûgî kûrî gîtûmi. Augîîte, “ûra akaarega kûruta ngûgî atikaarûmue irio” (3:10). Tûbatîîrue tûmenya Paûrû akiuga ûgu naakaanagia antû gûtuîka ithao.
Gwookubî baarûa îno îkari ûûgû:
Nkeethi (1:1-2)
Gûcookia nkaatho na îromba (1:3-12)
Gûcooka gwa Kîrîstû (2:1-17)
Gwîkîra Akîrîstû wîru bakaraga bwega (3:1-15)
Mantû ma mûthia (3:16-18)