4
1 Eendwa, aruayia na aarayia, inkwenda twonana mûno. Ndîenda twonana n'ûntû i bûnkenagia mûno na indîîkumagîria biû. Eendwa, karagaani bwîrikîîtie wîtîgioni bwenu kîrî Mwathani.Mîgambo ya gwîkîra wîru
2 Ndeenda eekûrû babu baîrî, Euondia na Sintike beeganua n'ûntû i ba Mwathani. 3 Woû tûrutaga ngûgî naawe, ingûkûûria ûteethie eekûrû babu, woû mwîtîgua. I twarutîîte ngûgî ya gûtambia ntheto îmbega nabo na inya mûno tûrî na Kîrementi na bara bangî twarî nabo. Mariîtwa maao i maandîke îbukuuni rîa mwoyo.
4 Rîonthe karagaani bûûyûrîîtwe i gîkeno ndeeni ya Mwathani. Na ka mbwîreeni kaîrî, ûyûragwaani i gîkeno! 5 Îgaguani bûrî abooreri kîrî antû bonthe. Na bûtikaariganîrueni Mwathani neengeerie kûûya. 6 Bûtikaamakue n'ûntû nwa bûrîkû, rombagaani rîonthe thîîna yaya. Îragaani Ngai mara bûkwenda abûrûthîra. Cookagîriani Ngai nkaatho rîra bûkûromba. 7 Bwarûtha ûgu bûkoona ûkiri kuuma kîrî Ngai, ûkiri bûra bûtamenyeka bûra bûgana na mathûgaania ma muntû. Na ûkiri bûbu bûkaamenyeera nkoro cienu na mathûgaania meenu ndeeni ya Kîrîstû Yiesû.
8 Nkîthiria, aruayia na aarayia, ka mbwîreeni ûûgû; thûgaanagîriani mantû ma mma, na mara meetîgîîrîkîîte, na mara maagîrîte, na mara matheru, na mara mathongi na mara marî îgweta. Thûgaanagîriani mantû mara meega, na mara maagîrîte gûkaathwa. 9 Rûthagaani mantû mara bwerutanire bwamagwata kuumania naani, mara bwegiirue nkiuga na bwona nkîrûtha. Bûkarûtha ûgu Ngai wa ûkiri akeegua arî amwe naabi.
Nkaatho cia Paûrû n'ûntû bwa biewa bira Apiripi baamwere
10 Mwathani natûmîîte nkena mûno n'ûntû bwa bûra bûcookeete gûnteethia kaîrî. Imbiyî gûtirî rîo bwandiganîrua, îndî bantû a kagiita kagana ûna bûtaarî na kaanya ga kûmbonia bûtindiganîrîîtue. 11 Na ntikuuga ûgu n'ûntû ndî na thîîna. I ndeerutanire kûganîrwa i bira ndî nabio. 12 Imbiyî bûra gûkari muntû arî na biiniini kana arî na biingî. I ndîîrutanîîte witho bûbu bwa kûganîrwa mbai kana ndî na yûûra, ndî na biingî kana biiniini. 13 Kwa inya ya Kîrîstû gûtirî ûntû ntaûmba kûrûtha.
14 I bwarûthire bwega bwanteethia mathîînaani maakwa. 15 Biû bwingwa i bwiyî nkuuma gûtûmîîria ntheto îmbega gîteere kîa Macendonia ntugûûni cia mbere, gûtirî kanica îngî yanteethia împa gîntû, tatiga biû Afiripi. Twatumîîte ûnyanya bwa kwewa na kweyana. 16 Rîra ndaarî Thesaronike ibwantûmîîre ûteethio maita magana ûna. 17 Na ntikuuga ûgu n'ûntû bwa kwenda bûntûmagîra biewa. Ga nkwenda bûthaarimwa n'ûntû bwa bûra bûndûthîrîîte. 18 Îîndî ndî na bia kûgana na biakûrûkîîria! Ndî ûmûganîre mûno nkûrûki i biewa bira bwanenkeere Epaburonditas aandeetera. Biewa bienu bikari ta kîgongwana kîrî mûcinko ûrî mûrîo, kîra Ngai eetîgîîrîîtie na gîkûmûkenia. 19 Ngai ûra ntûmîkagîra akabwaa bionthe bira bûrî bata nabio. Arî ûtonga bwa kûrigaria ndeeni ya Kîrîstû Yiesû.
20 Ngai Baaba wetû arookumagua tene na tene. Aameni.
Nkeethi cia mûthia
21 Nkeetheriani woora ûmwe wa antû ba Ngai ndeeni ya Kîrîstû Yiesû. Aruayia bonthe bara tûrî nabo naaga bakûbûkeethia. 22 Bûgûkeethua n'antû ba Ngai bonthe bara barî naaga, na mûno mûno, n'aruti ngûgî ba Kaisaarî.
23 Ûtugi bwa Mwathani wetû Yiesû Kîrîstû bûrookaraga naabi.